لاہور میں لگژری گاڑی چلانے والے کم عمر ڈرائیور کی ٹکر سے ایک شخص کی ہلاکت اور دو فراد کے زخمی ہونے کے واقعے میں اہم پیش رفت سامنے آئی ہے۔
اس حوالے سے اے آر وائی نیوز کی رپورٹ کے مطابق لگژری گاڑی سے حادثے کا ذمہ دار 14 سالہ ملزم حاشر اپنے ماموں کی نہیں بلکہ مالک مکان کی گاڑی اس کی اجازت کے بغیر گھر سے لے کر نکلا تھا۔
رپورٹ کے مطابق خرم نامی مالک مکان ایک میڈیسن کمپنی میں منیجر کے عہدے پر فائز ہے اور مذکورہ لگژری گاڑی اسی کمپنی کی ملکیت ہے۔
حاشر کے نکالنے سے پہلے مالک مکان خرم اپنی اہلیہ کے ساتھ اپنی ہمشیرہ کے گھر گیا تھا جو قریبی محلے میں ہی رہائش پذیر ہیں، اس موقع پر گاڑی گھر میں ہی کھڑی تھی۔
ملزم 14 سالہ حاشر کے والدین میں علیحدگی ہوچکی ہے اور وہ اپنی نانی کے پاس کرائے کے گھر میں رہائش پذیر ہے، حاشر نے گاڑی کی چابی اپنی نانی سے لی تھی۔
بعد ازاں گھر میں گاڑی کی غیر موجودگی کا علم ہونے پر مالک مکان خرم نے گاڑی چوری کی اطلاع فوری طور پر پولیس ہیلپ لائن 15 کو دے دی تھی۔ دوسری جانب پولیس حکام کا کہنا ہے کہ مالک مکان کو بھی شامل تفتیش کیا جائے گا۔
مزید پڑھیں : کم عمر ڈرائیور نے 3 موٹر سائیکل سواروں کو کچل ڈالا
لاہور کے علاقے شاہدرہ میں سنگیت سینما کے قریب تیز رفتار لگژری گاڑی کے 14 سالہ ڈرائیور نے 3 موٹر سائیکل سواروں کو کچل دیا، حادثے میں ایک شخص جاں بحق اور دو زخمی ہوگئے۔
کم عمر بچے کی ڈرائیونگ کرتے ہوئے دو سی سی ٹی وی فوٹیج منظرعام پر آ گئی ہیں، فوٹیج میں گاڑی چلاتے ہوئے بچے کو واضح طور پر دیکھا گیا، حادثے کے بعد مشتعل افراد نے بچے کو پکڑ کر تھپڑ مارے۔