کراچی(1 اگست 2025): اگست شروع ہوتے ہی بچوں کی موج مستیاں ختم ہوگئیں، موسم گرما کی تعطیلات کے بعد کراچی سمیت سندھ بھر میں آج سے اسکول کھل گئے۔
تفصیلات کے مطابق صوبہ سندھ اور بلوچستان میں گرمیوں کی چھٹیاں ختم ہونے کے بعد تعلیمی ادارے آج سے کھول دیے گئے ہیں اور تدریسی عمل کا آغاز ہوگیا ہے۔
2 ماہ کی تعطیلات کے بعد آج سے کلاسز کا باقاعدہ آغاز ہوگیا ہے تاہم سرکاری اسکولز میں طلبہ کی حاضری کا تناسب کم ہے، اس کے علاوہ بیشتر پرائیویٹ اسکولز میں کلاسز کا آغاز 4 اگست سےکیا جائے گا۔
کراچی میں سرکاری کالجز میں انٹر سال دوئم کی کلاسز کا آغاز آج سے کر دیا گیا ہے جبکہ انٹر سال اول کی کلاسز کا آغاز 4 اگست سے ہوگا اس کے علاوہ سرکاری کالجز میں بھی حاضری کا تناسب کم ہے۔
دوسری جانب حیدرآباد میں گرمیوں کی چھٹیوں کے بعد اسکول تو کھل گئے لیکن حاضری بالکل نہیں، اساتذہ تو ہیں مگر بچے نہ ہونے کے برابر ہیں۔