اسلام آباد : وزیر اعظم شہباز شریف نے امریکی صدر جوبائیڈن کو جواب دے دیا ان کا کہنا ہے کہ پاکستان کے جوہری اثاثے مکمل طور پر محفوظ ہیں۔
سماجی رابطے کی ویب ٹوئٹر پر اپنے تازہ پیغام میں ان کا کہنا ہے کہ میں یہ بات واضح طور پر دہرانا چاہتا ہوں کہ پاکستان ایک ذمہ دار جوہری ریاست ہے۔
انہوں نے کہا کہ ہمارے ایٹمی اثاثے آئی سے ای اے کی شرائط پر پورا اترتے ہوئے اس کے معیار کے مطابق مکمل طور پر محفوظ ہیں۔
وزیراعظم کا کہنا تھا کہ ہم ایٹمی اثاثوں کیلیے کیے جانے والے حفاظتی اقدامات کو انتہائی سنجیدگی سے اٹھاتے ہیں تاکہ کسی قسم کے شک کی گنجائش ہی نہ رہے۔
علاوہ ازیں وزیر اعظم ہاؤس سے جاری اپنے بیان میں شہباز شریف نے امریکی صدر کے بیان کو گمراہ کن قرار دیتے ہوئے اسے سختی سے مسترد کردیا۔
Let me reiterate unequivocally: Pakistan is a responsible nuclear state and we are proud that our nuclear assets have the best safeguards as per IAEA requirements. We take these safety measures with the utmost seriousness. Let no one have any doubts.
— Shehbaz Sharif (@CMShehbaz) October 15, 2022
ان کا کہنا ہے کہ گزشتہ دہائیاں ثبوت ہیں پاکستان انتہائی ذمہ دار جوہری ریاست ہے، جوہری پروگرام فول پروف کمانڈ اینڈ کنٹرول سسٹم کے زیرانتظام ہے۔
وزیراعظم کا کہنا تھا کہ جوہری ہتھیاروں سے متعلق پاکستان نے ہمیشہ ذمہ دارانہ کردار ادا کیا، پاکستان نے آئی اے ای اے سمیت عالمی معیارات کے پختہ عہد کو پورا کیا۔
انہوں نے کہا کہ عالمی امن کو خطرہ مروجہ اقدار کو پامال کرنے والی بعض ریاستوں، انتہا پسند قومیت پسندی اور انسانی حقوق کی خلاف ورزیوں سے ہے۔
وزیر اعظم کا کہنا ہے کہ دنیا کے امن کو اصل خطرہ جوہری ممالک کے درمیان اسلحہ کی دوڑ سے ہے، دنیا کے امن کو خطرہ ان ممالک سے ہے جہاں جوہری سلامتی پرحادثات ہوئے۔
انہوں نے کہا کہ امن کو خطرہ ان اتحادوں سے ہے جن کی تشکیل سے علاقائی توازن متاثر ہورہا ہے، پاکستان اور امریکا کے درمیان دوستی اور باہمی مفاد پرمبنی تعاون کی تاریخ ہے۔
دنیا مسائل سے دوچار ہے اس لیے غیرضروری بیانات سے پرہیز کیا جائے، علاقائی امن وسلامتی کے فروغ کیلئے امریکا کے ساتھ تعاون کی خواہش رکھتے ہیں۔
