Tag: Seasonal effects

  • موسم سرما میں ہلدی سے بنے مشروبات بے حد مفید

    موسم سرما میں ہلدی سے بنے مشروبات بے حد مفید

    ہرسال موسم سرما کے آغاز پر مختلف بیماریوں کا زور پکڑنا عام سی بات ہے، سردی کی شدت میں اضافہ ہونے کے ساتھ ساتھ نزلہ، زکام، کھانسی اور ہلکے بخار جیسی موسمی بیماریاں بھی حملہ آور ہوتی ہیں۔

    اس لیے ماہرین صحت کا کہنا ہے کہ اس قسم کی بیماریوں پر قابو پانے کیلئے موسمی پھل اور دیگر گھریلو علاج ایک نہایت آسان طریقہ ہے۔

    اس کے لئے آپ کو ایسی غذاؤں کا استعمال کرنا ہوگا جو آپ کو ان نزلہ زکام، بخار اور کھانسی جیسے مسائل سے دور رکھ سکیں۔

    ان بیماریوں کے علاج کے لئے گھر میں موجود بہترین غذاؤں میں سے ایک چیز ہلدی ہے، ہلدی اپنی شفا بخش خصوصیات کی وجہ سے روایتی گھریلو علاج اور ادویات کا اہم حصہ ہے، یہ ایک قدرتی اینٹی آکسیڈنٹ ہے اور اس میں اینٹی سوزش خصوصیات بھی موجود ہیں۔

    ہلدی میں موجود قدرتی اجزاء نزلہ زکام، سردی میں ہڈیوں کا درد، درد ناک جوڑوں کا مسئلہ اور بدہضمی کو ٹھیک کرنے میں مدد دیتے ہیں، یہ گلے کی خراش اور بیکٹیریل انفیکشن سے بھی راحت فراہم کرتے ہیں جو سردیوں میں عام ہوتے ہیں۔

    ہلدی جسم کے مدافعتی نظام کو بہت سی بیماریوں کے خلاف لڑنے میں مدد کرتی ہے۔ ہلدی کے فوائد حاصل کرنے کا بہترین طریقہ یہ ہے کہ ہم اسے اپنی روزمرہ کی خوراک میں شامل کریں۔

    یہ ہی نہیں موسم سرما میں ہلدی سے بھرپور مشروبات کا لطف اٹھایا جاسکتا ہے تو پھر ذیل میں بتائی گئی ہلدی والی ڈرنکس بنائیں اور اپنی قوت مدافعت کو بڑھائیں۔

    ہلدی اجوائن کا شربت :
    ہلدی اجوائن کا پانی اس مشروب کو بنانے کے لئے آپ اجوائن کو رات بھر پانی میں بھگو دیں، اگلے دن اس پانی کو کچی ہلدی کے ساتھ اُبالیں اور پھر چھان کر گرما گرم پی لیں، یہ مشروب آپ کی صحت کے لئے بےحد مفید ثابت ہوگا اور آپ کو سردی کی مختلف بیماریوں سے بچائے گا۔

    کینو اور ہلدی کا شربت :
    کینو اور ہلدی والا ڈرنک ایک عدد کینو چھیل کر اس کا رس نکال لیں، اب ایک عدد گاجر کا بھی رس نکال کر اس میں ملا لیں، اب ان دونوں کو مکس کریں اور اس میں آدھا چائے کا چمچ ہلدی شامل کریں پھر لیموں کا رس اور اوپر سے ادرک کا رس ڈال کر مکس کریں اور ٹھنڈا کر کے پی لیں، یہ ایک ایسا جادوئی ڈرنک ہے جو نہ صرف ذائقے میں مزیدار بلکہ آپ کی قوتِ مدافعت کو بڑھانے کے لئے بہترین ثابت ہوگا۔

    دودھ اور ہلدی کا شربت :
    ہلدی اور دودھ کے بارے میں تو سب ہی جانتے ہیں لیکن اگر سردی میں اس ہلدی دودھ میں جلد غذائیت سے بھرپور اجزاء اور شامل کر لیے جائیں تو کیا ہی بات ہے، دودھ میں ہلدی شامل کرکے اسے پکائیں، اب اس میں ایک چٹکی دارچینی پاؤڈر مٹھاس کے لئے شہد اور گُڑ شامل کریں اور رات کے وقت گرما گرم یہ ہلدی مصالحہ دودھ پی کر سو جائیں، نہ ہی سردی لگے گی اور نہ ہی کوئی سردی کا انفیکشن آپ کا کچھ بگاڑ سکے گا۔

    ہلدی وینیلا دہی اسموتھی :
    ہلدی کو دہی میں شامل کرکے دہی کی بہترین اسموتھی بھی بنا سکتے ہیں اس کے لئے بس ایک کپ دہی لیں، اس میں آدھا چائے کا چمچ ہلدی شامل کریں، 2 عدد کیلے شامل کریں ایک چٹکی دارچینی ملائیں اور مٹھاس کے لئے ایک سے 2 کھانے کے چمچ شہد ملا لیں اسے بلینڈ کریں اور پی لیں۔

  • اپنے بالوں کو موسمی اثرات سے کیسے محفوظ رکھیں؟ آسان نسخے

    اپنے بالوں کو موسمی اثرات سے کیسے محفوظ رکھیں؟ آسان نسخے

    ہر بار موسم کی تبدیلی کے اثرات ہمارے جسموں یا اندورنی نظام پر پڑتے ہیں، ان اثرات میں سر فہرست ہماری جلد اور بال ہوتے ہیں جن سے پریشانی کا سامنا رہتا ہے۔

    ان موسمی اثرات سے کیسے محفوظ رہا جائے یا اس سے بچنے کیلئے کیا اقدامات کیے جائیں اس حوالے سے ہم یہاں نہایت آسان طریقے بیان کریں گے جن پر عمل کرکے اس پریشانی سے نجات ممکن ہے۔

    آپ نے یہ مشاہدہ لازمی کیا ہوگا کہ موسم کی تبدیلی اکثر ہمارے بالوں کو خشکی کا شکار بنا دیتی ہے جس کی وجہ سے بال بہت زیادہ گرنے لگتے ہیں۔

    یہی وجہ ہے کہ ماہرین صحت موسم کی تبدیلی کے دوران اپنے بالوں کا زیادہ خیال رکھنے کا مشورہ دیتے ہیں۔ اگرچہ آپ کو اپنے بال مضبوط، گھنے اور چمکدار بنانے کے لیے انٹرنیٹ پر بہت سے مشورے مل سکتے ہیں لیکن ماہرین کا ماننا ہے کہ مضبوط بالوں کے لیے اپنی غذا پر دھیان دینا بہت ضروری ہے۔

    غیرملکی ماہر غذائیت لونیت بترا نے حال ہی میں اپنے انسٹاگرام پر بالوں کی دیکھ بھال کرنے کے طریقوں پر تفصیل سے بات کی ہے۔

    بترا کہتی ہیں کہ صحت مند غذا اور مناسب دیکھ بھال سے بالوں کو مضبوط بنایا جاسکتا ہے، بالوں کو بہتر بنانے کے لیے مندرجہ ذیل غذائی اجزاء کا استعمال لازمی کریں؟

    وٹامن اے:
    یہ ہمارے بالوں میں نمی برقرار رکھنے میں مدد کرتا ہے۔ وٹامن اے بالوں کی نشوونما میں بھی مدد کرتا ہے۔ وٹامن اے سے بھرپور غذاؤں میں شکر قندی، کدو وغیرہ شامل ہیں۔


    بی وٹامنز:
    وٹامن بی آپ کی کھوپڑی تک آکسیجن اور غذائی اجزاء لے جانے میں مدد کرتے ہیں۔ اناج، کیلا، پھلیاں وغیرہ وٹامن بی سے بھرپور ہیں۔
    وٹامن سی:
    یہ کولیجن بنانے کے لیے ضروری ہے۔
    وٹامن ای:
    وٹامن ای آکسیڈیٹیو تناؤ کو روکنے اور بالوں کی نشوونما کو بڑھانے میں مدد کرتا ہے۔ بادام، پالک، کدو وغیرہ جیسی غذائیں وٹامن ای سے بھرپور ہوتی ہیں۔
    آئرن:
    کیا آپ جانتے ہیں، آئرن کی کمی بالوں کے گرنے کی ایک بڑی وجہ ہے؟ یہی وجہ ہے کہ ماہر غذائیت لونیت بترا بالوں کی اچھی صحت کے لیے آئرن سے بھرپور غذا جیسے پھلیاں، مٹر اور پھلیاں کھانے کا مشورہ دیتی ہیں۔
    زنک:
    اپنی غذا میں زِنک سے بھرپور غذاؤں کو شامل کرنے سے خشکی کو کم کرنے اور بالوں کی نشوونما میں مدد مل سکتی ہے۔ زنک سے بھرپور غذا میں پھلیاں، گری دار میوے اور بیج شامل ہیں۔


    پروٹین:
    بالوں کی صحت مند نشوونما کے لیے اپنی خوراک میں پروٹین کی اچھی مقدار شامل کریں۔ دودھ اور انڈوں سے پروٹین لیا جا سکتا ہے۔
    بائیوٹین:
    بائیوٹن کا تعلق کیراٹین کی پیداوار اور خشکی سے بچاؤ میں معاون ہے۔ کچھ عام بایوٹین سے بھرپور غذائیں انڈے کی زردی، میٹھے آلو اور مشروم ہیں۔