ARYNews.tv | Urdu – Har Lamha Bakhabar

Tag: Shahid Afridi

  • شاہد آفریدی سمیت 9 کھلاڑیوں کیلئے سول ایوارڈز کا اعلان

    شاہد آفریدی سمیت 9 کھلاڑیوں کیلئے سول ایوارڈز کا اعلان

    لاہور(16 اگست 2025): حکومت پاکستان نے 78 ویں یوم آزادی کے موقع پر کھیلوں کے مختلف شعبوں میں 9 اہم شخصیات کے لیے سول ایوارڈز کا اعلان کیا ہے۔

    تفصیلات کے مطابق یہ ایوارڈز کھیلوں میں نمایاں خدمات کے اعتراف میں دیے جا رہے ہیں، جن میں قومی مینز کرکٹ ٹیم کے سابق کپتان شاہد آفریدی بھی شامل ہیں۔

    لیجنڈری آل راؤنڈر آفریدی نے 524 بین الاقوامی میچوں میں پاکستان کی نمائندگی کی اور 2009 میں آئی سی سی مینز ٹی ٹوئنٹی ورلڈ کپ جیتنے والے اسکواڈ کا حصہ تھے، سابق آل راؤنڈر کو کرکٹ میں شاندار کامیابیوں کے اعتراف میں ہلال امتیاز سے نوازا جائے گا۔

    معروف کوہ پیما شہروز کاشف، جو 8000 میٹر سے زیادہ کی تمام 14 چوٹیوں کو سر کرنے والے سب سے کم عمر پاکستانی ہیں، اور مرحوم گھڑ سوار ملک محمد عطا کو ہلال امتیاز سے نوازا جائے گا۔

    انٹرنیشنل کرکٹ کونسل (آئی سی سی) کی ہال آف فیمر ثنا میر کو بھی ستارہ امتیاز کے لیے شارٹ لسٹ کیا گیا ہے، تقریباً 15 سال تک پاکستان کی نمائندگی کرنے والی سابق آف اسپنر اس سال جون میں آئی سی سی ہال آف فیم میں شامل ہونے والی پاکستان کی پہلی خاتون کرکٹر بن گئیں ہیں۔

    اسی طرح پاکستان کے کامیاب ترین پیرا ایتھلیٹ حیدر علی کو بھی ستارہ امتیاز کے لیے نامزد کیا گیا ہے۔ حیدر نے پاکستان کے لیے چار تمغے جیتے ہیں، جن میں ان کا سب سے حالیہ تمغہ گزشتہ سال پیرس پیرا اولمپکس میں ڈسکس تھرو میں کانسی کا تمغہ تھا۔

    قومی مکسڈ مارشل آرٹسٹ شاہ زیب رند اور کبڈی کھلاڑی محمد سجاد کو ان کی اپنی کامیابیوں پر صدارتی ایوارڈ برائے پرائیڈ آف پرفارمنس (پی اے پی پی) سے نوازا جائے گا۔

    اس کے علاوہ اسکواش کے کھلاڑی حمزہ خان، شوٹر محسن نواز اور ٹینس کھلاڑی راشد ملک کو تمغہ امتیاز کے لیے نامزد کیا گیا ہے، واضح رہے کہ یہ ایوارڈز 23 مارچ 2026 کو یوم پاکستان کے موقع پر پیش کیے جائیں گے۔

  • بھارت کا پاکستان کیخلاف کھیلنے سے انکار، شاہد آفریدی کا بیان وائرل

    بھارت کا پاکستان کیخلاف کھیلنے سے انکار، شاہد آفریدی کا بیان وائرل

    پاکستانی کرکٹ ٹیم کے سابق کپتان شاہد آفریدی نے ورلڈ چیمپئن شپ آف لیجنڈز میں پاکستان کے خلاف کھیلنے سے انکار پر بھارتی کھلاڑیوں پر تنقید کے نشتر برساتے ہوئے کہا کہ بھارت اب ناجانے کس منہ سے کھیلے گا، پر کھیلے گا پاکستان کے ساتھ ہی۔

    برطانیہ میں ورلڈ چیمپئن شپ آف لیجنڈز لیگ جاری ہے جس میں پاکستان اور بھارت کی ٹیموں نے سیمی فائنل کیلیے کوالیفائی کرلیا ہے۔

    بھارتی کرکٹرز نے اس سے قبل راؤنڈ میچ میں پاکستان کے خلاف کھیلنے سے انکار کیا تھا، بھارتی سیاستدان اروند ساونت نے بھی موجودہ کشیدگی کے تناظر میں پاکستان کے ساتھ کرکٹ نہ کھیلنے کا مشورہ دیا تھا۔

    پاکستان کے سابق کپتان شاہد آفریدی نے ان بیانات کے جواب میں برمنگھم کے ایک مقامی ریسٹورنٹ میں میڈیا سے بات کرتے ہوئے بھارتی ٹیم پر طنز کیا جس سے ہال قہقہوں سے گونج اٹھا۔

    سابق کپتان کا کہنا تھا کہ آج ہم سیمی فائنل میں پہنچے ہیں، ہماری عمر دیکھو، اس عمر میں ہم سیمی فائنل کھیل رہے ہیں، اب بھارت کو ہمارے ساتھ کھیلنا پڑے گا، چاہے وہ چاہے یا نہ چاہے، پتہ نہیں کس منہ سے کھیلے گا، مگر کھیلنا ضرور پڑے گا۔

    سابق کپتان کا یہ بیان سوشل میڈیا پر وائرل ہو گیا جہاں پاکستانی شائقین نے بھارتی ٹیم کو آڑے ہاتھوں لیا اور آفریدی کی تعریف کی اور دلچسپ تبصروں کا سلسلہ شروع ہوگیا۔

    بھارت کا سیمی فائنل کھیلنے سے انکار، پاکستان ڈبلیو سی ایل کے فائنل میں پہنچ گیا

    ایک مداح کا تبصرہ کرتے ہوئے کہنا تھا کہ ’ہمارے فائٹر جیٹ شاہد آفریدی نے 5 رافیل طیارے مار گرائے‘، ایک اور صارف نے لکھا، ’کمال جواب دیا، اب پاکستانی کھلاڑیوں کو بھی میدان میں بھارتی کھلاڑیوں سے ہاتھ نہیں ملانا چاہیے‘، کئی صارفین کا کہنا تھا، ’بھارت شکست کے خوف سے میدان میں آنے سے کترا رہا ہے۔‘

    واضح رہے کہ ورلڈ چیمپیئن شپ آف لیجنڈز میں 20 جولائی کو ہونے والا پاک بھارت کرکٹ میچ بھارتی کھلاڑیوں کی ہٹ دھرمی، غیر پیشہ ورانہ رویے اور شاہد آفریدی کے خلاف تعصب کے باعث منسوخ کر دیا گیا تھا۔

  • لیجنڈز میچ منسوخی : شاہد آفریدی کا بھارتی کھلاڑیوں کو کرارا جواب

    لیجنڈز میچ منسوخی : شاہد آفریدی کا بھارتی کھلاڑیوں کو کرارا جواب

    قومی ٹیم کے سابق کپتان شاہدآفریدی نے ورلڈ چیمپئن شپ آف لیجنڈز کا میچ منسوخ ہونے پر کہا ہے کہ کرکٹ میں سیاست کو نہ لے کر آؤ، کھیل پہلے ہے شاہد آفریدی بعد میں ہے۔

    پاکستانی کرکٹر شاہد آفریدی نے میڈیا سے بات کرتے ہوئے ایک بار پھر بڑا پن دکھا کر بھارتی کھلاڑیوں کی نفرت کو مات دے دی۔

    انہوں نے کہا کہ اگر مجھے پتا ہوتا کہ میری وجہ سے میچ نہیں ہورہا تو میں اسٹیڈیم ہی نہ جاتا، کرکٹ ہم سے بڑی ہے، کھیل پہلے ہے شاہدآفریدی بعد میں ہے۔

    بوم بوم آفریدی نے مزید کہا کہ کرکٹ میں سیاست کو نہ لے کر آؤ، کوئی کہتا ہے کہ اس نے نہیں کھیلنا تو وہ جائے اپنا کھیلے، کرکٹ اس سے بڑی ہے۔

    ان کاکہنا تھا کہہم نے پہلے بھی اپنے تعلقات کرکٹ کے ذریعے بہتر کیے، اسپورٹس ڈپلومیسی سے بہترین چیز کوئی نہیں ہے، یہ آپ کو قریب لاتی ہے جب تک ساتھ نہیں بیٹھیں گے، بات نہیں کریں گے تو مسائل حل نہیں ہوں گے بلکہ امزید بڑھیں گے۔

    مزید پڑھیں : بھارتی کھلاڑیوں کی ہٹ دھرمی کی وجہ سے پاک بھارت میچ منسوخ 

    ورلڈ چیمپئن شپ آف لیجنڈز کے تحت برمنگھم میں پاکستان اور بھارت کے درمیان ہونے والا شیڈول میچ 5بھارتی کھلاڑیوں کی ہٹ دھرمی کے باعث منسوخ کردیا گیا تھا۔

    جن بھارتی کھلاڑیوں نے کھیلنے سے انکار کیا ان میں یوسف پٹھان، عرفان پٹھان، ہربھجن سنگھ ، سریش رائنا، یووراج سنگھ شامل ہیں۔ ان کا کہنا تھا کہ اگر شاہد آفریدی نے پاکستان کی طرف سے کھیلا تو ہم یہ میچ نہیں کھیلیں گے۔

  • دریائے سوات میں ڈوبنے والے بے بسی کی تصویر بنے رہے، شاہد آفریدی

    دریائے سوات میں ڈوبنے والے بے بسی کی تصویر بنے رہے، شاہد آفریدی

    پاکستان کرکٹ ٹیم کے سابق کپتان شاہد آفریدی نے دریائے سوات میں ڈوبنے والے افراد کے لیے افسوس کا اظہار کرتے ہوئے کہا ہے کہ دریائے سوات میں ڈوبنے والے بے بسی کی تصویر بنے رہے۔

    سابق کپتان شاہد آفریدی نے اپنے ایکس اکاؤنٹ پر کئے گئے ٹویٹ میں کہا کہ معصوم لوگ آخری لمحے تک انتظار کرتے رہے کہ شاید کوئی بچالے گا،انہیں اندازہ نہ تھا جن کی یہ ذمہ داری ہے ان کی ترجیحات کچھ اور ہیں۔

    واضح رہے کہ دریائے سوات کا سیلابی ریلہ 17 سیاحوں کو بہا لے گیا، جس سے 9 افراد جاں بحق ہو گئے، جبکہ 4 کو بچا لیا گیا۔باقی افراد کی تلاش تاحال جاری ہے۔

    عینی شاہدین کا کہنا ہے کہ صبح ناشتے کے بعد سیاحوں نے تصویریں لینے کے لیے دریا کے خشک حصے کا رخ کیا تھا کہ اچانک بے رحم موجوں نے انہیں گھیر لیا، لوگ جان بچانے کے لیے ٹیلے پر چڑھ گئے، مدد کے لیے پکارتے رہے، لیکن دریا کا بہاؤ اتنا تیز تھا کہ کوئی اس کے سامنے ٹھہر نہیں سکا۔

    ڈپٹی کمشنر سوات شہزاد محبوب کا کہنا ہے کہ دریائے سوات میں سیاحوں کے ڈوبنے کے واقعے کے 15 منٹ بعد امدادی ٹیمیں جائے وقوعہ پر پہنچ چکی تھیں اور وہاں پھنسے لوگوں کو بچایا بھی گیا۔

    اے آر وائی نیوز کے پروگرام سوال یہ ہے میں ڈپٹی کمشنر سوات شہزاد محبوب نے سوات میں فضا گٹ کے مقام پر 18 سیاحوں کو ڈوبنے کے افسوسناک حادثے سے متعلق تفصیلات سے آگاہ کیا۔

    انہوں نے بتایا کہ ہماری اطلاعات کے مطابق مذکورہ خاندان ساڑھے 6 بجے ہوٹل میں داخل ہوا اور ساڑھے 9 بجے یہ لوگ ہوٹل کے عقب سے نکل کر دریائے سوات کی جانب گئے۔

    سانحہ سوات میں جاں بحق 8 افراد کی نماز جنازہ اور تدفین کب کہاں ہوگی؟

    انہوں نے بتایا کہ پونے دس بجے سیلابی پانی کا ریلا آیا اور 9 بج کر 49 منٹ پر ریسکیو کو کال کی گئی اور دس سے 15 منٹ کے اندر امدادی ٹیمیں جائے وقوعہ پر پہنچ گئیں اور کچھ لوگوں کو بحفاظت باہر بھی نکالا۔

    ڈپٹی کمشنر سوات نے بتایا کہ پہلے 4 سے 5 لوگوں کو ریسکیو کیا گیا تھا لیکن اچانک پانی کا تیز ریلا آنے کے باعث امدادی کارکنان کو کام کرنے میں دشواری اور مشکلات درپیش رہیں۔

  • دبئی میں بھارتی کمیونٹی کا شاہد آفریدی کا والہانہ استقبال، گودی میڈیا برہم

    دبئی میں بھارتی کمیونٹی کا شاہد آفریدی کا والہانہ استقبال، گودی میڈیا برہم

    دبئی میں بھارت کی کیرالا کمیونٹی کے ایونٹ میں پاکستانی اسٹار کرکٹرز شاہد آفریدی اور عمر گل کو مدعو کیے جانے پر بھارتی انتہا پسندوں کو آگ لگ گئی۔

    25 مئی کو دبئی میں کوچین یونیورسٹی بی ٹیک ایلومنائی ایسوسی ایشن کے زیر اہتمام ایک تقریب کا اہتمام کیا گیا جس میں شاہد آفریدی نے بھی شرکت کی۔

    تقریب میں جسے ہی پاکستان کے سپر اسٹار شاہد آفریدی پہنچے تو کیرالا سے تعلق رکھنے والے بھارتی نژاد افراد  نے "بوم بوم” کے نعروں کے ساتھ ان کا پرتپاک استقبال کیا، ایونٹ میں بھارتی شہریوں نے پاکستان کے لیجنڈ کرکٹرز کو دیکھ کر سیٹیاں بجائيں اور انہیں دیکھ کر اپنی خوشی کا بھرپور اظہار کیا۔

    دوسری جانب سوشل میڈیا پر ویڈیو سامنے آنے کے بعد ایک ہنگامہ برپا ہوگیا، بھارتی میڈیا نے اپنے ہی شہریوں کو تنقید کا نشانہ بنانا شروع کر دیا۔

    بھارت کے اندر مختلف نیوز چینلز اور سوشل میڈیا اکاؤنٹس نے شاہد آفریدی کو مدعو کرنے پر شدید ردعمل دیتے ہوئے کہا کہ جس شخص نے جنگی صورتحال میں پاکستان کی حمایت کی اُسے ایوارڈ دینا بھارتی قوم کی توہین ہے۔

  • شاہد آفریدی کی وزیر اعظم سے ملاقات، آپریشن بنیان مرصوص کی کامیابی پر مبارکباد

    شاہد آفریدی کی وزیر اعظم سے ملاقات، آپریشن بنیان مرصوص کی کامیابی پر مبارکباد

    سابق کپتان شاہد آفریدی نے وزیر اعظم شہباز شریف سے ملاقات کی ہے اور انہیں بھارت کے خلاف فتح پر مبارکباد دیا ہے۔

    قومی ٹیم کے سابق کپتان شاہد آفریدی نے سوشل میڈیا پر وزیر اعظم پاکستان شہباز شریف سے خوشگوار ماحول میں ملاقات کی تصاویر شیئر کی ہے۔

    تصاویر پوسٹ کرتے ہوئے شاہد آفریدی نے لکھا "آج وزیر اعظم شہباز شریف سے ملاقات کا اعزاز حاصل ہوا، وزیراعظم اور دلیر افواج کو آپریشن "بنیان المرصوص” کی شاندار کامیابی پر یومِ تشکر کے موقع پر دل کی گہرائیوں سے مبارکباد پیش کرتا ہوں۔

    یاد رہے کہ آپریشن بُنیان مرصوص کے تحت پاکستان نے بھارت میں متعدد اہداف کو نشانہ بناتے ہوئے ادھم پور ائیربیس، پٹھان کوٹ ائیربیس اور سرسہ ائیربیس کے علاوہ سورت گڑھ ائیرفیلڈز، براہموس اسٹوریج سائٹ، بھارتی بریگیڈ ہیڈکوارٹر کے جی ٹاپ اور اڑی میں سپلائی ڈپو سمیت 12 اہداف کو تباہ کردیا تھا۔

    بھارت کی جانب سے 7 مئی کی رات پاکستان پر جب فضائی حملہ کیا گیا تو پاکستان نے بروقت اور مؤثر جواب دیتے ہوئے رات کی تاریکی میں میزائل حملوں کے ذریعے معصوم شہریوں کو نشانہ بنانے والے بھارت کے 5 جنگی طیارے پاک فضائیہ نے مار گرائے جس میں جدید طرز کا فرانسیسی جنگی طیارہ رافیل بھی شامل تھا۔

    16 مئی کو بھارتی جارحیت کے خلاف جوابی کارروائی آپریشن بنیان مرصوص میں تاریخی فتح پر ملک بھر میں یو م تشکر منایا گیا۔

    یوم تشکر کے موقع پر پاکستانی عوام اور افواج پاکستان کو خراج تحسین پیش کیا گیا، یوم تشکر کے موقع پر دن کا آغاز مسجدوں میں قرآن خوانی اور خصوصی دعاؤں سے ہوا جبکہ وفاقی دارالحکومت میں 31 اور صوبائی دارالحکومتوں میں 21، 21 توپوں کی سلامی دی گئی۔

  • بھارتیوں کی نیندیں حرام کرنے پر شاہد آفریدی کا یوٹیوب اکاؤنٹ بلاک

    بھارتیوں کی نیندیں حرام کرنے پر شاہد آفریدی کا یوٹیوب اکاؤنٹ بلاک

    پہلگام میں جھوٹا ڈرامہ رچانے اور اپنی فوج کی ناکامی پر پردہ ڈالنے کی ناکام کوشش کے بعد بیانات سے بچنے کیلئے بھارت نے پاکستانی کرکٹ ٹیم کے سابق کپتان شاہد آفریدی کا یوٹیوب اکاؤنٹ بلاک کردیا۔

    غیر ملکی ذرائع ابلاغ کے مطابق بھارتی وزارت داخلہ کی سفارش پر مجموعی طور پر 16 پاکستانی یوٹیوب چینلز پر پابندی لگادی گئی ہے، جس میں 3 سابق پاکستانی کرکٹرز کے یوٹیوب چینلز بھی شامل ہیں۔

    مودی کی انتہاء پسند سوچ کی حامل حکومت نے آل راؤنڈر کا یوٹیوب اکاؤنٹ بھی بلاک کردیا تاکہ بھارتیوں تک ان کا ردعمل نہ پہنچ سکے۔

    اس سے قبل بھارت نے سابق کپتان راشد لطیف، اسپیڈ اسٹار شعیب اختر اور باسط علی کے یوٹیوب چینلز پر بھی پابندی لگائی تھی۔

    گزشتہ دنوں پہلگام واقعہ پر مودی حکومت اور بھارتی فوج کی ناکامی پر آفریدی نے سوال اُٹھایا تھا کہ وہاں پر پٹاخہ بھی پھٹ جائے تو پاکستان پر الزام لگادیا جاتا ہے، مقبوضہ کشمیر میں 8 لاکھ بھارتی فوج ہونے کے باوجود یہ واقعہ ہوگیا اس کا مطلب تم نالائق اور نکمے ہو جو لوگوں کو سکیورٹی نہیں دے سکے۔

    پاکستانی کرکٹ ٹیم کے سابق کپتان شاہد آفریدی کے بیان کے بعد بھارتی کرکٹر شیکھر دھون اور ملک مخالف شہرت کے حامل دانش کنیریا نے انہیں شدید تنقید کا نشانہ بنانے کی کوشش کی تھی تاہم آفریدی اپنے موقف پر ڈٹے رہے۔

    ’چھوڑو جیت اور ہار، آؤ تمہیں چائے پلاتا ہوں‘ شاہد آفریدی کا شیکھر دھون کو جواب

    بھارتی حکومت نے موقف اختیار کرتے ہوئے کہا ہے کہ قومی سلامتی کے باعث آفریدی کا یوٹیوب چینل ملک میں بلاک کررہے ہیں۔

  • کنیریا کے بعد شیکھر دھون بھی شاہد آفریدی کیخلاف زہر اُگلنے لگے

    کنیریا کے بعد شیکھر دھون بھی شاہد آفریدی کیخلاف زہر اُگلنے لگے

    پاکستانی ٹیم کے سابق کپتان اور عالمی شہرت یافتہ جارح مزاج بلے شاہد آفریدی کے ایک بیان نے دانش کنیریا کے بعد شیکھر دھون کو بھی زہر اُگلنے پر مجبور کردیا۔

    پہلگام میں خود ہی اپنے لوگوں کو مار کر الزام پاکستان پر لگانے اور بھارتی فوج کی ناکامی پر سوال اٹھاتے ہوئے سابق کپتان شاہد آفریدی نے کہا تھا کہ وہاں پر پٹاخہ بھی پھٹ جائے تو پاکستان پر نام لگادیا جاتا ہے، مقبوضہ کشمیر میں 8 لاکھ بھارتی فوج ہونے کے باوجود یہ واقعہ ہوگیا اس کا مطلب تم نالائق اور نکمے ہو جو لوگوں کو سیکورٹی دینے سے قاصر ہو۔

    آفریدی کا کہنا تھا کہ ”2016 ٹی 20 ورلڈکپ کے دوران حالات خراب تھے مگر پاکستانی ٹیم بھارت گئی، ہمیں خود نہیں معلوم تھا جانا ہے یا نہیں، کبڈی کی بھارت کی ٹیم آجاتی ہے کرکٹ کی ٹیم نہیں آتی، اگر بند کرنی ہیں تو تمام چیزیں بند کرو۔

    سابق پاکستانی کپتان کا یہ بیان سامنے آنے کے بعد دانش کنیریا کے بعد اب شیکھر دھون نے بھی پہلگام واقعہ پر سابق آل راؤنڈر کو تنقیدی جواب دیتے ہوئے کہا ہے کہ کارگل میں بھی تمہیں ہرایا تھا اور کتنا گرو گے، ہمیں اپنی فوج پر فخر ہے۔

    دھون نے کہا کہ پہلگام واقعے پر پاکستان کے سابق کپتان کا بیان نہایتی بیہودا تھا اور انہیں اپنے ملک کی فکر کرنی چاہیے۔

    شاہد آفریدی کے ایک بیان پر سابق بھارتی کھلاڑیوں کی جانب سے تنقید کا سلسلہ جاری ہے، جبکہ بھارتی حکومت نے تنقید سے بچنے کیلئے پاکستانی ٹی وی چینلز پر بھی پابندی لگادی ہے۔

    اس سے قبل پاکستان کے سابق کرکٹر دانش کنیریا نے پاکستان دشمنی کا مظاہرہ کرتے ہوئے قومی ٹیم کے سابق کپتان پر بے بنیاد الزامات کی بوچھاڑ کردی تھی۔

    پاکستان میں پیسہ کمانے اور نام بنانے کے بعد سابق کرکٹر دانش کنیریا بیرون ملک منتقل ہوچکے ہیں اور اکثر پاکستان کے خلاف زہر اگلتے رہتے ہیں۔

    بابراعظم کو محمد عامر نے پلان بنا کر آؤٹ کیا، یونس خان

    کنیریا کا کہنا تھا کہ ”شاہد آفریدی نے مسلسل انتہاپسندانہ خیالات کو اپنا رکھا ہے، انہوں نے مجھے مذہب تبدیل کرنے پر مجبور کرنے کی کوشش کی تھی اور میرے ساتھ کھانے سے انکار بھی کیا تھا۔

  • شاہد آفریدی کا پہلگام سے متعلق بیان دانش کنیریا کو ہضم نہ ہوا، الزامات کی بوچھاڑ کردی

    شاہد آفریدی کا پہلگام سے متعلق بیان دانش کنیریا کو ہضم نہ ہوا، الزامات کی بوچھاڑ کردی

    پاکستان کے سابق کرکٹر دانش کنیریا نے ایک پھر پاکستان دشمنی کا مظاہرہ کرتے ہوئے قومی ٹیم کے سابق کپتان شاہد آفریدی پر بے بنیاد الزامات کی بوچھاڑ کردی۔

    پاکستان میں پیسہ کمانے اور نام بنانے کے بعد سابق کرکٹر دانش کنیریا بیرون ملک منتقل ہوچکے ہیں اور اکثر پاکستان کے خلاف زہر اگلتے رہتے ہیں۔

    کنیریا کا کہنا تھا کہ ” شاہد آفریدی نے مسلسل انتہاپسندانہ خیالات کو اپنا رکھا ہے، انہوں نے مجھے مذہب تبدیل کرنے پر مجبور کرنے کی کوشش کی تھی اور میرے ساتھ کھانے سے انکار بھی کیا تھا۔

    قبل ازیں شاہد آفریدی نے پہلگام حملے کے حوالے سے سوالات اٹھاتے ہوئے کہا تھا کہ مذکورہ واقعہ بھارت کا ڈراما ہے وہ اپنے لوگوں کو خود ہی مار دیتا ہے۔

    شاہد آفریدی نے کہاتھا کہ ایک گھنٹے تک کارروائی ہوتی ہے اور 8 لاکھ فوجی نہیں آئے؟ یہ کیسے ہو سکتا ہے۔ بھارت کی ایسے بلنڈرز مارنے کی عادت پرانی ہو چکی ہے۔

    انہوں نے کہا کہ دہشتگردی کی کوئی بھی ملک یا مذہب سپورٹ نہیں کرتا۔ ہمیشہ کوشش کی کہ بھارت سے اچھے تعلقات ہوں۔

    شاہد آفریدی نے کہا کہ بھارت کی کبڈی کی ٹیم پاکستان آ جاتی ہے، لیکن کرکٹ کی ٹیم نہیں آتی۔ اگر بند کرنی ہے تو پھر تمام چیزیں ہی بند کرو۔

    محمد عامر، بابر کی کمزوریوں سے بخوبی واقف تھے، شعیب اختر

    واضح رہے گزشتہ دنوں پہلگام فالس فلیگ آپریشن کو جواز بناتے ہوئے بھارتی حکومت پاکستان کے خلاف جنگی جنون میں مبتلا ہے۔ تاہم مودی سرکار کے اقدامات پر خود بھارت میں سوالات اٹھائے اور تنقید کی جا رہی ہے۔

  • محمد رضوان کے حالیہ بیان پر شاہد آفریدی کا ردعمل

    محمد رضوان کے حالیہ بیان پر شاہد آفریدی کا ردعمل

    پاکستان قومی کرکٹ ٹیم کے سابق کپتان شاہد آفریدی نے قومی ٹیم کے کپتان محمد رضوان کے حالیہ بیان پر ردعمل دیا ہے۔

    اے آر وائی نیوز کے مطابق گزتشہ روز سابق قومی کپتان شاہد آفریدی نے نیشنل ہاکی اسٹیڈیم میں آمد کے بعد میڈیا سے گفتگو میں پاکستان کرکٹ بورڈ اور ٹیم کے حوالے سے تفصیلی گفتگو کی۔

    شاہد آفریدی نے سوال کیا کہ رضوان نے اختیارات کی بات، یہ بات انہوں نے آسٹریلیا اور جنوبی افریقہ سے سیریز جیت کر کیوں نہیں کی؟ کپتان کو بہانے نہیں بنانے چاہئیں۔

    پہلگام واقعہ: شاہد آفریدی کا بھارتی سازش پر سخت ردعمل

    ان کا کہنا تھا کہ رضوان کو مسئلہ ہے تو چیئرمین سے بات کرے، میڈیا پر رونا ڈالنا مناسب نہیں ہے۔

    شاہد آفریدی نے کہا کہ پاکستان کرکٹ بورڈ میں تسلسل نہیں ہے، محسن نقوی نے پنجاب میں کافی کام کیا اور وہ ڈلیور کر چکے ہیں۔

    شاہد آفریدی نے کہا کہ محسن نقوی کو ایک عہدہ رکھنا چاہیے، ہر کام مشیروں پر نہیں چھوڑا جاتا، خود بھی دیکھنا پڑتا ہے۔

    آفریدی نے ڈومیسٹک سیزن کے دوران کھلاڑیوں کو غیر ملکی لیگ کی اجازت نہ دینے کا بھی مطالبہ کیا، انہوں نے کہا کہ پی سی بی کو کھلاڑیوں کو ڈومیسٹک سیزن میں لیگ کی اجازت نہیں دینی چاہیے۔