کراچی : متحدہ قومی موومنٹ کی رابطہ کمیٹی نے حیدرآباد زون کے سابق سیکٹر انچارج ندیم قاضی کی گرفتاری کی سخت ترین الفاظ میں مذمت کرتے ہوئے اسے ایم کیو ایم کیخلاف سازش کا حصہ قرار دیا ہے۔
تفصیلات کے مطابق آج قانون نافذ کرنے والے اداروں نے بورڈ آفس حیدرآباد میں چھاپہ مار کر ندیم قاضی نامی شخص کو گرفتار کر کے نامعلوم مقام پر منتقل کردیا۔
ندیم قاضی کی گرفتاری کی مذمت کرتے ہوئے رابطہ کمیٹی نے اپنے مشترکہ بیان میں کہا ہے کہ ایک منظم سازش کے تحت کراچی اور حیدرآباد میں ایم کیو ایم کے کارکنان اور منتخب نمائندوں کو گرفتار کر کے سیاسی وفاداریاں تبدیل کرنے پر زور ڈالا جارہاہے، ندیم قاضی کی گرفتاری بھی اسی سازش کی کڑی ہے۔
اراکین رابطہ کمیٹی نے کہا کہ غیرقانونی چھاپوں اور گرفتاریوں سے ایم کیو ایم کے پر عزم کارکنوں کے حوصلے پست نہیں کیے جاسکتے۔
رابطہ کمیٹی نے وفاقی و صوبائی حکومت سے مطالبہ کیا کہ ندیم قاضی کی بلاجواز گرفتاری کا نوٹس لے کر انہیں فی الفور رہا کیا جائے اور ایم کیو ایم کے خلاف جاری سازشوں کو بند کیا جائے۔
