(14 جولائی 2025) شام میں مسلح جھڑپوں کے دوران 30 سے زائد افراد لقمہ اجل بن گئے جبکہ 100 سے زائد زخمی ہوگئے۔
بین ا لاقوامی خبر رساں ادارے کی رپورٹ کے مطابق شام کے شہر سویدا میں فرقہ ورانہ جھڑپیں مقامی بدو قبائل اور دروز ملیشیا کے درمیان تصادم سے شروع ہوئیں، جس میں اب تک 30 افراد جان سے جا چکے ہیں۔
غیرملکی میڈیا کا اس حوالے سے کہنا ہے کہ فرقہ ورانہ جھڑپیں یکے بعد دیگرے کئی افراد کے اغوا پر سویدا کے دروز اکثریتی علاقے میں بدو قبائل اور دروز ملیشیا کے درمیان شروع ہوئیں۔
شامی وزارتِ داخلہ نے مسئلے کے حل کے لیے سویدا شہر میں براہِ راست مداخلت کا اعلان کردیا ہے۔
اس سے قبل امریکا اور یورپی یونین کی جانب سے پابندیوں میں نرمی کے بعد برطانیہ نے شام سے سفارتی تعلقات بحال کر لیے۔
برطانوی وزیر خارجہ ڈیوڈ لیمی نے دارالحکومت دمشق کا دورہ کیا اور شام کے عبوری صدر احمد الشرع اور وزیر خارجہ اسعد الشیبانی سے ملاقات کی۔
ڈیوڈ لیمی نے کہا برطانیہ سفارتی تعلقات اس لیے بحال کر رہا ہے کیونکہ یہ ہمارے مفاد میں ہے کہ ہم نئی حکومت کو ایک مستحکم، زیادہ محفوظ اور خوشحال مستقبل کی تعمیرکے وعدے کی تکمیل میں مدد دیں۔
اسرائیلی فوج کا پانی کی لائن میں کھڑے فلسطینی بچوں پر میزائل حملہ، 10 شہید
لیمی نے اپنے دفتر کی طرف سے جاری کردہ ایک بیان میں کہا کہ ”ایک دہائی سے زائد تنازعات کے بعد، شامی عوام کے لیے ایک نئی امید پیدا ہوئی ہے یہ 14 سالوں میں کسی برطانوی وزیر کا شام کا پہلا دورہ ہے۔ یورپی یونین نے شام پر تمام اقتصادی پابندیاں اٹھانے پر اتفاق کر لیا۔