ARYNews.tv | Urdu – Har Lamha Bakhabar

Tag: Security forces

  • جنوبی وزیرستان میں سیکیورٹی فورسز کا آپریشن، 2 دہشت گرد ہلاک، ایک گرفتار

    جنوبی وزیرستان میں سیکیورٹی فورسز کا آپریشن، 2 دہشت گرد ہلاک، ایک گرفتار

    راولپنڈی : جنوبی وزیرستان میں سیکیورٹی فورسز نے آپریشن کرتے ہوئے 2دہشت گردوں کو ہلاک اور ایک کو زخمی حالت میں گرفتار کرلیا، ہلاک دہشت گردوں کا تعلق کالعدم ٹی ٹی پی سجنا گروپ سے ہے۔

    پاک فوج کے شعبہ تعلقات عامہ (آئی ایس پی آر )کے مطابق سیکیورٹی فورسز نے جنوبی وزیرستان کےعلاقےنرگوسا میں آپریشن کیا ، اس دوران فائرنگ کےتبادلےمیں 2دہشت گرد ہلاک ہوگئے جبکہ ایک دہشت گرد کو زخمی حالت میں گرفتار کرلیا۔

    آئی ایس پی آر کا کہنا ہے کہ ہلاک دہشت گردوں کی شناخت عثمان علی اوروحید کے نام سے ہوئی، دہشت گردوں کاتعلق کالعدم ٹی ٹی پی سجناگروپ سےہے، دہشت گرد بارودی سرنگیں بنانے اور دہشتگردوں کی تربیت کے ماہرتھے۔

    پاک فوج کے ترجمان کے مطابق دہشت گرد عثمان کیپٹن عمرچیمہ،سیکیورٹی اہلکاروں کی شہادت میں ملوث تھا۔

    یاد رہے اورکزئی کے علاقہ بلند خیل میں سکیورٹی فورسز نے کارروائی کرتے ہوئے چھ دہشت گردوں کو گرفتار کرلیا تھا اور ان کے قبضے سے بھاری تعداد میں اسلحہ بھی برآمد کیا۔

    سیکیورٹی ذرائع کے مطابق برآمد شدہ اسلحے میں 8 ہینڈ گرنیڈ، وردیاں، کلاشنکوف ودیگر سامان شامل تھا۔

    اس سے قبل سیکیورٹی فورسز نے بلوچستان کے ضلع آوران میں آپریشن کرتے ہوئے 10 دہشت گردوں کو مار ڈالا تھا۔

  • جنوبی وزیرستان : سیکیورٹی فورسز کا آپریشن، دو دہشت گرد ہلاک، دو جوان شہید

    جنوبی وزیرستان : سیکیورٹی فورسز کا آپریشن، دو دہشت گرد ہلاک، دو جوان شہید

    پاک فوج نے جنوبی وزیرستان آپریشن کے دوران مقابلے میں دو دہشت گردوں کو ہلاک کردیا، دہشت گردوں کی فائرنگ سے حوالدار اورسپاہی شہید ہوگئے۔

    پاک فوج کے شعبہ تعلقات عامہ آئی ایس پی آر کے مطابق سیکیورٹی فورسز نے جنوبی وزیرستان کے علاقے بویا میں خفیہ اطلاعات پر آپریشن کیا۔

    فورسز نے یہ آپریشن بویا کے چرخیل گاؤں میں کیا، چرخیل گاؤں میں دہشت گردوں کی موجودگی کی اطلاعات تھیں، فورسز کے آپریشن کے دوران دہشت گردوں سے مقابلہ ہوا جس کے نتیجے میں دو دہشت گرد ہلاک ہوگئے۔

    آئی ایس پی آر کے مطابق مقابلے میں فورسز کے دو اہلکار بھی شہید ہوئے، دہشت گردوں کی فائرنگ سے شہید ہونے والوں میں حوالدار شیر زمان اور سپاہی محمد جواد شامل ہیں۔

  • افغان شہر قندوز میں سیکورٹی فورسز پر خودکش حملہ ،10افراد ہلاک، متعدد زخمی

    افغان شہر قندوز میں سیکورٹی فورسز پر خودکش حملہ ،10افراد ہلاک، متعدد زخمی

    کابل : افغانستان کے شہر قندوز میں خود کش دھماکہ ہوا ہے جس کے نتیجے میں دس افراد ہلاک جبکہ متعدد کے زخمی ہونے کی اطلاعات ہیں، حملے میں قندوز پولیس چیف بھی زخمی ہوئے۔

    تفصیلات کے مطابق افغانستان کے شہر قندوز میں خود کش دھماکے میں سیکورٹی فورسزکو نشانہ بنانے کی کوشش کی گئی جس کے نتیجے میں10 افراد ہلاک جبکہ متعدد زخمی ہوگئے۔

    غیر ملکی خبررساں ادارے کے مطابق دھماکے کے نتیجے میں حملے میں قندوز پولیس چیف بھی زخمی ہوئے،افغان حکام کا کہنا ہے کہ ہلاک ہونے والے افراد میں قندوز پولیس چیف کے ترجمان بھی شامل ہیں۔

    سیکورٹی حکام کے مطابق دھماکہ حساس علاقے کے قریب ہوا، حملے کے ساتھ ہی شہر کی بجلی معطل ہو گئی اور شہری گھروں میں محصور ہو گئے جب کہ ٹیلی فونز اور رابطے کے دیگر ذرائع بھی معطل ہوگئے۔

    دھماکے کے بعد لاشوں اور زخمیوں کو اسپتال منتقل کردیا گیا، افغان سیکورٹی فورسز نے دھماکے کے بعد علاقے کی ناکہ بندی کرکے تحقیقات شروع کردی۔

    خبر رساں ادارے کے ذرائع کے مطابق افغان وزارت داخلہ کا دعویٰ ہے کہ طالبان شہری علاقوں میں پناہ گزین ہیں اس کے علاوہ کچھ شدت پسند ایک سرکاری اسپتال میں بھی موجود ہیں جس کی وجہ سے ان کے خلاف فضائی کارروائی ممکن نہیں۔

    مزید پڑھیں: کابل میں شادی کی تقریب میں دھماکہ، 63 افراد جاں بحق

    واضح رہے کہ افغانستان کے دارالحکومت کابل میں گزشتہ ہفتے خودکش بمبار نے شادی کی تقریب میں خود کو دھماکہ خیز مواد سے اڑا دیا جس کے نتیجے میں 63 افراد جان کی بازی ہار گئے تھے۔

    کابل پولیس حکام کا کہنا ہے کہ دہشت گرد حملے میں ہزارہ کمیونٹی کے افراد نشانہ بنے۔عینی شاہدین کے مطابق خودکش دھماکہ اس وقت ہوا جب شادی کی تقریب جاری تھی اور شادی ہال مہمانوں سے بھرا ہوا تھا۔

    واضح رہے کہ افغانستان میں حالات بہت کشیدہ رہے ہیں حالانکہ طالبان اور امریکہ امن معاہدے کے اعلان کے قریب پہنچ رہے ہیں طالبان اور امریکی نمائندے قطر کے دارالحکومت دوحہ میں امن مذاکرات کررہے ہیں اور فریقین نے پیشرفت کی اطلاع بھی دی ہے۔

  • بلوچستان میں سیکیورٹی فورسز کی کارروائی، بھاری مقدار میں گولہ بارود برآمد

    بلوچستان میں سیکیورٹی فورسز کی کارروائی، بھاری مقدار میں گولہ بارود برآمد

    اسلام آباد: پاک فوج کے شعبہ تعلقات عامہ (آئی ایس پی آر) کا کہنا ہے کہ بلوچستان میں سیکیورٹی فورسز کی جانب سے کارروائی کی گئی جس میں بھاری مقدار میں گولہ بارود، راکٹ، بارودی سرنگیں اور مارٹر گولے برآمد کیے گئے۔

    تفصیلات کے مطابق پاک فوج کے شعبہ تعلقات عامہ (آئی ایس پی آر) کا کہنا ہے کہ آپریشن رد الفساد کے تحت سیکیورٹی فورسز نے بلوچستان میں کارروائی کی۔ خفیہ اطلاعات پر کی جانے والی کارروائی سبی اور کوہلو کے درمیان بھمبر کی پہاڑیوں پر کی گئی۔

    آئی ایس پی آر کا کہنا ہے کہ کارروائی کے دوران بھاری مقدار میں گولہ بارود، راکٹ، بارودی سرنگیں اور مارٹر گولے برآمد کیے گئے۔

    خیال رہے کہ چند روز قبل ہی بلوچستان کے علاقے لورالائی میں سیکیورٹی فورسز کی کارروائی میں 2 خودکش بمباروں سمیت 4 دہشت گرد ہلاک ہوگئے تھے۔

    لورالائی میں سیکیورٹی فورسز نے خفیہ معلومات پر آپریشن کیا تھا جس میں 2 خودکش بمباروں سمیت 4 دہشت گرد ہلاک ہوگئے تھے۔ آئی ایس پی آر کے مطابق کارروائی میں بلوچستان میں حالیہ دہشت گردی کا ماسٹر مائنڈ بھی ہلاک ہوا۔

    ہلاک دہشت گردوں سے بھاری مقدار میں گولہ بارود بھی برآمد کیا گیا۔ آپریشن کے دوران 4 سیکیورٹی اہلکار بھی معمولی زخمی ہوئے۔

  • پی ایس ایل میں شاندار کامیابی پر وزیراعظم عمران خان کی کوئٹہ گلیڈی ایٹرزکومبارکباد

    پی ایس ایل میں شاندار کامیابی پر وزیراعظم عمران خان کی کوئٹہ گلیڈی ایٹرزکومبارکباد

    اسلام آباد : وزیراعظم عمران خان نے پی سی بی منتظمین اور سیکیورٹی فورسز کو پی ایس ایل کے انعقاد اور شاندار کامیابی پر کوئٹہ گلیڈی ایٹرز کو مبارکباد دیتے ہوئے کہا انشاللہ اگلاپورااپی ایس ایل پاکستان میں ہوگا۔

    تفصیلات کے مطابق وزیراعظم عمران خان نے سماجی رابطے کی ویب سائٹ ٹوئٹر پر اپنے پیغام میں پی سی بی منتظمین اور سیکیورٹی فورسز کو پاکستان میں پی ایس ایل کے انعقاد پر مبارکباد دی۔

    وزیراعظم نے کہا کوئٹہ گلیڈی ایٹرز ، ان کے منیجر اور میرے دوست ویوین رچرڈ کو شاندارجیت پر مبارکباد دیتا ہوں، انشاللہ اگلا پورا اپی ایس ایل پاکستان میں ہوگا۔

    یاد رہے آرمی چیف جنرل قمر جاوید باجوہ نے پی ایس ایل فائنل کے کامیاب انعقاد پر سیکیورٹی اداروں، ٹیموں اور کراچی کے عوام کو مبارک باد پیش کرتے ہوئے کہا ہے تھا کہ اللہ کے فضل و کرم سے یہ ممکن ہوا، اللہ پاکستان کو اپنی رحمتوں کے سائے میں رکھے اور اللہ ہمیشہ پاکستان پر اپنی نعمتیں نازل کرتا رہے، آمین

    مزید پڑھیں : پی ایس ایل کا کامیاب انعقاد، اللہ ہمیشہ پاکستان پر اپنی نعمتیں نازل کرتا رہے، آرمی چیف

    واضح رہے کہ پی ایس ایل فائنل میچ میں کوئٹہ گلیڈی ایٹرز کی ٹیم نے پشاور زلمی کو 8 وکٹوں سے شکست دے کر پی ایس ایل سیزن فور کا ٹائٹل اپنے نام کرلیا ہے۔

    خیال رہے کہ پاکستان سپر لیگ سیزن فور کے آٹھ میچز کراچی میں کھیلے گئے، غیرملکی کھلاڑیوں نے بھی پاکستان کو پر امن ملک قرار دیا اور کراچی میں کھیلے جانے والے میچز میں شرکت کی ، پی ایس ایل میچز کے دوران سیکیورٹی کے سخت انتظامات کیے گئے تھے۔

    اس سے قبل وزیراعظم پاکستان عمران خان نے اعلان کیا ہے کہ آئندہ سال پی ایس ایل کے تمام میچز پاکستان میں کھیلے جائیں گے۔

  • جنوبی وزیرستان میں دہشت گردی کی بڑی کارروائی ناکام، تین دہشت گرد ہلاک

    جنوبی وزیرستان میں دہشت گردی کی بڑی کارروائی ناکام، تین دہشت گرد ہلاک

    جنوبی وزیرستان : آپریشن ردالفساد کے تحت سیکیورٹی فورسز نے جنوبی وزیرستان میں دہشت گردی کی بڑی کارروائی ناکام بنادی، مقابلے کے دوران تین دہشت گردوں کو ہلاک کرکے اسلحہ برآمد کرلیا۔

    پاک فوج کے شعبہ تعلقات عامہ آئی ایس پی آر کے مطابق دہشت گردوں کے خلاف سیکیورٹی فورسز کا آپریشن ردالفساد ملک بھر میں کامیابی سے جاری ہے، سیکیورٹی فورسز کے جانباز اہلکاروں نے خیبر پختونخوا کو ممکنہ طور پر بڑی دہشت گردی سے بچا لیا۔

    سیکیورٹی فورسز نے خفیہ اطلاع پر جنوبی وزیرستان کے سرحدی علاقے میں انٹیلی جنس بیسڈ آپریشن کیا، آئی ایس پی آر کا کہنا ہے کہ دہشت گردوں نے فورسز کو دیکھتے ہی فائرنگ شروع کر دی، اس دوران دہشت گردوں نے قریبی پہاڑوں پر فرار ہونے کی کوشش کی، فورسز کی جوابی کارروائی میں تین دہشت گرد مارے گئے، ہلاک شدگان سے اسلحہ بھی برآمد ہوا ہے۔

    یاد رہے چند روز قبل سیکورٹی فورسز نے لورالائی میں ایف سی کے تربیتی مرکز کے رہائشی علاقے پر حملے کی کوشش نا کام بنا دی تھی، جس میں چار دہشت گرد ہلاک جب کہ چار اہلکار شہید ہو گئے تھے، شہید ہونے والے جوانوں میں صوبیدار میجر منور، حولدار اقبال، حولدار بلال اور سپاہی نقشب شامل تھے۔

    اس سے قبل ستمبر میں سیکیورٹی فورسز نے بلوچستان میں انٹیلی جنس بیسڈ آپریشن کیا تھا، جس کے نتیجے میں لشکر جھنگوی اور داعش کے 3 انتہائی مطلوب دہشت گرد مارے گئے تھے ۔

    واضح رہے کہ ماضی میں بلوچستان میں کارروائیوں کے دوران بڑی مقدار میں دھماکہ خیز مواد اور اسلحہ برآمد کیا جا چکا ہے جب کہ ایف سی متعدد دہشت گردوں کو گرفتار بھی کرچکی ہے۔

  • سیکیورٹی فورسز کی کارروائی میں دہشت گرد ہلاک، بھاری اسلحہ برآمد

    سیکیورٹی فورسز کی کارروائی میں دہشت گرد ہلاک، بھاری اسلحہ برآمد

    اسلام آباد: پاک فوج کے شعبہ تعلقات عامہ آئی ایس پی آر کا کہنا ہے کہ شمالی وزیرستان اور قلعہ عبداللہ میں فورسز کی کارروائی میں ایک دہشت گرد ہلاک ہوگیا۔

    تفصیلات کے مطابق پاک فوج کے شعبہ تعلقات عامہ آئی ایس پی آر کا کہنا ہے کہ شمالی وزیرستان کے علاقے اسپین وام میں برکلے گاؤں میں آپریشن رد الفساد کیا گیا۔

    آپریشن کے دوران ایک دہشت گرد ہلاک ہوگیا۔ آئی ایس پی آر کے مطابق آپریشن میں آئی ای ڈیز بنانے کا مواد، ایس ایم جی، ہینڈ گرینیڈز، مواصلاتی آلات اور ممنوعہ لٹریچر بھی برآمد کیے گئے۔

    آئی ایس پی آر کا کہنا ہے کہ فرنٹیئر کورپس (ایف سی) بلوچستان نے خفیہ اطلاع پر بلوچستان کے قلعہ سیف اللہ اور کاہان میں بھی کارروائی کی۔ کارروائی میں امن سبوتاژ کرنے کی سرگرمی ناکام بنادی گئی۔

    ایف سی نے کارروائی میں اسلحہ اور گولیاں برآمد کرلیں۔

    خیال رہے کہ چند دن قبل بلوچستان کے علاقے لورالائی میں سیکورٹی فورسز نے ایف سی کے تربیتی مرکز کے رہائشی علاقے پر حملے کی کوشش نا کام بنا دی تھی۔

    لورالائی میں دہشت گردوں نے فرنٹیئر کانسٹبلری کے تربیتی مرکز کو نشانہ بنایا تھا تاہم سیکورٹی فورسز کی بروقت کارروائی میں 4 دہشت گرد ہلاک ہو گئے۔

    دہشت گردوں کے حملے میں سیکورٹی فورسز کے 4 جوانوں نے بھی جام شہادت نوش کیا۔

  • شمالی وزیرستان : دہشت گردوں کا فورسز پر حملہ، افسر سمیت 3 اہلکار شہید، ایک زخمی

    شمالی وزیرستان : دہشت گردوں کا فورسز پر حملہ، افسر سمیت 3 اہلکار شہید، ایک زخمی

    شمالی وزیرستان : رزمک سب ڈویژن کے علاقے روغہ بدر میں دہشت گردوں نے فورسز پر حملہ کردیا، حملے میں ایک افسر سمیت 3 اہلکار شہید اور ایک زخمی ہوگیا۔

    تفصیلات کے مطابق شمالی وزیرستان میں نامعلوم دہشت گروں کے ایک گروپ نے ڈیوٹی پر موجود سکیورٹی فورسز اہلکاروں پر خود کار ہتھیاروں سے حملہ کردیا، یہ حلمہ رزمک سب ڈویژن کے علاقے روغہ بدر میں کیا گیا۔

    حملے کے نتیجے میں ایک افسر سمیت تین اہلکار موقع پر شہید ہوگئے جبکہ فائرنگ سے ایک اہلکار زخمی بھی ہوا، شہیدوں کی لاشوں اور زخمی اہلکار کو ہیلی کاپٹر کے ذریعے فوجی اسپتال منتقل کیا گیا، جہاں زخمی اہلکار کو طبی امداد فراہم کی جارہی ہے۔

    اس حوالے سے اے آر وائی نیوز کے نمائندے حاجی پذیر گل کے مطابق سکیورٹی فورسز نے علاقے کو فوری طور پر گھیرے میں لے کر سرچ آپریشن شروع کردیا ہے۔

  • افغانستان: سیکیورٹی فورسز کے بیس کیمپ پر طالبان کا حملہ،45 اہلکار ہلاک

    افغانستان: سیکیورٹی فورسز کے بیس کیمپ پر طالبان کا حملہ،45 اہلکار ہلاک

    کابل افغانستان کے صوبے بغلان میں سیکیورٹی فورسز کے بیس کیمپ پر طالبان نے حملہ کیا ہے جس کے نتیجے میں درجنوں سیکیورٹی فورسز کے اہلکار جاں بحق ہوئے ہیں۔

    تفصیلات کے مطابق افغانستان کے شمالی صوبے بغلان میں آج دوپہر سیکیورٹی اداروں کی عبداللہ بیس کیمپ پر طالبان کے شدت پسندوں کی جانب سے حملہ کیا گیا ہے جس کے نتیجے میں 45 سیکیورٹی اہلکار ہلاک ہوئے ہیں۔

    افغان حکام کا کہنا تھا کہ طالبان کے حملے میں 35 افغانستان کی مسلح افواج کے اہلکار جبکہ 10 مقامی پولیس اہلکار ہلاک ہوئے ہیں۔

    غیر ملکی خبر رساں ادارے کا کہنا تھا کہ افغان حکام کی جانب سے طالبان حملے اور  واقعے میں 45 سیکیورٹی اہلکاروں کے جاں بحق ہونے کی تصدیق کردی گئی ہے جبکہ زخمیوں کے حوالے سے تفصیلات نہیں بتائی گئی۔

    افغان میڈیا کا کہنا ہے کہ گذشتہ شب افغانستان کے صوبے قندھار میں ڈسٹرکٹ ہیڈکوارٹر اسپین بولدک کے قریب ایک گاڑی پر امریکی ڈورن طیاروں نے بمباری کی ہے، گاڑی پر ڈرون حملے کے نتیجے میں 2 مشتبہ افراد ہلاک ہوئے ہیں۔

    غیر ملکی خبر رساں ادارے کا کہنا تھا کہ ریسکیو ادارے کے اہلکاروں نے حملے میں ہلاک ہونے والے افراد کی لاشوں کو قریبی اسپتال منتقل کردیا گیا ہے جبکہ ڈرون حملے کا نشانہ بننے والی گاڑی مکمل طور پر تباہ ہوگئی ہے۔

    افغان خبر رساں اداروں کا کہنا ہے کہ گاڑی پر امریکی ڈرون حملے بعد مغربی اتحادی افواج نیٹو اور افغان فورسز کی جانب سے افغانستان کے سرحدی علاقوں کا سرچ آپریشن بھی کیا گیا تھا۔

    یاد رہے کہ ایک روز قبل افغانستان کے دارالحکومت کابل میں ایک خودکش بمبار نے الیکشن کمیشن کی عمارت میں گھسنے کی کوشش کی اور مرکزی دروازے پر سیکیورٹی اہلکاروں کی جانب سے روکے جانے پر خود کو دھماکے سے اڑا لیا جس کے نتیجے میں ایک پولیس اہلکار ہلاک اور کئی زخمی ہوئے تھے۔

  • عازمین حج کی خدمت کے لیے ہر ممکن کوشش کریں گے، جنرل القحطانی

    عازمین حج کی خدمت کے لیے ہر ممکن کوشش کریں گے، جنرل القحطانی

    ریاض : جنرل سعید القحطانی نے کہا ہے کہ سیکیورٹی فورسز نے مدینہ منورہ، مکۃ المکرمہ اور دیگر مقامات مقدسہ سمیت حج سے متعلق علاقوں میں سیکیورٹی کا آغاز کردیا ہے اور حجاج کرام کی حفاظت کے لیے تمام وسائل کو برائے کار لائیں گے۔

    تفصیلات کے مطابق سعودی عرب میں حج مناسک کی ادائیگی کے لیے آنے والے عازمین کی سیکیورٹی اور مقامات مقدسہ کی حفاظت کے لیے بنائی گئی ایمرجنسی سیکیورٹی فورس کی صلاحیتوں کا گذشتہ روز عملی مظاہرہ کیا گیا جس میں مملکت کے وزیر داخلہ و سپریم حج کمیٹی کے سربراہ شہزادہ عبد العزیز بن سعود نے خصوصی شرکت کی۔

    غیر ملکی خبر رساں ادارے کا کہنا تھا کہ سعودی عرب کے وزیر داخلہ شہزادہ عبدالعزیز بن سعود سیکیورٹی فورسز کی تیارتی کا جائزہ لینے ایمرجنسی سیکیورٹی فورس کے مرکز پہنچے تو مکہ المکرمہ کے نائب گورنر شہزادہ عبداللہ بن بندر سمیت دیگر حکام نے وزیر داخلہ کا استقبال کیا۔

    غیر ملکی میڈیا سے گفتگو کرتے ہوئے حج سیکیورٹی کونسل کے سربراہ جنرل سعید القحطانی کا کہنا تھا کہ سیکیورٹی فورسز نے مدینہ منورہ اور مکہ مکرمہ اور دیگر مقامات سمیت حج مناسک سے متعلق تمام راستوں اور علاقوں میں حفاظتی سرگرمیوں کا آغاز کردیا ہے۔

    جنرل سعید القحطانی کا کہنا تھا کہ سعودی عرب کی عوام اور حکام شاہ سلمان بن عبدالعزیز کی سربراہی میں اللہ کے مہمانوں کی راحت و آرام کےلیے تمام اشیاء کی فراہمی کے لیے کوشاں ہے۔

    غیر ملکی خبر رساں ادارے کا کہنا تھا کہ  حج سیکیورٹی کمیٹی کے سربراہ کا مؤقف تھا کہ حج کی ادائیگی کے سعودیہ آنے والے حجاج کرام کی حفاظت و سلامتی کےلیے تمام تر وسائل کو برائے کار لایا جائے گا۔

    غیر  ملکی خبر رساں ادارے کا کہنا تھا کہ سعودی وزیر داخلہ شہزدہ عبدالعزیز بن سعود کی ایمرجنسی فورس کے مرکز پہنچنے کے بعد سیکیورٹی فورسز کے اہلکاروں، عسکری گاڑیوں اور طیاروں نے کسی بھی ہنگامی صورتحال سے نمٹنے کے لیے اپنی پیشہ ورانہ صلاحتیوں کا عملی مظاہرہ کیا۔