لاہور : اپوزیشن لیڈرشہباز شریف نے کہا ہے کہ مودی کا ہر ظلم مقبوضہ کشمیرکی آزادی کی صبح قریب لارہا ہے ،انسانیت سوز مظالم پرمودی کیخلاف جنگی جرائم کا مقدمہ چلایا جائے۔
تفصیلات کے مطابق اپوزیشن لیڈرشہباز شریف نے کشمیریوں سے اظہار یکجہتی کے موقع پر کہا بھارت کاظلم کشمیریوں کی حق کی آواز نہیں دبا سکتا، مودی جتنا چاہے ظلم کرلے کشمیریوں کی آزادی نوشتہ دیوار ہے۔
،شہبازشریف کا کہنا تھا کہ مودی کا ہر ظلم مقبوضہ کشمیرکی آزادی کی صبح قریب لارہاہے ، مودی کا ہر ظلم بھارت کی کشمیریوں کے ہاتھوں شکست لکھ رہاہے۔
اپوزیشن لیڈر نے مطالبہ کیا انسانیت سوز مظالم پر مودی کیخلاف جنگی جرائم کا مقدمہ چلایاجائے، مودی نے خود کوصرف انسانیت کا قاتل ثابت کیا، تاریخ مودی کو بےگناہوں کا قصائی کے طور پر یاد رکھےگی۔
ان کا مزید کہنا تھا کہ کشمیر پرناجائز قبضہ کرنےوالوں کا کشمیر قبرستان ثابت ہوگا۔
خیال رہے وزیراعظم عمران خان کی اپیل پر ملک بھر میں پاکستانیوں نے کشمیریوں سے یکجہتی کا اظہار کیا ، 12 بجے سائرن بجتے ہی قومی ترانے کے بعد کشمیرکا ترانہ پڑھاگیا، ٹریفک سگنلز بندہوگئے،ٹرینز بھی رک گئیں اور فضائی حدود بھی بندرہی۔
مزید پڑھیں : مودی کا ہاتھ توڑ دیں گے، کشمیر پر قبضہ نہیں کرنے دیں گے: شہباز شریف
یاد رہے چند روز قبل اپوزیشن رہنما شہباز شریف نے کہا تھا کہ قائد اعظم نے فرمایا تھا کشمیر پاکستان کی شہ رگ ہے، ہم مودی کا ہاتھ توڑ دیں گے لیکن قبضہ نہیں کرنے دیں گے۔
ان کا کہناتھا کہ 65 کی جنگ میں پوری قوم فوج بن گئی اور دشمن کو منہ توڑ جواب دیا، حال ہی میں بھارت نے پھر حملہ کرنے کی گندی کوشش کی۔ انھوں نے مودی کو للکار کر کہا، وہ دن دور نہیں مودی، جب ہم تم سے ایک ایک دن کا حساب لیں گے۔
