متحدہ عرب امارات کی حکومت نے رواں سال کے آغاز میں سرکاری اور غیر سرکاری اداروں میں سالانہ تعطیلات کا اعلان کردیا ہے۔
اس حوالے سے جاری شیڈول کے مطابق مجموعی طور پر 13 سرکاری تعطیلات ہوں گی، یو اے ای حکومت نے ڈیجیٹل گورنمنٹ ویب سائٹ پر سال 2023 کے دوران سرکاری اور نجی سیکٹر کے ملازمین کی تعطیلات کا شیڈول جاری کردیا ہے۔
الامارات الیوم کے مطابق اماراتی گورنمنٹ نے ایک بیان میں کہا ہے کہ اس سال کے دوران مختلف تہواروں پر 13دن کی عام تعطیل ہوگی۔ ان چھٹیوں پر ملازمین کو باقاعدہ تنخواہ بھھی ادا کی جائے گی۔
شیڈول کے مطابق یکم جنوری کو نئے سال کی ایک دن کی تعطیل ہے۔ عید الفطرکی تعطیلات چار دن 29 رمضان سے 3 شوال تک ہوں گی۔ وقوف عرفہ اور عید الاضحیٰ پر تعطیلات 9 ذی الحجہ سے 12 ذی الحجہ تک ہوں گی۔
نئے ہجری سال کی آمد پر یکم محرم 1445ھ کو ایک دن اور 12 ربیع الاول 1445ھ کو ایک دن کی تعطیل ہوگی۔ بعد ازاں نیشنل ڈے پر2 اور3 دسمبر کو دو روزہ تعطیلات ہوں گی۔
اماراتی ڈیجیٹل گورنمنٹ ویب سائٹ نے بیان میں کہا کہ اسلامی تہواروں کی چھٹیاں رویت ہلال سے منسلک ہیں۔ عیسوی کیلنڈر کے حوالے سے ان کی تاریخیں مختلف ہوسکتی ہیں۔
