Tag: secret of beauty

شوبز انڈسٹری سے تعلق رکھنے والی اداکاراؤں کیلئے ان کی شخصیت اور خوبصورتی سب سے زیادہ اہمیت کی حامل ہوتی ہے جسے وہ ہر صورت برقرار رکھنا چاہتی ہیں۔ 

اپنی اسی خوبصورتی کو برقرار رکھنے کیلئے یہ اداکارائیں تمام تر جتن کرتی ہیں اور اس معاملے میں کسی قیمت پر کوئی سمجھوتہ نہیں کرتیں ان کا کہنا ہے کہ وہ ایسا کیوں نہ کریں کیونکہ آخر لوگ ہمارا چہرہ ہی تو دیکھتے ہیں۔

اسی حوالے سے اے آر وائی ڈیجیٹل کے پروگرام گڈ مارننگ پاکستان میں پاکستان شوبز کی معروف اداکاراؤں نے شرکت کی اور میزبان ندا یاسر نے ان کی خوبصورتی اور جاذبیت سے متعلق راز جاننے کی کوشش کی۔

معروف ڈرامہ آرٹسٹ امر خان نے اپنے بالوں کی صحت سے متعلق بتایا کہ میرے بال میری امی جیسے ہیں، ویسے میرا سب کو ہی مشورہ ہے کہ اپنے بالوں میں خالص سرسوں کے تیل کی مالش کریں اس سے بال گھنے اور لمبے ہوجائیں گے۔

اداکارہ اریبہ حبیب کا کہنا تھا کہ صبح منہ دھونے سے پہلے ایک چمچ شہد میں تھوڑا سا کافی پاؤڈر اور لیموں کا رس ڈال کر اس کا پیسٹ بنالیں اور چہرے پر لگا کر کچھ دیر تک رکھیں تاکہ وہ خشک ہوجائے اور اس کے بعد منہ دھولیں یہ میرا آزمودہ طریقہ ہے ایسا کرنے سے جلد بہت نرم و ملائم ہوجائے گی۔

اداکارہ عائشہ عمر نے اپنی خوبصورتی کا راز بتاتے ہوئے کہا کہ صبح منہ دھونے سے قبل ایلو ویرا (گھیکوار) کو چہرے اور ہاتھوں پر مل لیں اور تھوڑا سا کھا بھی لیں، اس کے بہت سارے فائدے ہیں اس سے جسم کا اندرونی نظام بھی بہتر رہتا ہے۔

پروگرام میں گفتگو کرتے ہوئے اداکارہ کومل عزیز نے کہا کہ میری اسکن اور بال دونوں بہت ڈرائی ہیں جب میں امریکا سے آئی تھی تو مجھے بہت پریشانی کا سامنا کرنا پڑا بعد میں کسی نے مجھے دہی اور انڈے کا پیسٹ بناکر لگانے کا مشورہ دیا جس کے بعد میں آج تک وہی طریقہ استعمال کرتی ہوں اور یہی میرے بالوں کی خوبصورتی کا راز ہے۔

اداکارہ زرنش خان نے چہرے کے گلو کیلئے بتایا کہ پکے ہوئے چاول آدھا کپ لیں اس میں چند قطرے دودھ تھوڑا سا لیموں اور شہد شامل کرکے اس کا گاڑھا سا پیسٹ بنالیں اور اسے چہرے پر لگا کر چھوڑ دیں جب وہ خشک ہوجائے تو پانی سے اچھی طرح دھو لیں، اس سے چہرے کی جلد بہت صاف و شفاف ہوجاتی ہے۔