لندن : برطانوی وزیر خارجہ ڈومینک راب نے برطانیہ میں کورونا وائرس کی ایک اور لہر آنے کا امکان ظاہر کرتے ہوئے کہا نئی لہر آنے کی صورت ایک اور لاک ڈاؤن کی طرف جائیں گے۔
تفصیلات کے مطابق برطانوی وزیر خارجہ ڈومینک راب نے پریس کانفرنس میں کہا کہ برطانیہ میں کورونا وائرس کی ایک اور لہر بھی آسکتی ہے، نئی لہر آنے کی صورت ایک اور لاک ڈاؤن کی طرف جائیں گے۔
برطانوی آرمی چیف نے بھی وزیرخارجہ کے ہمراہ پریس کانفرنس میں شرکت کی، اس موقع پر برطانوی چیف آف جنرل سٹاف جنرل سر نک کارٹر کا کہنا تھا کہ چالیس سالہ سروس میں سب سے بڑے چیلنج کا سامنا ہے، این ایچ ایس کی مدد سب سے بڑا لاجسٹک چیلنج ہے۔
برطانوی آرمی چیف نے کہا کہ ہم نے ننانوے سالہ سپاہیوں کو بھی متحرک کیا، کیپٹن ٹام مور برطانوی افواج کی خدمات کا استعارہ ہیں، برطانوی افواج کو کمیونٹیز کی خدمت پر فخر ہے۔
ان کا مزید کہنا تھا کہ ہم اس چیلنج کا مقابلہ کرنے کیلئے فرنٹ لائن میڈیکل اسٹاف کے شانہ بشانہ کھڑے ہیں۔
خیال رہے برطانیہ میں کوروناوائرس کےمریضوں کی تعداد1لاکھ33ہزار495 جبکہ وائرس کے باعث اموات 18ہزار100 تک جا پہنچی ہے۔
واضح رہے دنیا بھر میں کورونا سے ہلاکتیں ایک لاکھ چوراسی ہزارسے زائد ہوگئیں، مریضوں کی تعداد 26 لاکھ سے تجاوز کرگئی۔ صرف امریکا میں آٹھ لاکھ مریض ہیں جن میں سے چودہ ہزار کی حالت تشویشناک ہے، امریکا میں ہلاکتیں سینتالیس ہزارچھ سواکیاسی سے بڑھ گئیں۔
اٹلی میں پچیس ہزار، اسپین میں اکیس ہزار سات سوسترہ اور فرانس میں اکیس ہزار ہلاکتیں رپورٹ ہوچکی ہیں۔
