Tag: SBCA

کراچی: سندھ بلڈنگ کنٹرول اتھارٹی کے ایک افسر لاپتا ہو گئے ہیں، وہ پیر کو آفس سے نکلے اور پھر ان کا کچھ پتا نہیں چل سکا۔

تفصیلات کے مطابق ایس بی سی اے کے اسسٹنٹ ڈائریکٹر ڈیمولیشن شاہد شمس دو دن سے لاپتا ہیں، ذرائع کا کہنا ہے کہ وہ 24 مئی بروز پیر لیاقت آباد میں انہدامی عمل سے متعلق سرکاری فرائض کی ادائیگی کے لیے دفتر سے روانہ ہوئے تھے لیکن پھر گھر نہیں پہنچے۔

ترجمان ایس بی سی اے کا کہنا ہے کہ محمد شاہد شمس پیر کو ڈیمولیشن کے کام پر سوک سینٹر سے بعد نماز مغرب کے بعد نکلے تھے، لیکن پھر رات گئے بھی گھر نہ پہنچے، جس پر اہل خانہ نے دفتر رابطہ کیا۔

ذرائع کا کہنا ہے کہ ایس بی سی اے کے افسر کو لاپتا ہوئے چالیس گھنٹے سے زائد کا وقت گزر گیا ہے، اور وہ اپنی گاڑی سوزوکی آلٹو سمیت لاپتا ہیں۔

ایس بی سی اے کا افسران کو اب کہاں تعینات کیا جائے گا؟

ڈی جی ایس بی سی اے شمس الدین سومرو نے اسسٹنٹ ڈائر یکٹر شاہد شمس کی گمشدگی کا نوٹس لے لیا ہے، انھوں نے متعلقہ اداروں سے درخواست کی ہے کہ شاہد شمس کو فوری بازیاب کرایا جائے۔

ایس بی سی اے کے مطابق شاہد شمس کی گمشدگی کی ایف آئی آر کے لیے ان کی اہلیہ کی مدعیت میں درخواست نیو ٹاؤن تھانے میں جمع کرا دی گئی ہے، وزیر اعلیٰ سندھ اور وزیر بلدیات کو بھی تمام صورت حال سے آگاہ کر دیا گیا ہے۔

کراچی: سندھ بلڈنگ کنٹرول اتھارٹی میں ایک ایسے افسر کی تعیناتی کی گئی ہے جنھیں رشوت لیتے رنگے ہاتھوں پکڑا گیا تھا۔

تفصیلات کے مطابق ایس بی سی اے میں کرپٹ افسران کا راج برقرار ہے، ڈی جی ایس بی سی اے نے غیر قانونی تعمیرات کے سسٹم کو چلانے کے لیے کرپٹ افسران کی تعیناتی شروع کر دی۔

چند ماہ قبل رشوت لیتے ہوئے رنگے ہاتھوں پکڑے جانے والے ایس بی سی اے کے افسر کو اہم ذمے داری دے دی گئی، بلڈنگ افسر سمیع شیخ کو جمشید ٹو کا چارج دے دیا گیا ہے۔

سمیع شیخ گلستان جوہر میں مبینہ طور پر رشوت لیتے ہوئے پکڑے گئے تھے، رشوت وصول کرتے ہوئے ان کی ویڈیو بھی وائرل ہوگئی تھی، ذرایع کا کہنا ہے کہ ویڈیو وائر ل ہونے پر سمیع شیخ کے خلاف انکوائری ہوئی تاہم اپنے اثر رسوخ کی وجہ سے وہ انکوائری سے نکل گئے تھے۔

ذرایع ایس بی سے اے کے مطابق سمیع شیخ کے خلاف غیر قانونی تعمیرات کی متعدد شکایات ہیں، اسی لیے جمشید ٹو میں غیر قانونی تعمیرات کے سسٹم کو چلانے کے لیے ایک کرپٹ افسر کی تعیناتی کی گئی ہے۔

تبادلے

دوسری طرف سندھ بلڈنگ کنٹرول اتھارٹی میں بڑے پیمانے پر تبادلے جاری ہیں، اسسٹنٹ ڈائریکٹر جمشید ٹاؤن 1 آغا جہانگیر خان کا گلشن ٹاؤن ون میں تبادلہ کیا گیا، اسسٹنٹ ڈائریکٹر ریسرچ اینڈ ریگولیشن طارق حسین مگسی کا تبادلہ صدر ٹاؤن میں کر دیا گیا، اسسٹنٹ ڈائریکٹر ملیر ٹاؤن نعیم احمد کا تبادلہ جمشید ٹاؤن ٹو میں کر دیا گیا ہے۔

اسسٹنٹ ڈائریکٹر صدر ٹاؤن ون اور ٹو کا چارج رکھنے والے عدیل اکرم کا تبادلہ ملیر ٹاؤن میں کیا گیا، جب کہ عبدالسمیع شیخ کا تبادلہ سائٹ ٹاؤن سے جمشید ٹاؤن ٹو میں کیا گیا، گریڈ 16 کے ہی سینئر بلڈنگ انسپکٹر احسن ریاض کا تبادلہ جمشید ٹاؤن 2 سے صدر ٹاؤن ون میں کیا گیا۔