ARYNews.tv | Urdu – Har Lamha Bakhabar

Tag: security guard

  • ریاض: اسپتال کے سیکیورٹی گارڈ کے لیے وزیر صحت کا تحفہ

    ریاض: اسپتال کے سیکیورٹی گارڈ کے لیے وزیر صحت کا تحفہ

    ریاض: سعودی دارالحکومت ریاض کے ایک اسپتال میں تعینات سیکیورٹی گارڈ کی فرض شناسی نے حکام کو بھی متاثر کردیا، سعودی وزیر صحت کی جانب سے گارڈ کو تعریفی خط موصول ہوا۔

    سعودی ویب سائٹ کے مطابق سعودی وزیر صحت ڈاکٹر توفیق الربیعہ نے ریاض کے ایک اسپتال میں فرض شناس سیکیورٹی گارڈ کو یادگاری تحفہ اور شکریے کا خط پیش کر کے سرپرائز دیا ہے۔

    سیکیورٹی گارڈ کو دیے گئے خط میں اس کے اخلاص اور ڈیوٹی کی غیر معمولی پابندی کی ستائش کی گئی ہے۔

    وزیر صحت نے خط میں لکھ کہ رفیق کار محمد الحارثی آپ کی حسن کارکردگی، ایثار، آنے جانے والے افراد کا خیر مقدم، عالی ہمتی، خوش گفتاری اور مسکرا کر استقبال کرنا سب کو اچھا لگ رہا ہے۔ میں سب کی جانب سے آپ کا شکریہ ادا کرتا ہوں اور آپ کے لیے ممنونیت اور قدر و منزلت کے جذبات رکھتا ہوں۔

    وزارت صحت کے ایک عہدیدار نے وزیر صحت کی جانب سے تحفہ اور توصیفی سند الحارثی کو پیش کیا ہے۔

    سیکیورٹی گارڈ کی حسن کارکردگی کی رپورٹ وزارت صحت کے ایک اعلیٰ عہدیدار نے دی تھی جنہیں اسپتال میں مختلف لوگوں کی کارکردگی کا جائزہ لینے کے لیے بھیجا گیا تھا۔

  • سعودی عرب : 5 سکیورٹی گارڈ اور10لاکھ ریال کی چوری، بھانڈا پھوٹ گیا

    سعودی عرب : 5 سکیورٹی گارڈ اور10لاکھ ریال کی چوری، بھانڈا پھوٹ گیا

    ریاض : سعودی پولیس نے دس لاکھ ریال کی چوری میں ملوث6ملزمان کو واردات کے کچھ ہی دیر بعد ڈرامائی انداز میں گرفتار کرلیا، گرفتار شدگان میں سیکیورٹی گارڈ بھی شامل ہیں۔

    سعودی خبر رساں ادارے کے مطابق خمیس مشیط میں اے ٹی ایم میں رقوم منتقل کرنے والے ادارے کے5 سیکیورٹی گارڈز نے دس  لاکھ ریال چوری کرنے کا ڈرامہ رچایا جو زیادہ دیر نہ چل سکا۔

    سعودی پریس ایجنسی کا کہنا ہے کہ عسیر ریجن پولیس کے ترجمان لیفٹیننٹ کرنل زید الدباش نے تفصیلات سے آگاہ کرتے ہوئے میڈیا کو بتایا ہے کہ گرفتار شدگان کی کل تعداد 6 ہے جن میں سے5سیکیورٹی گارڈ ہیں۔

    مذکورہ پانچوں افراد کے منصوبے کے مطابق اے ٹی ایم مشین کے اندر10 لاکھ ریال منتقل کرنے کے دوران چوری کا واقعہ ہونا تھا جس میں چور کا کردار ان کے ایک دوست کے ذمے تھا۔

    انہوں نے بتایا کہ گزشتہ روز شام 4 بج کر 50 منٹ پر پولیس کو واقعے کی اطلاع ملی، تفتیشی ٹیم نے واقعے کا جائزہ لینا شروع کیا تو بہت جلد ہی یہ انکشاف ہوگیا کہ یہ چوری کا واقعہ محض ڈرامے کے سوا کچھ نہیں۔

    پولیس نے پانچوں سیکیورٹی اہلکاروں کو گرفتار کرلیا اور پوچھ گچھ کے بعد کچھ ہی دیر میں ان کے دوست ملزم کا پتہ لگالیا جو رقم چوری کرکے فرار ہوگیا تھا، مفرور شخص کو جدہ پولیس کے تعاون سے گرفتار کیا گیا ہے جبکہ ملزم سے چوری کی جانے والی پوری رقم بھی برآمد کرلی گئی ہے۔

  • نظر ہٹتے ہی بچہ اغوا، دل دہلا دینے والی ویڈیو

    نظر ہٹتے ہی بچہ اغوا، دل دہلا دینے والی ویڈیو

    کیپ ٹاؤن: جنوبی افریقہ کے شہر ڈربن میں 2 سالہ بچے کو پاس ہی موجود دادی کی نظر بچا کر اغوا کرلیا گیا۔

    یہ افسوسناک واقعہ ڈربن کی ایک سپر مارکیٹ میں پیش آیا، حیرت انگیز بات یہ ہے کہ اغوا کار کوئی اور نہیں بلکہ مارکیٹ کا سیکیورٹی گارڈ تھا۔

    سی سی ٹی وی فوٹیج میں دیکھا جاسکتا ہے کہ دادی 2 سالہ بچے کے بالکل قریب ہی کھڑی ہیں تاہم ان کی نظر دوسری طرف ہے۔ یونیفارم میں ملبوس سیکیورٹی گارڈعام سے انداز میں چلتا ہوا آتا ہے اور بچے کے پاس رک کر اسے بہلانے کے بعد گود میں اٹھا کر چلتا بنتا ہے۔

    دادی کافی دیر بعد پلٹ کر دیکھتی ہیں اور پوتے کو غائب پا کر چلانا شروع کردیتی ہیں۔ اس دوران وہ باہر کی جانب جاتی ہیں اور انہیں گارڈ کی گود میں اپنا پوتا دکھائیدے جاتا ہے جس کے بعد وہ اسے جھپٹ کر واپس لے لیتی ہیں۔

    اس دوران مارکیٹ انتظامیہ نے پولیس کو بھی اطلاع دے دی جس نے فوراً موقع پر پہنچ کر گارڈ کو حراست میں لے لیا۔

    پولیس کا کہنا ہے کہ فی الوقت ملزم کے عزائم نامعلوم ہیں کہ اس نے بچے کو اغوا کیوں کیا۔

    پولیس نے شہریوں کو متنبہ کیا ہے کہ کرسمس میں رش کے باعث باہر جاتے ہوئے اپنے بچوں پر کڑی نگاہ رکھیں تاکہ ایسے واقعات سے بچا جاسکے۔

  • پشاور : پی آئی اے کے سیکورٹی گارڈ پر تشدد کرنے والے ملزم کیخلاف مقدمہ درج

    پشاور : پی آئی اے کے سیکورٹی گارڈ پر تشدد کرنے والے ملزم کیخلاف مقدمہ درج

    پشاور : پی آئی اے نے اکنامک زون ڈیولپمنٹ اینڈ منیجمنٹ کمپنی کے ملازم کے خلاف مقدمہ درج کرادیا، ملزم نے پی آئی اے کے سیکورٹی گارڈ کے روکنے پر اس پر تشدد کیا تھا۔

    تفصیلات کے مطابق پشاور میں پی آئی اے کی مقامی انتظامیہ نے خیبر پختونخواہ اکنامک زون ڈیولپمنٹ اینڈ منیجمنٹ کمپنی کے ملازم کے خلاف پی آئی اے کے پشاور صدر میں واقع دفتر میں سیکورٹی پر معمور پی آئی اے کے سیکورٹی گارڈ کی جانب سے دفتر میں زبردستی داخل ہونے سے روکنے پر سیکورٹی گارڈ کو تشدد کا نشانہ بنانے پر ایف آئی آر درج کرادی گئی ہے۔

    سرحد ڈیولپمنٹ اتھارٹی گزشتہ کئی برس سے پی آئی اے کی کرایہ دار ہے۔ معاہدہ کرایہ داری ختم ہونے کے بعد پی آئی اے کی جانب سے دفتر خالی کرنے کے لئے متعدد نوٹس دیئے گئے لیکن مذکورہ اتھارٹی ان کی تعمیل نہیں کر رہی۔

    گزشتہ روز ان کی جانب سے غیر قانونی طور پر دفتر کی تزئین و آرائش کے لئے سامان سے لدے ٹرک منگوائے گئے جن کو روکا گیا جس کے بعد انہوں نے ڈیوٹی پر موجود سیکورٹی گارڈ کو جسمانی تشدد کا نشانہ بنایا۔

    اس حوالے ترجمان پی آئی اے نے واقعہ کی تصدیق کرتے ہوئے بتایا کہ واقعہ کی رپورٹ متعلقہ ایجنسیوں کو کر دی گئی ہے اور اس واقعہ پر قانون کے مطابق کارروائی عمل میں لائی جائے گی۔

  • بہادر سیکیورٹی گارڈ نے زخمی ہونے کے باوجود ڈکیتی کی کوشش ناکام بنا دی

    بہادر سیکیورٹی گارڈ نے زخمی ہونے کے باوجود ڈکیتی کی کوشش ناکام بنا دی

    مرید کے : بہادر سیکیورٹی گارڈ نے ڈکیتی کی کوشش ناکام بنا دی، ایک ڈاکو زخمی کر دیا، سیکیورٹی گارڈ نے ڈاکوؤں سے مار بھی کھائی لیکن کچھ لوٹنے نہ دیا، ڈاکو خالی ہاتھ فرار ہوگئے، زخمی سیکیورٹی گارڈ اسپتال پہنچا دیا گیا۔

    تفصیلات کے مطابق پنجاب کے علاقے مرید کے کی ایک دکان میں ڈاکو دیدہ دلیری کے ساتھ آئے، برقع پوش سمیت چار لُٹیروں نے الیکٹرانکس شاپ کے عملے کو یرغمال بنالیا اور دکان لوٹنے کی کوشش کی۔

    اس دوران دکان کے سیکیورٹی گارڈ نے ڈاکوؤں پر فائرنگ کردی جس سے ایک ڈاکو زخمی ہوگیا۔ فوٹیج میں دیکھا جاسکتا ہے کہ ڈاکوؤں کے ایک ساتھی کا ہاتھ زخمی ہوا۔

    ڈاکوؤں نے کچھ لوٹنے کے بجائے گارڈ پر بری طرح تشدد کیا اور دکان سے کچھ لوٹنے کے بجائے جان بچانے کیلئے گارڈ کی بندوق لے کر فرار ہوگئے۔

    ڈکیتی کے دوران دکان میں موجود خاتون بچے اور دیگر عملے نے میز کے پیچھے چھپ کر جان بچائی، ڈکیتی ناکام بنانے والے زخمی سیکیورٹی گارڈ کو طبی امداد کیلئے ٹی ایچ کیو اسپتال منتقل کردیا گیا ہے، پولیس نے ابتدائی رپورٹ درج کرکے ملزمان کی تلاش شروع کردی ہے۔

  • سعودی ولی عہد محمد بن سلمان کی سیکیورٹی کیلئے 123 شاہی محافظ پاکستان پہنچ گئے

    سعودی ولی عہد محمد بن سلمان کی سیکیورٹی کیلئے 123 شاہی محافظ پاکستان پہنچ گئے

    اسلام آباد: سعودی ولی عہد محمدبن سلمان کی سیکیورٹی کے لئے 123 شاہی محافظ پاکستان پہنچ گئے، شاہی محافظ ولی عہد کی سیکیورٹی پر مامور رہیں گے اور اسلام آباد کے 8 ہوٹلوں کی نگرانی بھی سعودی شاہی محافظ کریں گے۔

    تفصیلات کے مطابق سعودی ولی عہد محمدبن سلمان کے دورۂ پاکستان کی تیاریاں مکمل کرلیں گئیں ہیں ، محمد بن سلمان کی سیکیورٹی کیلئے 123 شاہی محافظ پاکستان پہنچ گئے ہیں ، سعودی شاہی محافظ ولی عہد کی سیکورٹی پر ماموررہیں گے۔

    [bs-quote quote=” وزیراعظم ہاؤس میں سعودی شہزادے کیلئے جم تیار کر دیا گیا” style=”style-7″ align=”left”][/bs-quote]

    ذرائع کا کہنا ہے اسلام آباد کے8 ہوٹلوں کی نگرانی بھی سعودی شاہی محافظ کریں گے، وزیراعظم ہاؤس میں سعودی شہزادے کیلئے جم تیار کر دیا گیا، ولی عہد کے ساتھ سعودی شہزادے اور شاہی خاندان کے اراکین ہوں گے۔

    وزیراعظم ہاؤس اور 8 نجی ہوٹلوں کی سیکیورٹی سخت کی جائے گی اور 300 سے زائد گاڑیاں شاہی خاندان کے زیراستعمال رہیں گی۔

    اس سے قبل سعودی سفارت خانہ کی جانب سے بیان میں کہا گیا تھا سعودی علی عہد محمد بن سلمان 16 سے 17 فروری تک دورہ کریں گے، اس دورے کے دوران پاکستان اور سعودی عرب میں بیس ارب ڈالر کے معاہدے ہوں گے۔

    مزید پڑھیں : سعودی ولی عہد محمد بن سلمان کے دورہ پاکستان سے متعلق اہم تفصیلات سامنے آ گئیں

    ذرائع کا کہنا تھا سعودی ولی عہد وزیراعظم ہاؤس میں قیام کریں گے، سعودی ولی عہد دورہ پاکستان کے بعد کوالالمپور روانہ ہوں گے۔

    سعودی سفارت خانہ کے مطابق سعودی ولی عہد کا دورہ پاکستان دونوں ممالک کے لیے ایک نئے دور کا آغاز ہوگا اور بیس ارب ڈالر کی سرمایہ کاری پاکستان آئے گی۔

    دوسری جانب سعودی ولی عہد محمد بن سلمان کے دورہ پاکستان کے حوالے سے شاہی مہمان کے استقبال کی تیاریاں عروج پر پہنچ گئی ہیں، ولی عہد کی آمد پر وزیراعظم عمران خان ارکان کابینہ کے ہمراہ استقبال کریں گے۔

    ذرائع کے مطابق سعودی ولی عہد اور شاہی مہمانوں کے لئے قیام و طعام کے مختلف آپشنز پر غور کیا جا رہا ہےاور دارالحکومت میں تھری لئیر سکیورٹی انتظامات کو حتمی شکل دی جا رہی ہے جبکہ ولی عہد کی ذاتی سیکیورٹی ٹیم آج انتظامات کا حتمی جائزہ لے گی۔

    وزارت خزانہ ،دفترخارجہ اور پی ایم آفس متوقع معاہدوں کی تیاری میں مشغول ہے۔

  • گارڈ کی فائرنگ سے زخمی ہونے والا پینگولین ہلاک ہوگیا

    گارڈ کی فائرنگ سے زخمی ہونے والا پینگولین ہلاک ہوگیا

    کراچی : گزشتہ دنوں کراچی سے ملنے والے پینگولین کو ہلاک کرنے کے واقعے کا سندھ وائلڈ لائف نے نوٹس لے لیا۔

    تفصیلات کے مطابق زمزمہ کلفٹن میں گزشتہ روز ایک پلاٹ سے نکلنے والے پینگولین کو سیکیورٹی گارڈ نے پانچ گولیاں مار کر شدید زخمی کردیا تھا، جو دوران علاج ہلاک ہوگیا۔

    سکیورٹی گارڈ کا کہنا تھا کہ مذکورہ جانورمجھ پر حملہ کررہا تھا جس کی وجہ سے مجھے اپنے دفاع میں گولی چلانا پڑی.

    پاکستان اینمل ویلفیئر سوسائٹی کی ڈائریکٹر اورکو فاؤنڈرماہرہ عمر کا کہنا تھا کہ ایک شخص نے سوشل میڈیا پر اس واقعے کی پوسٹ تصاویر کے ساتھ شائع کی جس پر ایکشن لیتے ہوئے انہوں نے ڈاکٹر علی ایاز کو فوری طور پر ہدایات جاری کیں کہ مذکورہ پینگولین کو طبی امداد فراہم کی جائے.

    ڈاکٹر علی ایاز اس کو اپنے کلینک لے آئے اور اس کاعلاج کیا مگروہ جانبرنہ ہوسکا، پینگولین کو تین گولیاں پیٹ میں اور دو اس کی ٹانگ میں لگیں.

    سندھ وائلڈ لائف کے عہدیداران نے متعلقہ حکام سے مطالبہ کیا ہے کہ واقعے کی تحقیقات کی جائیں اور ذمہ داران کیخلاف قانونی کارروائی کی جائے.

    واضح رہے کہ پینگولین دنیا بھر میں سب سے زیادہ اسمگل کیا جانے والا ایک نایاب نسل کا جانور ہے اور اس کی نسل ناپید ہوتی جا رہی ہے.

    پینگولین کا سائز تین فٹ کے لگ بھگ ہوتا ہے پاک و ہند میں پایا جانے والا پینگولن ایک بے ضرر اور نایاب جانور ہے جس کی نسل ختم ہونے کے قریب ہے۔

    یہ چیونٹی خور جانوروں کی نسل سے تعلق رکھنے والا معصوم سا جانور ہے، پینگولین محض کیڑے مکوڑے دیمک اور چیونٹیاں کھاتا ہے۔

    اس کی لمبی تھوتنی اور باریک لمبی زبان ہوتی ہے، جسم پر سخت چھلکے ہوتے ہیں۔ خطرے کے وقت وہ خود کو گیند کی طرح لپیٹ لیتا ہے۔

    پاکستان میں لوگ اپنی لاعلمی کی وجہ سے اس نایاب نسل کے جانور کو خوفناک بلا سمجھ کر ہلاک کردیتے ہیں۔

  • وزیر اعلی سندھ نے 6 لاکھ اسلحہ لائسنس منسوخ کرنے کا اعلان کردیا

    وزیر اعلی سندھ نے 6 لاکھ اسلحہ لائسنس منسوخ کرنے کا اعلان کردیا

    کراچی: سندھ میں دس لاکھ اسلحہ لائسنس کا اجرا ہوا، چھ لاکھ اسلحہ لائسنسوں کا ریکارڈ نہیں ملا،وزیراعلٰی نے منسوخی کااعلان کردیا۔

    کراچی میں ٹارگٹ کلرز کا راج جاری ہے، آئے دن گلی محلوں میں فائرنگ کے واقعات اور ہلاکتیں اور ان حالات میں وزیر اعلی سندھ کی زیرصدارت اجلاس میں یہ اعتراف کیا گیا کہ سندھ میں جاری ہونے والے چھے لاکھ اسلحہ لائسنس کا کوئی ریکارڈ نہیں ۔

    وزیر اعلی سندھ کی زیرصدارت اجلاس میں جب چھے لاکھ اسلحہ لائسنس کی تصدیق نہ ہونے کا اعلان کیا گیا تووزیر اعلی سندھ نے غیر تصدیق شدہ لائسنس منسوخ کرنے کا حکم صادر کردیا ۔

    دوسری جانب وزیر اعلی سندھ  سید قائم علی شاہ نے قانون نافذ کرنے والے اداروں کو کراچی آپریشن میں تیزی لانے کی ہدایت بھی کردی۔

  • نجی سیکیورٹی گارڈزکےاسلحہ لائسنس کی چیکنگ کا عمل جاری

    نجی سیکیورٹی گارڈزکےاسلحہ لائسنس کی چیکنگ کا عمل جاری

    کراچی : نجی سیکورٹی گارڈزکےاسلحہ لائسنس چیک کئے جارہے ہیں۔ پولیس اہلکاربڑی بڑی گاڑیوں سےسیکورٹی گارڈز کواتارکرلائسنس چیک کررہے ہیں۔

    کالےشیشےوالی گاڑیاں بھی روکی جارہی ہیں۔ کراچی میں پولیس کوخیال آہی گیا کہ نجی سیکورٹی گارڈزکےہتھیاروں کےلائسنس بھی چیک کئےجائیں۔

    کراچی کےسب سے پوش علاقےکلفٹن میں بڑی بڑی گاڑیاں روک کرمسلح نجی گارڈزکواتارا اوراسلحہ لائسنس چیک کیا جاتا رہا۔

    پولیس نےکالےشیشوں والی گاڑیاں بھی روک روک کران کےشیشے شفاف کئے, گاڑی مالکان مکمل تعاون کرتےنظرآئے۔ کارروائی میں ان پولیس اہلکاروں کوبھی چیک کیا گیاجوسادہ لباس میں گھومتےہیں۔

    واضح رہے کہ کراچی میں کئی وارداتوں میں نجی سیکورٹی گارڈ ملوث پائےگئے ہیں۔ خصوصاً بینک ڈکیتیوں میں اکثران کا ہاتھ ہوتا ہے۔

  • نوکری جانے کا دکھ ، سیکیورٹی گارڈ کی فائرنگ، تین افراد ہلاک

    نوکری جانے کا دکھ ، سیکیورٹی گارڈ کی فائرنگ، تین افراد ہلاک

    لاہور: نوکری سے برخاست کئے جانے والے گارڈ نے فائرنگ کرکے تین تاجروں کو ہلاک کردیا۔تفصیلات کے مطابق ایک تو مہنگائی اوپر سے نوکری جانے کے غم نے سیکورٹی گارڈ کو مشتعل کردیا.

    لاہور کے علاقے فیصل ٹاؤن میں شوروم مالک نے چند روز قبل سیکیورٹی گارڈ عباس کو نوکری سےنکال دیا تھا ۔ سیکیورٹی گارڈ عباس اپنے بقایاجات کی وصولی کے لئے جب شوروم پہنچا تو وہاں تین تاجر ملک شفقت ،وحید اور عدیل موجود تھے۔

    تینوں نے گارڈ سے میٹنگ کی اسی دوران نہ جانے کیا بات ہوئی کہ گارڈ عباس مشتعل ہوگیا ۔کلاشنکوف سے تینوں تاجروں پر فائرنگ کردی، جس کے نتیجے میں دو تاجر موقع پر اور ایک تاجر دوران علاج چل بسا۔

    مذکورہ گارڈ فائرنگ کرکے موقع سے فرار ہوگیا۔واقعے کے بعد تاجروں نے احتجاجاً ٹائر جلا کر روڈ بلاک کردیا اور احتجاجی مظاہرہ کیا۔پولیس نے مقدمہ درج کرکے تحقیقات شروع کردی ہیں۔