ممبئی : سمندری طوفان نے بھارت میں بھی تباہی مچائی ہوئی ہے، تیز اور اونچی لہریں پانچ لڑکوں کو بہا لے گئیں۔
بھارتی میڈیا رپورٹ کے مطابق سمندری طوفان بیپر جوائے سے گجرات کے درجن بھر ساحلی اضلاع طوفانی بارشوں اور ہواؤں سے متاثرہوں گے، گجرات کی بندرگاہوں پر الرٹ جاری کر تے ہوئے ساحلی علاقوں میں امدادی ٹیموں کے اہلکاروں کو تعینات کر دیا گیا ہے۔
بحیرہ عرب میں سمندری طوفان بیپر جوائے پاکستان اور بھارت کے ساحلی علاقوں کی جانب تیزی بڑھنے لگا ہے۔ ممبئی کے جوہو بیچ پر تیز اور اونچی لہریں وہاں موجود پانچ لڑکوں کو اپنے ساتھ بہا کر لے گئیں، ریسکیو ٹیموں نے فوری کارروائی کرتے ہوئے دو کو بچا لیا تاہم ایک لڑکا جان سے گیا، جبکہ دو کی تلاش جاری ہے۔
بھارتی میڈیا کے مطابق مذکورہ طوفان کا جمعرات کی شام بھارتی ریاست گجرات کے ساحلی علاقوں اور پاکستانی علاقے کیٹی بندر سے ٹکرانے کا امکان ہے۔ بھارتی محکمہ موسمیات کے مطابق13سے 15جون کے درمیان طوفان سے ساحلی اضلاع کچھ، جام نگر، موربی، پوربندر، گیر سومناتھ اور دیوبھومی دوارکا متاثر ہوسکتے ہیں۔
متاثرہ علاقوں میں 150کلومیٹر فی گھنٹہ کی رفتار سے ہوائیں چلنے اور شدید بارش بھی متوقع ہے، ریاست گجرات کے مختلف اضلاع سے 07 ہزار سے زائد افراد کو محفوظ مقام پر منتقل کردیا گیا ہے۔ حکام کے مطابق اکیس ہزار کشتیاں ساحل پر کھڑی کردی گئیں۔
