گوجرانوالہ : پولیس نے آن لائن آرڈر، ہوم ڈلیوری اور پارسلز میں سپلائی ہونے والی منشیات کی بڑی کھیپ پکڑلی، منشیات فروشی میں ملوث میاں بیوی گرفتار کرلیے۔
اے آر وائی نیوز کی رپورٹ کے مطابق گوجرانوالہ پولیس نے منشیات فروشی میں ملوث میاں بیوی کو گرفتار کرکے ان کے قبضے سے 105کلو منشیات برآمد کرلی۔
اس حوالے سے ایس ایس پی آپریشن رضوان طارق نے بتایا کہ ملزمان میاں بیوی منشیات علاقہ غیر سے خرید کر گاڑی کے خفیہ خانوں میں چھپا کر لارہے تھے۔
پولیس کے مطابق ملزمان مذکورہ منشیات کو آن لائن آرڈر، ہوم ڈیلیوری اور پارسلز کے ذریعے مختلف اضلاع میں سپلائی کرنے والے تھے۔
ایس ایس پی کے مطابق برآمد ہونے والی منشیات میں 5کلو700 گرام آئس،23کلو سے زائد چرس جبکہ 27کلو900گرام ہیروئن،47کلو500گرام سے زائد افیون بھی شامل ہے۔
ملزم شوہر یوسف اور اس کی بیوی فہمیدہ سال 2012سے منشیات کا دھندہ کررہے ہیں، اروپ پولیس نے2021میں ملزم جوڑے کو پکڑا لیکن جیل سے آکر پھروہی کام کرنے لگا۔
گوجرانوالہ پولیس کا کہنا ہے کہ ملزمان عرصہ دراز سے اسکولز، کالجز اور نشہ کےعادی افراد کو منشیات سپلائی کرتے تھے۔
