ARYNews.tv | Urdu – Har Lamha Bakhabar

Tag: sea view

  • سی ویو : یوم آزادی پر کراچی کے شہریوں کیلئے خوشخبری

    سی ویو : یوم آزادی پر کراچی کے شہریوں کیلئے خوشخبری

    کراچی : جشن آزادی کے موقع پر کراچی پولیس نے شہریوں کی تفریح کی سہولت فراہم کرنے کیلئے اعلان کیا ہے کہ14اگست پر سی ویو کھلا رہے گا، شہری اپنے من پسند تفریحی مقام پر آکرجشن آزادی منا سکتے ہیں۔

    تفصیلات کے مطابق کراچی پولیس نے یوم آزادی کیلئے سی ویو پر سیکیورٹی انتظامات کے حوالےسے پلان تیار کرلیا،

    ایس ایس پی ساؤتھ ساجد سدوزئی نے کہا ہے کہ یوم آزادی پر سی ویو شہریوں کیلئے کھلا رہے گا، کثیر تعداد میں شہریوں کی آمد کے پیش نظر سی ویو پر سیکیورٹی کے غیرمعمولی انتظامات ہونگے۔

    انہوں نے بتایا کہ سینئر پولیس افسران سمیت12ایس ایچ اوز سیکیورٹی ڈیوٹی پر مامور ہونگے، سی ویو اور اطراف میں پولیس کی42موبائل موجود ہوں گی۔

    اس کے علاوہ 74موٹرسائیکلوں پر اہلکار گشت بھی کریں گے، امن وامان برقرار رکھنے کے لئے 10پلاٹونز سی ویو اور اس کے ملحقہ مقامات پر موجود ہوں گی۔

    ایس ایس پی ساؤتھ کے مطابق انٹیلی جنس اسٹاف کو سی ویو کےاطراف الرٹ رہنے کا حکم دے دیا گیا ہے، مجموعی طور پر700سے زائد افسران و جوان سی ویو اور اس کے اطراف تعینات ہونگے۔

    ساجد سدوزئی نے خبردار کیا کہ کسی کو بھی ہلڑبازی کی اجازت نہیں ہوگی، ماؤنٹڈ پولیس کا دستی بھی ساحل پرڈیوٹی سرانجام دے گا۔

    کسی بھی غیرقانونی سرگرمی کی اجازت نہیں ہوگی، ہوائی فائرنگ، سائلنسر نکال کر بائیک چلانے والوں کیخلاف سخت کاروائی ہوگی، ٹریفک رواں رکھنے کیلئے سی ویو سے خیابان اتحاد کی جانب دونوں ٹریک ون وے کردئیے جائیں گے۔

  • کراچی : سی ویو جانے والے متعدد افراد گرفتار

    کراچی : سی ویو جانے والے متعدد افراد گرفتار

    سمندری طوفان کے خطرے کے پیش نظر انتطامیہ نے دفعہ 144 نافذ کرکے سی ویو جانے والے راستے بند کردیے تھے اس کے باوجود کراچی کے منچلے نوجوان کسی نہ کسی طرح سی ویو پہنچ ہی گئے۔

    لیکن جانے والوں کو سخت ترین پابندی میں دفعہ 144کی خلاف ورزی اور سمندر پرجانا مہنگا پڑگیا, ساؤتھ زون پولیس نے سی ویو جانے والوں کو گرفتار کرنا شروع کردیا۔

    اس حوالے سے پولیس نے نمائندہ اے آر وائی نیوز کو بتایا کہ دفعہ144کی خلاف ورزی پر اب تک 17افراد کو گرفتار کیا جاچکا ہے۔

    زیرحراست افراد پابندی کے باوجود سمندر پر جانے کی کوشش کررہےتھے، مذکورہ گرفتارافراد کے خلاف 3مقدمات درج کرلیے گئے ہیں۔

  • ’ڈاکٹر سارہ ملک کو زیادتی کے بعد قتل کیا‘ ڈاکٹر شان سلیم کا اعتراف جرم

    کراچی: شہر قائد میں ایک اور قتل کا ڈراپ سین ہو گیا، سی ویو میں ابتدائی اطلاعات کے مطابق خود کشی کرنے والی نوجوان فزیوتھراپسٹ سارہ ملک کیس میں انکشاف ہوا ہے کہ ان کو اسپتال کے ڈاکٹر شان سلیم نے زیادتی کے بعد قتل کیا۔

    تفصیلات کے مطابق آج صبح سی ویو سے دو دن کی تلاش کے بعد ریسکیو ٹیموں کو ڈاکٹر سارہ ملک کی لاش مل گئی ہے، ساتھ ہی یہ انکشاف بھی سامنے آیا ہے کہ انھوں نے خود کشی نہیں کی، بلکہ انھیں قتل کیا گیا، اور پھر ان کی لاش سمندر میں پھینکی گئی۔

    تفتیشی پولیس کا کہنا ہے کہ تحقیقات کے دوران واقعہ خود کشی نہیں بلکہ قتل کا نکلا ہے، اور قتل کے الزام میں ڈیفنس نشاط کمرشل میں واقع جانوروں کے اسپتال کے ڈاکٹر شان سلیم کو گرفتار کر لیا گیا ہے۔

    پولیس کے بیان کے مطابق ملزم شان سلیم نے دوران تفتیش لڑکی کو زیادتی کے بعد قتل کرنے کا اعتراف کر لیا ہے۔ پولیس حکام کے مطابق سارہ ملک ڈیفنس میں واقع جانوروں کے اسپتال میں ملازمت کرتی تھی، اس کیس میں ڈاکٹر شان سلیم کے علاوہ بسمہ نامی خاتون کو بھی نامزد کیا گیا ہے۔

    لڑکی سے جنسی زیادتی ہوئی، سی ویو میں خاتون ڈاکٹر کی خود کشی سے متعلق ایف آئی آر درج

    تفتیشی پولیس کا کہنا ہے کہ سارہ ملک نے اپنی موت سے قبل اپنی ماں کو ٹیلی فون کر کے آگاہ کر دیا تھا کہ انھیں ڈاکٹر شان سلیم نے زیادتی کا نشانہ بنایا ہے۔

    تفتیشی پولیس کے مطابق شام کے وقت شان سلیم نے سارہ کی والدہ کو فون کر کے بتایا کہ سارہ لا پتا ہے، اور اس کا پرس اور جوتے ساحل سمندر سے ملے ہیں۔

    پولیس کا کہنا ہے کہ جناح اسپتال میں ڈاکٹر سارہ ملک کی نعش کا پوسٹ مارٹم جاری ہے جس میں حتمی طور پر صورت حال واضح ہوگی۔

  • سی ویو کے قریب سمندر سے 2 روز تلاش کے بعد خاتون ڈاکٹر کی لاش مل گئی

    کراچی: شہر قائد میں سی ویو کے قریب سمندر سے 2 روز تلاش کے بعد خاتون ڈاکٹر سارہ ملک کی لاش مل گئی۔

    تفصیلات کے مطابق کراچی میں سی ویو پر دو دریا کے مقام پر ایک نوجوان لیڈی ڈاکٹر سارہ ملک نے سمندر میں نامعلوم وجوہ پر چھلانگ لگا دی تھی، ریسکیو ٹیموں نے دوسرے روز تلاش کے بعد لاش ڈھونڈ لی۔

    پولیس حکام کا کہنا ہے کہ جمعے کو پہلے روز ہی لڑکی کا ہینڈ بیگ ساحل سے مل گیا تھا، بیگ سے لڑکی کا موبائل بھی ملا، جس کی مدد سے تحقیقات کی جا رہی ہے۔

    پولیس حکام کے مطابق دو روز مسلسل تلاش کے بعد آج صبح لڑکی کی لاش سمندر سے نکال لی گئی، لڑکی کی لاش پوسٹ مارٹم کے لیے جناح اسپتال منتقل کی گئی ہے، لاش کو ضابطے کی کارروائی کے بعد ورثا کے حوالے کیا جائے گا۔

    پولیس حکام کے مطابق لڑکی جمعے کی دوپہر گھر سے اسپتال جانے کا کہہ کر نکلی تھی، سائرہ ملک ڈیفنس نشاط کمرشل پر قائم جانوروں کے اسپتال میں ملازمت کرتی تھی۔ لڑکی کی موت کی وجہ کا تعین پوسٹ مارٹم رپورٹ ہی سے ہو سکے گا۔

    اہل خانہ کا اصرار ہے کہ سارہ ملک خود کشی نہیں کر سکتی، جب کہ پولیس حکام کا کہنا ہے کہ واقعاتی شواہد سے لگتا ہے کہ لڑکی نے خود کشی کی ہے۔

    بیگ میں موجود شناختی کارڈ سے لڑکی کی شناخت سارہ ملک دختر ابرار احمد کے نام سے ہوئی تھی، جو اعظم بستی محمود آباد کی رہائشی تھی، لڑکی کے والد ابرار احمد ریٹائرڈ پولیس ہیڈ کانسٹیبل ہیں، والد کے بیان کے مطابق ان کی بیٹی ہاؤس جاب مکمل کر چکی تھی، اہل خانہ کا کہنا تھا کہ سارہ ملک فزیوتھراپسٹ ڈاکٹر ہے۔

    اہل خانہ کی جانب سے تاحال واقعے کے حوالے سے کسی پر شک کا اظہار نہیں کیا ہے۔

  • کراچی والوں کے لیے ساحل سمندر پھر بند کردیا گیا

    کراچی والوں کے لیے ساحل سمندر پھر بند کردیا گیا

    کراچی: صوبہ سندھ کے دارالحکومت کراچی کے شہریوں کی پسندیدہ ترین تفریح گاہ، ساحل سمندر ایک پھر بند کردیا گیا، پابندی عید پر کرونا وائرس کے بڑھنے کے خدشے کے پیش نظر لگائی گئی ہے۔

    تفصیلات کے مطابق شہر کراچی کا ساحل سمندر ایک بار پھر شہریوں کے لیے بند کردیا گیا، عید کے دنوں میں سی ویو پر نہانے اور گھومنے پر مکمل پابندی عائد کردی گئی۔

    سی ویو پر پابندی پر عملدر آمد کے لیے دو ناکے لگائے جائیں گے، ایک ناکہ اتحاد روڈ عائشہ مسجد اور دوسرا بلاول ہاؤس کے قریب لگایا جائے گا۔

    ایس ایس پی ساؤتھ زبیر نزیر کا کہنا ہے کہ 8 موٹر سائیکل اسکواڈ گشت پر مامور ہوں گے، مختلف مقامات پر 50 اہلکاروں کو تعینات کیا جائے گا۔ سی ویو روڈ پر 150 اہلکار ڈیوٹی سر انجام دیں گے۔

    ایس ایس پی کا مزید کہنا ہے کہ صرف مقامی افراد کو جانے کی اجازت ہوگی۔

  • وسیم اکرم کی خوبصورت صبح کچرے سے اٹے ساحل کو دیکھ کر برباد ہوگئی

    وسیم اکرم کی خوبصورت صبح کچرے سے اٹے ساحل کو دیکھ کر برباد ہوگئی

    کراچی: پاکستان کرکٹ ٹیم کے سابق کپتان وسیم اکرم صبح صبح بیگم کے ساتھ ساحل سمندر پر پہنچ کر پریشان ہوگئے، کچرے سے اٹے ساحل کو دیکھ کر انہوں نے کہا کہ پاکستانی بہت خوبصورت لوگ ہیں لیکن گندے بھی ہیں۔

    تفصیلات کے مطابق پاکستان کرکٹ ٹیم کے سابق کپتان وسیم اکرم نے سماجی رابطے کی ویب سائٹ ٹویٹر پر ایک ویڈیو پوسٹ کی، ویڈیو میں وہ ساحل سمندر پر کھڑے ہیں اور نہایت پریشان نظر آرہے ہیں۔

    اپنی ویڈیو میں وسیم اکرم کہہ رہے ہیں کہ میں آج ہفتے کے پہلے روز صبح صبح اپنی بیگم کے ساتھ سی ویو آیا ہوں لیکن میں نے بیوی کو یہاں لا کر غلطی کردی ہے۔

    انہوں نے اپنے پیچھے کچرے سے اٹے ساحل کی نشاندہی کرتے ہوئے کہا کہ اس کے لیے کوئی دوسرا نہیں ہم خود ہی ذمہ دار ہیں، میری بیوی پوری دنیا کو کہتی ہے کہ پاکستان بہت خوبصورت ہے۔ پاکستان کے لوگ بہت خوبصورت ہیں، یقیناً خوبصورت ہیں لیکن گندے بھی ہیں اور اس بات کو مانیں۔

    وسیم اکرم کا کہنا تھا کہ سوشل میڈیا پر جن افراد کو مشورے دینے کا شوق ہے وہ اب مشورے دیں کہ کیسے اس مائنڈ سیٹ کو تبدیل کیا جاسکتا ہے۔

    انہوں نے کہا کہ یہ ساری گندگی سمندر سے آئی ہے، جو کچرا ہم سمندر میں پھینکتے ہیں وہ لہروں کے ساتھ واپس آتا ہے۔

    دوسری جانب وسیم اکرم کی اہلیہ شنیرا اکرم نے بھی ٹویٹر پر ساحل کی تصاویر اور ویڈیوز پوسٹ کیں، انہوں نے کہا کہ ہمارا شہر تکلیف میں ہے اور ہم اس کے لیے کچھ نہیں کر رہے۔

    شنیرا اکرم اس سے قبل بھی ساحل پر پڑے طبی فضلے کی نشاندہی کر چکی ہیں جس کے بعد فوری کارروائی عمل میں لائی گئی تھی اور طبی فضلہ ساحل سے اٹھا کر محفوظ طریقے سے تلف کیا گیا تھا۔

  • کراچی: نشے میں دھت افراد کی فائرنگ، بچے سمیت 3 افراد اور 3 گھوڑے زخمی

    کراچی: نشے میں دھت افراد کی فائرنگ، بچے سمیت 3 افراد اور 3 گھوڑے زخمی

    کراچی: شہرِ قائد کے تفریحی مقام سی ویو پر نشے میں دھت مسلح غنڈوں نے گولیاں برسا کر ایک بچے سمیت تین افراد اور تین گھوڑوں کو زخمی کر دیا۔

    تفصیلات کے مطابق سی ویو کراچی پر نشے میں دھت غنڈوں کی دادا گیری سے ہراس پھیل گیا، مسلح افراد کی اندھا دھند فائرنگ سے 3 افراد اور 3 گھوڑے زخمی ہو گئے۔

    پانچ نا معلوم افراد سفید رنگ کی گاڑی میں سی ویو پہنچے جہاں انھوں نے گھوڑے کی سواری بھی کی، بعد ازاں مستی میں آ کر سی ویو کی سیڑھیوں پر گولیاں برسانے لگے۔

    گولیاں سیڑھیوں کے ٹائلز سے ٹکرا کر آس پاس موجود لوگوں اور گھوڑوں کو لگیں، جس سے بچے سمیت تین افراد اور تین گھوڑے زخمی ہو گئے۔

    لوگوں کو سیر کرانے والے گھوڑے کے مالک میر حمزہ کی ٹانگوں پر بھی گولیاں لگیں، زخمی افراد کو اسپتال منتقل کر دیا گیا ہے، تاہم کئی گھنٹے گزرنے کے بعد بھی پولیس کارروائی میں نا کام رہی ہے۔

    یہ بھی پڑھیں:  پرانا کراچی واپس آ گیا، امید ہے پرانا پاکستان بھی واپس آئے گا: مراد علی شاہ

    اے ایس پی سرفراز ورک کا کہنا ہے کہ نوجوان نے محمود گھوڑے والے کی طیش دلانے پر زمین پر فائر کیا تھا، اس سلسلے میں محمود گھوڑے والے سے تفتیش جاری ہے۔

    خیال رہے کہ گزشتہ روز کراچی میں پی ایس ایل فور کے کام یاب انعقاد کے بعد وزیرِ اعلیٰ سندھ مراد علی شاہ نے میڈیا سے گفتگو کرتے ہوئے کہا تھا کہ پرانا کراچی واپس آ گیا، امید ہے پرانا پاکستان بھی واپس آئے گا۔

    جب کہ آج ایک اعلیٰ سطح کے اجلاس میں وزیرِ اعظم عمران خان نے کراچی کے مسائل پر اظہارِ تشویش کیا، انھوں نے کہا کہ مسائل کے حل کے لیے طویل المدت منصوبہ بندی کی جائے۔

  • کراچی کے ساحل پر ہزاروں مردہ مچھلیاں آگئیں

    کراچی کے ساحل پر ہزاروں مردہ مچھلیاں آگئیں

    کراچی: شہرِ قائد کے ساحلِ سمندر پر ہزاروں کی تعداد میں مردہ مچھلیاں پائیں گئیں، شہریوں کی بڑی تعداد انہیں دیکھنے آگئی ، ساحل سے تعفن اٹھنے لگا۔

    تفصیلات کے مطابق اتوار کی صبح کراچی کے شہر ی معمول کے مطابق شہر کے مشہور ترین ساحل ’ سی ویو ‘ پہنچے تو دیکھتے ہیں کہ تا حدِ نگاہ ساحل پر ہزاروں مردہ مچھلیاں پڑی ہوئی ہیں۔

    ساحل پر موجود مردہ مچھلیوں میں چھوٹی بڑی اور مختلف اقسام کی مچھلیاں شامل ہیں ، شہریوں کی کثیر تعداد ان مچھلیوں کو دیکھنے کے لیے ساحل کا رخ کرنے لگی، تاہم ان کی موجودگی کے سبب شہریوں کی پکنگ بھی خراب ہوگئی۔

    اس موقع کا فائدہ اٹھانے کے لیے کچھ مفاد پرست ماہی گیر بھی پہنچ گئے اور بڑی تعداد میں مچھلیاں اکھٹی کرکے لے گئے ، اس موقع پر انہیں روکنے کے لیے متعلقہ حکام میں سے کوئی بھی موقع پر موجود نہیں تھا اور خیال کیا جارہا ہے کہ یہ مچھلیاں اب کراچی کے شہریوں کو فروخت کردی جائیں گی۔

    وقت گزرنے کے ساتھ ساحل پر مچھلیوں کی بساند شدید ترین ہوتی جارہی ہے جس کے سبب شہریوں کا وہاں رکنا دشوار ہوچکا ہے اور پکنک کے لیے آئے شہری انتظار سے تھک کر واپس اپنے گھروں کا رخ کررہے ہیں۔

    فشریز اور متعلقہ محکموں کے افسران تا حال موقع پر نہیں پہنچے ہیں ، اور مچھلیاں تاحال ساحلِ سمندر پر موجود ہیں جن کی موجودگی کے سبب گوشت خور پرندے اور آوارہ کتے بھی ساحل کا رخ کررہے ہیں۔

    ماہرین کا کہنا ہے ساحلِ سمندر پر اس طرح آنے والی مچھلیاں کسی بھی طرح کھانے کے لائق نہیں ہوسکتی کیوں کہ ان کی موت کا سبب غیر فطری ہے ، یقیناً یہ مچھلیاں کسی زہریلے فضلے کا شکار ہوئی ہیں۔

  • کیمل ریس: غفیر ساربان ناصر کے اونٹ ’شیر خان‘ نے میدان مار لیا

    کیمل ریس: غفیر ساربان ناصر کے اونٹ ’شیر خان‘ نے میدان مار لیا

    کراچی: اینٹی نارکوٹکس فورس سندھ (اے این ایف) کی منعقد کردہ بیچ کیمل ریس میں غفیر ساربان ناصر کے اونٹ ’شیر خان‘ نے سنسنی خیز مقابلے کے بعد میدان مار لیا۔

    تفصیلات کے مطابق اینٹی نارکوٹکس فورس سندھ کی جانب سے کیمل ریس کا انعقاد کیا گیا جبکہ اے این ایف سندھ کے بریگیڈیر نور الحسن نے فلیگ آف کر کے ریس کا افتتاح کیا، جس میں عرب گوٹھ ماڑی پور کے ساربان ناصر کے اونٹ نے سنسنی خیز مقابلے کے بعد جیت اپنے نام کر لی۔

    کراچی کے ساحل سمندر ’سی ویو‘ کے قریب ہونے والی اس ریس میں 30 تیز رفتار والے اونٹوں نے حصہ لیا جہاں پاکستان رینجرز، سندھ پولیس اور دیگر حساس اداروں کی جانب سے فول پروف سیکورٹی انتظامات کیے گئے۔

    سعودی عرب میں اونٹوں کے مقابلہ حسن کا اعلان

    کیمل ریس کا مقابلہ ماڑی پور کے علاقے سے تعلق رکھنے والے غفیر ساربان ناصر کے اونٹ نے اپنے نام کر لیا، جبکہ داؤد خان کے اونٹ ’ببرشیر‘ نے دوسری اور مولا بخش کے اونٹ ’دل جلا‘ نے تیسری پوزیشن حاصل کی۔

    ملتان : تاجر کے بیٹے کی مہنگی مہندی، 2ہزار مہمان، شیر، گھوڑے، اونٹ اور بگھی شامل

    منعقد کیے گئے ریس کے چیف جج محمد سہیل بلوچ اور چیف آفیشل محمد اکرم بلوچ تھے تاہم ریس کے اختتام پر مہمان خصوصی بریگیڈیر نورالحسن نے عابد علی ایڈووکیٹ، احمد علی راچپوت اور محمد عارف بلوچ کے ہمراہ پوزیشن ہولڈرز ساربانوں میں ہزاروں روپے کے نقد انعامات، بیش قیمت گولڈن ٹرافی، شیلڈز اور خصوصی سرٹیفیکٹ بھی تقسیم کئے۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • بد سلوکی کیس: وکیل کی پولیس کیخلاف عدالت میں درخواست دائر

    بد سلوکی کیس: وکیل کی پولیس کیخلاف عدالت میں درخواست دائر

    کراچی : سوشل میڈیا پر وائرل ہونے والی ویڈیو سے متعلق خواجہ شمس الاسلام ایڈووکیٹ نے عدالت میں سندھ حکومت اور پولیس کیخلاف درخواست دائر کردی، سندھ ہائی کورٹ نے فریقین کو8 جنوری کے نوٹسز جاری کردیئے۔

    تفصیلات کے مطابق کلفٹن کے علاقے سی ویو پر پولیس سے بد سلوکی کے الزام میں گرفتار سندھ ہائیکورٹ کے وکیل شمس الاسلام نے اپنی گرفتاری اور رہائی کے بعد سندھ ہائیکورٹ میں تحفظ کے حصول کیلئے درخواست دائر کردی ہے۔

     درخواست میں ہوم سیکریٹری، آئی جی سندھ، ڈی ایس پی اورنگزیب، ایس ایس پی ساؤتھ جاوید اکبر،ڈی آئی جی ساؤتھ آزاد خان بھی فریق ہیں، اس کے علاوہ درخشاں تھانے کےاہلکاروں بھی درخواست میں فریق بنایا گیا ہے۔

    درخواست گزار کا مؤقف ہے کہ پولیس نے واقعے کو اپنی انا کا مسئلہ بنا لیا ہے اس لیے مجھ پر مزید جھوٹے مقدمات قائم کیے جاسکتے ہیں لہٰذا پولیس کو پابند کیا جائے۔

    جس پر سندھ ہائیکورٹ نے فریقین کوطلبی کے لیے8 جنوری کے نوٹسز جاری کردیئے ہیں۔

    مزید پڑھیں : پولیس سے بدسلوکی کرنے والے وکیل کی گرفتاری و رہائی

    واضح رہے کہ پولیس نے خواجہ شمس الاسلام ایڈووکیٹ کو قابل ضمانت مقدمے میں گرفتار کیا تھا، پیشی کے موقع پر عدالت نے وکیل کی گرفتاری غیرقانونی قرار دیتے ہوئے پولیس سے وضاحت بھی طلب کر رکھی ہے۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر ضرور شیئر کریں۔