اسلام آباد : سیشن عدالت میں توشہ خانہ کیس کی سماعت ہوئی جس میں عدالت نے چیئرمین پی ٹی آئی کی 342 کا بیان ملتوی کرنے کی درخواست مسترد کر دی۔
سماعت کے موقع پر اپنے ریمارکس میں جج ہمایوں دلاور نے کہا کہ آج تیسرے دن چیئرمین پی ٹی آئی کا 342کا بیان قلمبند کرنے کے لیے سماعت مقرر کی گئی تھی، چیئرمین پی ٹی آئی کے وکلاء نے بیان کی سماعت ملتوی کرنے کی درخواست دائر کی۔
جج ہمایوں دلاور نے بتایا کہ چیئرمین پی ٹی آئی اپنے وکیل خواجہ حارث کے ہمراہ عدالت پیش ہوئے، چیئرمین پی ٹی آئی کی جانب سے بیان قلمبند کرنے کے لیے کچھ وقت مانگنے کی درخواست دائر کی گئی۔
سیشن جج کا کہنا ہے کہ چیئرمین پی ٹی آئی کے مطابق وہ آج کل 180 کیسز میں عدالتوں میں پیش ہورہے ہیں اورعاشورہ کی چھٹیوں کے باعث 342 کا بیان نہیں بنایا جاسکا۔
جج ہمایوں دلاور نے کہا کہ چیئرمین پی ٹی آئی کا 342 کا بیان قلمبند کرانے کے بجائے سماعت ملتوی کرنے کی درخواست دائر کی گئی، جج کا کہنا تھا کہ چیئرمین پی ٹی آئی اور ان کے وکلاء کو 342 کے بیان قلمبند کروانے کے لیے کافی وقت دیا گیا۔
انہوں نے کہا کہ چیئرمین پی ٹی آئی کے وکلاء کے مطابق سیشن عدالت تیزی سے ٹرائل چلا رہی، چیئرمین پی ٹی آئی کے وکلاء کے مطابق تیزی سے ٹرائل چلنے پر غیر جانبداری سے ٹرائل نہیں چل رہا۔
سیشن جج کے مطابق چیئرمین پی ٹی آئی نے بھی سیشن عدالت پر اعتماد کا اظہار نہیں کیا، سیشن عدالت نے ان کی ایسی ہی درخواستیں پہلے بھی مسترد کی ہیں، چیئرمین پی ٹی آئی کے وکلاء نے بھی آج کچھ نئے دلائل نہیں دیئے۔
جج ہمایوں دلاور نے کہا کہ ایسی درخواستوں کا مقصد ٹرائل کو تاخیر کا شکار بنانا ہے، چیئرمین پی ٹی آئی، سینئر وکیل خواجہ حارث کا رویہ عدالت کے سامنےعیاں ہے، چیئرمین پی ٹی آئی اور وکیل خواجہ حارث نے عدالت کو صرف مایوس کیا ہے۔
بعد ازاں عدالت نے چیئرمین پی ٹی آئی کو 342 کا بیان ریکارڈ کروانے کیلئے کل 9بجے طلب کرلیا اور توشہ خانہ کیس کی سماعت کل صبح9بجے تک ملتوی کردی۔
