ARYNews.tv | Urdu – Har Lamha Bakhabar

Tag: scotland

  • ٹی 20 ورلڈ کپ کا ایک اور اپ سیٹ، اسکاٹ لینڈ کے آگے ویسٹ انڈیز ڈھیر

    ٹی 20 ورلڈ کپ کا ایک اور اپ سیٹ، اسکاٹ لینڈ کے آگے ویسٹ انڈیز ڈھیر

    ٹی 20 ورلڈ کپ میں ایک اور اپ سیٹ ہو گیا ہے، اسکاٹ لینڈ نے ویسٹ انڈیز کو ڈھیر کر دیا۔

    تفصیلات کے مطابق آئی سی سی ٹی 20 ورلڈ کپ میں اسکاٹ لینڈ نے ویسٹ انڈیز کو 42 رنز سے اپ سیٹ شکست دے دی ہے، 161 رنز ہدف کے تعاقب میں ویسٹ انڈیز کی ٹیم 118 رنز پر ڈھیر ہو گئی۔

    یہ گروپ اسٹیج کا تیسرا میچ تھا، ویسٹ انڈیز نے ٹاس جیت کر اسکاٹ لینڈ کو بیٹنگ کی دعوت دی، اسکاٹ لینڈ کی جانب سے جارج منسے نے ناقابل شکست 66 رنز کی اننگ کھیلی، جب کہ کالم میکلوئیڈ 23 رنز بنا کر آؤٹ ہو گئے۔

    جارج منسے کو بہترین اور ناقابل شکست اننگ کھیلنے پر پلیئر آف دی میچ قرار دیا گیا۔

    اسکاٹ لینڈ نے پاور پلے میں ایک اہم وکٹ لے کر اچھا آغاز کیا تاہم یہ پاور پلے کے بعد بہترین بولنگ تھی جس نے میچ کا نتیجہ اسکاٹ لینڈ کے حق میں کر دیا۔

    ٹی 20 ورلڈ کپ: پہلے میچ میں نمیبیا نے سری لنکا کو اپ سیٹ شکست دے دی

    مارک واٹ اور مائیکل لیسک کی بہترین بولنگ نے ویسٹ انڈیز کے لیے رنز لینا مشکل بنا دیا تھا، واٹ نے 3 جب کہ لیسک نے 2 اہم وکٹیں لیں۔

    اس سے قبل گزشتہ روز نمیبیا نے سری لنکا کو 55 رنز سے اپ سیٹ شکست دے دی تھی، نمیبیا کے 164 رنز ہدف کے تعاقب میں سری لنک ٹیم 108 رنز پر ڈھیر ہو گئی تھی۔

  • اسکاٹ لینڈ: بزرگوں کو ویکسین کی جگہ نمکین پانی کا انجیکشن لگا دیا گیا

    اسکاٹ لینڈ: بزرگوں کو ویکسین کی جگہ نمکین پانی کا انجیکشن لگا دیا گیا

    اسکاٹ لینڈ: بھولنے کی بیماری میں مبتلا بزرگوں کو ویکسین کی جگہ نمکین پانی کے انجیکشن لگ گئے۔

    تفصیلات کے مطابق اسکاٹ لینڈ کے لنارک شائر میں اسکینڈل سے متاثرہ کیئر ہوم میں ڈیمنشیا کے 11 مریض ایک حیران کن غلطی کا شکار ہو گئے، جنھیں کووِڈ ویکسین کی بجائے نمکین محلول کا انجیکشن لگایا گیا۔

    برطانوی میڈیا کے مطابق ہیلتھ بورڈ نے ہفتے کی رات اس غلطی کا اعتراف کیا اور معافی نامہ بھی جاری کیا گیا، تاہم یہ نہیں بتایا گیا کہ ایسی مزید کتنی غلطیاں ہوئی ہیں۔

    اسکاٹش حکومت نے بھی اس واقعے کی تصدیق کر دی ہے لیکن حکومت کا بھی کہنا ہے کہ اس کے پاس ایسی مزید غلطیوں کے بارے میں درست معلومات موجود نہیں ہیں، تاہم ان دستاویزات میں جن میں اس ویکسین اسکینڈل کا انکشاف ہوا، کیئر ہوم میں کئی دیگر واقعات کا بھی ذکر کیا گیا ہے۔

    بزرگ افراد کو پانی کا انجکشن دینے کا انکشاف ان کے طبی معائنے کے دوران ہوا، بتایا گیا کہ اس سے ان افراد کی صحت کے لیے کوئی خطرہ لاحق نہیں ہوا۔

    دستاویزات میں انکشاف کیا گیا کہ نیشنل ہیلتھ سروس کی پریشان نظر آنے والی نرسوں نے، جو پچھلے سال 16 دسمبر کو درست ویکسین لگانے کے لیے ملبرے پہنچی تھیں، نے رہائشیوں کو نمکین محلول کی شیشیوں سے غلط انجیکشن لگائے۔

    یہ قیاس کیا جاتا ہے کہ جب ویکسین کو فریزر سے نکال کر پگھلائی جانے لگے تو تھوڑی مقدار میں نمکین پانی (سیلائن سلوشن) کو خالص فائزر بائیو این ٹیک ویکسین کے ساتھ ملایا جانا چاہیے، اور اس کے بعد مریضوں کو لگائی جائے۔

    اپوزیشن کی جانب سے اس واقعے کو خطرناک قرار دیا گیا ہے، ان کا کہنا ہے کہ اس طرح کے اور بھی واقعات رونما ہو چکے ہیں، جو حکومتی ویکسین پروگرام پر سنگین سوال اٹھاتے ہیں۔

  • ویکسی نیشن کے حوالے سے ایک اور تحقیق

    ویکسی نیشن کے حوالے سے ایک اور تحقیق

    ماہرین کا کہنا ہے کہ ویکسی نیشن کے بعد کووڈ 19 کی سنگین شدت کا خطرہ نہ ہونے کے برابر ہوتا ہے، یہ تحقیق اسکاٹ لینڈ میں کی گئی تھی۔

    بین الاقوامی ویب سائٹ کے کرونا وائرس سے بچاؤ کے لیے ویکسینیشن کے بعد بیمار ہونے پر سنگین پیچیدگیوں کا خطرہ نہ ہونے کے برابر ہوتا ہے مگر خواتین کے مقابلے میں مردوں میں اس کا امکان زیادہ ہوتا ہے۔

    اسکاٹ لینڈ میں ویکسی نیشن کے بعد کووڈ 19 کے خطرے کے حوالے سے قومی سطح پر پہلی تحقیق کی گئی۔

    تحقیق میں دریافت کیا گیا کہ جزوی ویکسی نیشن کرانے والے 0.07 فیصد جبکہ مکمل ویکسی نیشن کرانے والے 0.006 فیصد افراد بریک تھرو انفیکشن (ویکسی نیشن کے بعد بیماری کے لیے استعمال ہونے والی اصطلاح) کی تشخیص ہوئی۔

    تحقیق میں دریافت کیا گیا کہ دسمبر 2020 سے اپریل 2021 کے دوران جزوی ویکسی نیشن کرانے والے ہر 2 ہزار میں سے ایک جبکہ مکمل ویکسی نیشن کرانے والے ہر 10 ہزار میں سے ایک فرد کو بریک تھرو انفیکشن کے بعد بیماری کی سنگین شدت (اسپتال میں داخلے یا موت) کا سامنا ہوا۔

    تحقیق میں یہ بھی دریافت کیا گیا کہ خواتین کے مقابلے میں مردوں میں بریک تھرو انفیکشن کے بعد بیماری کی شدت بڑھنے کا خطرہ 25 فیصد زیادہ ہوتا ہے، بالخصوص 80 سال سے زائد عمر کے مردوں میں یہ خطرہ 18 سے 64 سال کے مردوں کے مقابلے میں 5 گنا زیادہ ہوتا ہے۔

    ایسے افراد جو پہلے سے مختلف بیماریوں کے شکار ہوں، کووڈ سے متاثر ہونے سے 4 ہفتوں سے قبل اسپتال میں داخل ہوچکے ہوں، زیادہ خطرے والا پیشہ، کیئر ہوم یا غریب علاقوں کے رہائشیوں میں بھی یہ خطرہ ویکسی نیشن کے بعد بھی زیادہ ہوسکتا ہے۔

    تحقیق میں زیادہ شدت والے کیسز کی اصطلاح ایسے مریضوں کے لیے استعمال ہوئی جو کووڈ 19 ٹیسٹ مثبت آنے کے 28 دنوں کے اندر اسپتال میں داخل ہوئے یا ہلاک ہوگئے یا اسپتال میں داخلے کی وجہ کووڈ 19 قرار دی گئی۔

    ماہرین نے بتایا کہ تحقیق سے ثابت ہوتا ہے کہ ویکسین کی ایک خوراک سے بھی اسکاٹ لینڈ میں کرونا وائرس کی ایلفا قسم کے پھیلاؤ کے دوران کووڈ سے اسپتال میں داخلے یا موت کا خطرہ بہت کم ہوگیا تھا۔

    ان کا کہنا تھا کہ ویکسی نیشن کے بعد سنگین پیچیدگیوں کا خطرہ ان افراد میں ہی زیادہ ہوتا ہے جن میں کووڈ کی شدت زیادہ ہونے کا امکان ہوتا ہے یعنی معمر افراد یا پہلے سے مختلف طبی امراض کے شکار افراد۔

    انہوں نے مزید کہا کہ یہ ضروری ہے کہ لوگ خطرے سے بچاؤ کے لیے احتیاطی تدابیر اختیار کریں اور ویکسین کی دوسری خوراک کا استعمال کریں۔

  • اسکاٹ لینڈ ایک بار پھر برطانیہ سے آزادی کے لئے پر تولنے لگا

    اسکاٹ لینڈ ایک بار پھر برطانیہ سے آزادی کے لئے پر تولنے لگا

    ایڈن برگ: اسکاٹ لینڈ نے برطانیہ سے علیحدگی کے لیے دوبارہ ریفرنڈم کرانے کا اعلان کردیا ہے۔

    میڈیا رپورٹ کے مطابق اسکاٹ لینڈ کی فرسٹ منسٹر نے سن دوہزار تیئس کے اختتام تک برطانیہ سے علیحدگی کے لیے ریفرنڈم کرانے کا اعلان کیا ہے۔

    نکولا اسٹرجن کا کہنا ہے کہ برطانیہ سے علیحدگی ان کے ایجنڈے میں شامل ہے لیکن یہ معاملہ اس سال پارلیمنٹ میں زیر بحث نہیں آئے گا، انہوں نے کہا کہ ہم یہ کام صرف اس وقت کریں گے جب کرونا کی وبا ختم ہوجائے گی۔

    اسکاٹ لینڈ کی فرسٹ منسٹر نے کہا کہ کرونا کے دوران بھی ہمیں موقع ملا تو ہم سن دوہزار تئیس کے اختتام تک ریفرنڈم کراسکتے ہیں۔

    واضح رہے کہ اسکاٹ لینڈ میں اس وقت برطانیہ سے آزادی کی تحریک اپنے تاریخی عروج پر ہے۔

    یہ بھی پڑھیں: برطانیہ سے آزادی، اسکاٹ لینڈ کا بڑا قدم

    یاد رہے کہ اس سے قبل سال دوہزار چودہ میں ہونے والے ریفرنڈم میں پچپن فیصد اسکاٹ لینڈ کے باشندوں نے برطانیہ کے ساتھ رہنے جب کہ پینتالیس فیصد نے علحیدگی کے حق میں ووٹ دیا تھا۔

    سال دو ہزار چودہ کے بعد سال دو ہزار سولہ میں بھی اسکاٹ لینڈ میں 38 فیصد کے مقابلے میں 62 فیصد افراد نے یورپی یونین میں رہنے کے حق میں ووٹ دیا تھا۔

  • سمندری لہروں سے بجلی بنانے والی دنیا کی طاقتور ترین ٹربائن

    سمندری لہروں سے بجلی بنانے والی دنیا کی طاقتور ترین ٹربائن

    ایڈنبرا: اسکاٹ لینڈ میں سمندری لہروں سے بجلی بنانے والی دنیا کی طاقتور ترین ٹربائن نے کام شروع کردیا، یہ ٹربائن سمندر کی تیز لہروں اور ہواؤں کی مدد سے بجلی بناتی ہے۔

    بین الاقوامی ویب سائٹ کے مطابق سمندری لہروں سے بجلی بنانے والی دنیا کی طاقتور ترین ٹربائن نے پیداوار شروع کردی، خوبصورت ڈیزائن والی اس ٹربائن کا وزن 680 ٹن ہے جو اگلے 15 برس تک 2 ہزار گھروں کو بجلی فراہم کرے گی۔

    اسکاٹ لینڈ کے ساحلوں سے پرے نصب اس ٹائیڈل ٹربائن کو آربیٹل او ٹو کا نام دیا گیا ہے جس پر دس سال سے تحقیق جاری تھی، اس کی مکمل تیاری اور تنصیب میں 18 ماہ کا عرصہ صرف ہوا ہے۔

    اپنے غیر معمولی اسٹرکچر کی بنا پر یہ دو میگا واٹ بجلی بناتی ہے جسے مئی میں سمندر میں اتارا گیا اور اب زیر آب کیبل کی تنصیب کے بعد ٹربائن سے بجلی کی فراہمی شروع ہوگئی ہے۔

    لہروں کی آمد و رفت سے اس کا اندرونی نظام اوپر نیچے اٹھتا ہے اور کسی ٹربائن کی طرح کام کرتے ہوئے بجلی بناتا ہے۔

    لہریں ماند پڑجاتی ہیں تو اس کی پنکھڑیاں گھوم کر بجلی بنانا شروع کردیتی ہیں اور ظاہر ہے یہ کام سمندر کی تیز ہواؤں کی بدولت ہی ممکن ہوتا ہے۔ اسے آربٹل او ٹو نامی کمپنی نے ڈیزائن کیا ہے۔

    کمپنی کے مطابق یہ ماحول دوست بجلی بنانے کا ایک بہت حوصلہ افزا منصوبہ ہے جس سے پوری دنیا کو فائدہ ہوسکتا ہے کیونکہ زمین کے 70 فیصد رقبے پر سمندر موجود ہے۔

    اسے ایک طرح کی زیرِ آب ٹربائن بھی کہا جاسکتا ہے جو سمندری لہروں کے نشیب و فراز کے تحت کام کرتی ہے، اسے سنبھالنے کے لیے چار مقامات پر آہنی زنجیریں لگائی گئی ہیں۔

  • برطانیہ سے آزادی، اسکاٹ لینڈ کا بڑا قدم

    برطانیہ سے آزادی، اسکاٹ لینڈ کا بڑا قدم

    لندن: اسکاٹ لینڈ نے برطانیہ سے آزادی حاصل کرنے کے لیے بڑا قدم اٹھا لیا، اسکاٹش نیشنل پارٹی نے دوسرے ریفرنڈم کا اعلان کر دیا۔

    تفصیلات کے مطابق برطانیہ سے اسکاٹ لینڈ کی آزادی کے لیے ایس این پی نے یک طرفہ طور پر دوسرا ریفرنڈم کرانے کا اعلان کر دیا ہے۔

    اسکاٹش نیشنل پارٹی نے ہفتے کے روز دوسرے ریفرنڈم کے لیے قانون سازی کرنے کی کوشش کرنے کے منصوبے کا اعلان کیا، حالاں کہ برطانیہ کی حکومت بدستور اس طرح کے ووٹ کی منظوری سے انکار کر رہی ہے۔

    منصوبے کے مطابق مئی میں اسکاٹ لینڈ میں ہونے والے انتخابات میں اگر اسکاٹش نیشنل پارٹی جیتی تو قانونی ریفرنڈم کرایا جائے گا۔

    اسکاٹش نیشنل پارٹی کا کہنا ہے کہ آج گیارہ نکاتی روڈ میپ پیش کیا جائے گا جب کہ برطانوی حکومت کی جانب سے ریفرنڈم روکنے کی کوشش کا مقابلہ کیا جائے گا۔

    ایس این پی کے رہنما کیتھ براؤن کا کہنا تھا کہ ٹاسک فورس ریفرنڈم کے لیے حکمت عملی پر عمل پیرا ہوگی۔

    برطانوی میڈیا کا کہنا ہے کہ ایس این پی لیڈرز پر ریفرنڈم کا راستہ اختیار کرنے کے لیے پلان بی پر عمل کے لیے دباؤ ہے، جب کہ برطانیہ کے وزیر اعظم بورس جانسن نے کہا ہے کہ وہ ایک اور آزادی ووٹ کی منظوری نہیں دیں گے اور رواں ماہ ایک انٹرویو میں کہا کہ ویسٹ منسٹر کو 2050 تک اس کی اجازت نہیں دینی چاہیے۔

  • نامور کرکٹر کورونا وائرس کا شکار، اسپتال میں زیرعلاج

    نامور کرکٹر کورونا وائرس کا شکار، اسپتال میں زیرعلاج

    اسکاٹ لینڈ : کرکٹرز بھی کورونا وائرس کا شکار ہونے لگے، اسکاٹ لینڈ کے سابق آف اسپنر ماجد حق بھی اس مہلک وائرس میں مبتلا ہوگئے، انہوں نے خود کو قرنطینہ کرلیا۔

    تفصیلات کے مطابق اسکاٹ لینڈ کے سابق آف اسپنر ماجد حق نے اپنے ٹوئٹر پیغام میں انکشاف کیا ہے کہ میرا کورونا ٹیسٹ مثبت آیا ہے اور میں اسپتال میں زیر علاج ہوں۔

    اپنے پیغام میں ان کا کہنا تھا کہ پیسلے میں اسپتال کا عملہ بہت اچھا تھا اور میں ان سب کا شکر گزار ہوں جنہوں نے مجھے میسیجز کرتے ہوئے نیک تمناؤں کا اظہار کیا، انشااللہ میں مکمل صحتیاب ہو کر جلد گھر واپسی کروں گا۔

    ماجد حق نے آخری مرتبہ2015ورلڈ کپ میں اپنی ٹیم کی نمائندگی کی تھی، مایہ ناز کرکٹر کو54ون ڈے اور 21 ٹی20 انٹرنیشنل میچوں میں اسکاٹ لینڈ کی نمائندگی کا اعزاز حاصل ہے۔

    انہیں اسکاٹ لینڈ کی جانب سے ون ڈے کرکٹ میں سب سے زیادہ 60وکٹیں لینے کا اعزاز حاصل تھا لیکن2019 میں سفیان شریف نے انہیں اس اعزاز سے محروم کردیا تھا۔

    وآضح رہے کہ اسکاٹ لینڈ میں اب تک 266 کرونا وائرس کیسز کی تصدیق ہو چکی ہے جبکہ انگلینڈ میں اب تک 3 ہزار 269 افراد وائرس کا شکار ہو چکے ہیں۔

    کورونا وائرس کی وباء پھیلنے کے بعد اسکاٹ لینڈ اور انگلش کرکٹ بورڈ کی جانب سے کھیلوں کی سرگرمیاں غیر معینہ مدت تک کے لیے ملتوی کردی گئی ہیں۔

  • آبشار اُلٹی بہنے لگی، نظارہ دیکھ کر لوگ حیران رہ گئے، ویڈیو وائرل

    آبشار اُلٹی بہنے لگی، نظارہ دیکھ کر لوگ حیران رہ گئے، ویڈیو وائرل

    ایڈنبرگ : اسکاٹ لینڈ میں آبشار اُلٹی بہنے لگی، منظر دیکھنے والوں نے اس قدرت کی شان کو اپنے کیمروں میں محفوظ کرلیا، سوشل میڈیا پر لوگوں نے حیرانی و تعجب کا اظہار کیا۔

    قدرت کے حسین نظارے تو سب نے دیکھے ہی ہوں گے لیکن ایسا حیران کن اور عجیب نظارہ صرف وہ ہی دیکھ سکے جو اسکاٹ لینڈ کے سیاحتی مقام کے پاس موجود تھے۔

    اسکاٹ لینڈ میں تیز رفتار ہوائیں پانی کے بہاؤ میں رکاوٹ بن گئیں، اسکاٹ لینڈ میں 90میل فی گھنٹہ کی رفتار سے چلنے والی طوفانی ہواؤں نے آبشار کو اُلٹا بہنے پر مجبور کر دیا۔

    یہ دلکش نظارہ اسکاٹ لینڈ میں دیکھنے کو ملا جب طوفانی موسم پہاڑو ں سے بہنے والی آبشار کے راستے کی رکاوٹ بن گیا اور طوفانی ہواؤں سے پانی اوپر کی جانب اڑنے لگا، یہ دلکش مناظر لوگوں نے اپنے موبائل کیمروں میں قید کرلئے۔

    ہوا کی شدت اور رفتار اس قدر تیز تھی کہ اس نے آبشار کے پانی کو اچھال کر پیچھے پھینکنا شروع کردیا جس سے یوں لگنے لگا کہ آبشار الٹی بہہ رہی ہے، سوشل میڈیا پر ویڈیو دیکھنے کے بعد لوگوں نے قدرت کے حسین منظر پر حیرانی و تعجب کا اظہار کیا۔

    مزید پڑھیں : برطانیہ میں صدی کے سب سے بڑے طوفان نے تباہی مچا دی

    اس عشرے کے سب سے بڑے طوفان کیارہ نے برطانیہ میں بڑے پیمانے پر تباہی مچا دی ہے، شمالی برطانیہ میں 92 میل فی گھنٹہ کی رفتار سے ہوائیں چلتی رہیں، یارکشائر کے مضافاتی علاقے زیر آب آ گئے، پانی لوگوں کے گھروں اور دکانوں میں داخل ہو گیا۔

  • بریگزٹ کے باعث اسکاٹ لینڈ کی آزادی کی حمایت میں ریکارڈ اضافہ

    بریگزٹ کے باعث اسکاٹ لینڈ کی آزادی کی حمایت میں ریکارڈ اضافہ

    لندن : برطانیہ کے یورپی یونین سے آئندہ اخراج کی وجہ سے اسکاٹ لینڈ کی برطانیہ سے ممکنہ آزادی کی حمایت میں ریکارڈ اضافہ ہوا ہے۔ اس وقت اسکاٹ لینڈ کے انچاس فیصد باشندے برطانیہ سے آزادی کے حق میں ہیں۔

    تفصیلات کے مطابق ایک تازہ سروے میں بتایا گیا کہ برطانیہ کی اس ریاست کی باقی ماندہ برطانیہ عظمی سے ممکنہ آزادی کی سیاسی سوچ یوں تو کئی عشرے پرانی ہے لیکن اس سوچ اور اس کے لیے سیاسی حمایت میں گزشتہ چار برسوں میں اتنا زیادہ اضافہ دیکھنے میں آیا ہے، جتنا پہلے کبھی نہیں دیکھا گیا تھا۔

    اسکاٹش عوام میں لندن سے آزادی کی اس سوچ کی ایک بڑی وجہ یہ بھی ہے کہ ایسے اسکاٹش رائے دہندگان میں بڑی تعداد ان شہریوں کی ہے، جو چاہتے ہیں کہ انہیں مستقبل میں بھی یورپی یونین کا حصہ رہنا چاہیے۔

    سروے کے مطابق جون 2018 میں اسکاٹ لینڈ کے تقریبا 45 فیصد باشندے یہ چاہتے تھے کہ اسکاٹ لینڈ کو برطانیہ سے آزادی حاصل کر لینا چاہیے۔ اب لیکن نو ماہ بعد یہی شرح بڑھ کر 49 فیصد ہو چکی ہے۔

    مزید یہ کہ اسکاٹ لینڈ میں برطانیہ سے آزادی کے حامی ووٹروں کی یہ وہ زیادہ سے زیادہ شرح فیصد ہے، جو آج تک ریکارڈ کی گئی ہے۔

  • برطانیہ: ’علی‘ نامی سمندری طوفان کی زد میں آکر ایک خاتون ہلاک

    برطانیہ: ’علی‘ نامی سمندری طوفان کی زد میں آکر ایک خاتون ہلاک

    ایڈنبرگ : جمہوریہ آئرلینڈ میں ’علی‘ نامی طوفان کی زد میں آکر ایک خاتون ہلاک ہوگئی، جبکہ 2 لاکھ سے زائد گھر بجلی سے محروم ہوگئے۔

    تفصیلات کے مطابق طوفان کی زد میں آکر ہلاک ہونے والی خاتون اپنے کچھ دوستوں کے ہمراہ سیاحت کی غرض سے آئی تھی، جو ساحل پر اپنی گاڑی میں آرام کر رہی تھی اور طوفان کی لپیٹ میں آگئی۔

    محکمہ موسمیات نے بدھ کے روز 80 میل فی گھنٹہ رفتار سے چلنے والے طوفان کی پیشگوئی کرتے ہوئے وارننگ جاری کی تھی۔ 

    محکمہ موسمیات کا کہنا ہے کہ طوفان کے باعث فضائی آمد و رفت معطل ہوگئی ہے اور شدید طوفان کی وجہ سے اڑتی ہوئی چیزوں سے لوگوں کے زخمی ہونے یا جان جانے کا بھی خطرہ ہے۔

    برطانوی محکمہ موسمیات نے شمالی انگلینڈ، اسکاٹ لینڈ اور آئر لینڈ کے لیے وارننگ جاری کرتے ہوئے کہا ہے کہ عمارتوں کو نقصان پہنچنے اور درخت وغیرہ گرنے کا خدشہ بھی موجود ہے۔

    طوفان کی آمد کے ساتھ ہی شمالی آئر لینڈ میں بجلی کی فراہمی بھی معطل ہوگئی ہے جبکہ دیگر جہگوں پر بجلی کی فراہمی معطل ہونے کا خطرہ ہے جس کے بعد دیگر سروسز جیسے موبائل فون سروس وغیرہ بھی متاثر ہوسکتی ہے۔

    آئر لیند کے صدر مائیکل ڈی ہیگن نے طوفان کی زد میں آکر ہلاک ہونے خاتون کی موت پر افسوس کا اظہار کرتے ہوئے خاتون سے اظہار ہمدردی کیا۔

    خیال رہے کہ اس وقت مختلف براعظموں میں مختلف ممالک طوفانوں کی زد میں ہیں۔

    گزشتہ روز مینگ کھٹ نامی خطرناک سمندری طوفان نے ہانگ کانگ سمیت جنوبی چین میں تباہی مچادی، طوفان کے باعث دو افراد ہلاک جبکہ سینکڑوں زخمی ہوگئے۔