Tag: shahbaz-sharif-arrest

اسلام آباد : وزیراطلاعات فوادچوہدری نے شہباز شریف کی گرفتاری پر کہا کہ یہ تو پہلی گرفتاری ہوئی ہے،ابھی مزید بڑی گرفتاریاں ہونے والی ہیں جبکہ نعیم الحق کا کہنا ہے کہ شہبازشریف کی گرفتاری قانون کے مطابق کارروائی ہے۔

تفصیلات کے مطابق وزیراطلاعات فوادچوہدری نے سابق وزیراعلیٰ پنجاب اور مسلم لیگ ن کے صدر شہباز شریف کی گرفتاری پر ردعمل کا اظہار کرتے ہوئے کہا یہ تو پہلی گرفتاری ہوئی ہے، ابھی مزیدبڑی گرفتاریاں ہونے والی ہیں، احتساب کاعمل ابھی مزید آگے بڑھے گا۔

فوادچوہدری کا کہنا تھا کہ حکومت مکمل طورپرغیرجانبدارہے، یہ وہ مقدمات ہیں جونیب نےان کے دور میں قائم کیے، نیب قانون کےمطابق پہلےانکوائری پھرریفرنس فائل کیا جاتا ہے۔

انھوں نے کہا کہ  آشیانہ ہاؤسنگ میں56ارب کی کرپشن کےالزامات ہیں ، پاکستان کوجن لوگوں نےلوٹاہےان کااحتساب ہوناچاہیے، بڑےمقدمات میں ملوث لوگوں کوبھی گرفتار ہونا چاہیے۔

وزیراطلاعات کا کہنا تھا کہ حکومت نیب کو ہر طرح کی مدد اور تعاون دینے کو تیار ہے ، نیب حکومت کے کنٹرول میں نہیں لیکن انتظامی مدد کریں گے۔

فوادچوہدری نے کہا کہ جنہوں نےگاجرکھائی ہےدردبھی ان ہی کےپیٹ میں ہوگا، پہلے بھی کہا تھا ابھی اور بھی قدم اٹھائےجائیں گے، کرپٹ لوگوں کو اور بھی گرفتار کیا جائے گا۔

ان کا کہنا تھا کہ شہبازشریف کی گرفتاری کاحکومت سے کوئی تعلق نہیں ہے، یہ تمام کیسزحکومت آنے سے پہلے کے ہیں۔

شہبازشریف کی گرفتاری قانون کے مطابق کارروائی ہے،  نعیم الحق

وزیر اعظم کے خصوصی مشیرو سابق انفارمیشن سیکرٹری نعیم الحق نے مسلم لیگ ن کے صدر شہباز شریف کی گرفتاری پر کہا کہ پوری کوشش ہےکوئی سیاسی انتقامی کارروائی نہ کی جائے۔

نعیم الحق کا کہنا تھا کہ نیب کے پاس ثبوت ہوں گے اسی لیے گرفتار کیا ہوگا، قانون کےخلاف جانے والوں کو گرفتارکیا جائے گا، شہبازشریف کی گرفتاری قانون کے مطابق کارروائی ہے، قانون کی گرفت سے کوئی بھی شخص نہیں بچ سکتا۔

مزید پڑھیں :کرپشن کیس: نیب نے شہبازشریف کو گرفتار کرلیا

یاد رہے کہ قومی احتساب بیورو( نیب) نے آشیانہ کمپنی کیس میں مسلم لیگ ن کے صدر اور اپوزیشن لیڈر میاں شہباز شریف کو گرفتار کرلیا ہے۔

رجمان نیب کا کہنا ہے کہ شہبازشریف پرغیرقانونی ٹھیکےدینےکےالزامات ہیں،  انھیںکل احتساب عدالت میں پیش کیاجائےگا جبکہ شہبازشریف کی گرفتاری سےمتعلق اسپیکرقومی اسمبلی کوآگاہ کردیاگیا۔