اسلام آباد: شاہد خاقان عباسی نے عوام پاکستان پارٹی کے نام سے نئی پارٹی کا اعلان کرتے ہوئے کہا ہے کہ فارم 47 والے ملک نہیں بنا سکتے۔
تفصیلات کے مطابق سابق وزیر اعظم پاکستان اور مسلم لیگ ن کے سابق رہنما شاہد خاقان عباسی نے عوام پاکستان پارٹی کے نام سے نئی جماعت لانچ کر دی ہے، انھوں نے پریس کانفرنس میں کہا کہ حکمرانوں کو ملک کی کوئی پروا نہیں، سیاسی استحکام ہے، نہ معاشی استحکام۔
انھوں نے کہا اسمبلی میں بیٹھے زیادہ تر لوگ الیکشن ہارے ہوئے ہیں، ن لیگ نے ووٹ کو عزت دو کی سیاست چھوڑ کر اقتدار کی سیاست کو اپنا لیا تو میں نے ان سے معذرت کر لی۔
شاہد خاقان نے حکومت پر کڑی تنقید کرتے ہوئے کہا دنیا کی معیشت انٹرنیٹ پر چل رہی ہے، اور ہم جلسوں کے خوف سے انٹرنیٹ بند کر دیتے ہیں، جو ملک دودھ پر بھی ٹیکس لگا دے وہ اگلے سال کیا کرے گا؟ احتساب ان کا ہونا چاہیے جو خود پر نہیں دوسروں پر ٹیکس لگاتے ہیں۔
اس موقع پر مفتاح اسماعیل نے کہا کہ ہمارا نظام شکاری نظام بن گیا ہے، حکمران عوام کو شکار سمجھ رہے ہیں، پاکستانی نظام صرف اشرافیہ کے کام آتا ہے عام آدمی کو آگے بڑھنے نہیں دیا جاتا۔
اسلام آباد: سابق وزیر اعظم شاہد خاقان عباسی نے کہا کہ ن لیگ کا ٹکٹ نہیں لیا اس کا مطلب ہے پارٹی میں نہیں ہوں۔
سابق وزیر اعظم شاہد خاقان عباسی نے اے آروائی نیوز کو خصوصی انٹرویو میں کہا کہ عام انتخابات میں ن لیگ کا ٹکٹ نہیں لیا اس کا مطلب ہے پارٹی میں نہیں ہوں، 35 سال بعد ایک آدمی ٹکٹ نہ لے تو یہ غیر معمولی اور واضح بات ہے اس کے پیچھے کوئی وجہ ہی ہوگی، شمولیت کے وقت بھی تقریب کی ضرورت نہیں تھی اور نہ آج چھوڑتے وقت ضرورت ہے۔
شاہد خاقان کا کہنا تھا کہ ن لیگ کا ٹکٹ نہ لینے کے بعد پارٹی کے کچھ دوستوں سے بات کی، حلقے کے لیے پارٹی ورکرز کے نام دیے اور کہا ان کو میں سپورٹ کروں گا لیکن ان ورکرز کو ٹکٹ نہیں ملے اور اب ن لیگی امیدوار کو سپورٹ نہیں کروں گا۔
سابق وزیر اعظم کا کہنا تھا کہ ن لیگ کے فیصلے کے بعد میں آزاد ہوں، مجھ پر حلقے کا دباؤ تھا میں خود یا اپنے بیٹےکو آزاد الیکشن لڑاؤں، اگر ورکرز کھڑے رہے تو میں ان کی حمایت کروں گا، پارٹی ان کی ہے انہوں نے جو بہتر سمجھا فیصلہ کر دیا۔
شاہدخاقان عباسی نے سپریم کورٹ کے فیصلے پر ردعمل میں کہا کہ آپ کیسے ایک جماعت سے انتخابی نشان لے سکتے ہیں، الیکشن ایک آئینی حق ہے۔
انہوں نے کہا کہ میں نے سیاست کرنی ہے، اگلا لائحہ عمل الیکشن کے بعد بتاؤں گا، میں جماعت بناؤں یا نہ بناؤں لیکن نئی جماعتیں بنیں گی، کیوں کہ خلا موجود ہے، نئی جماعت چند افراد کا گروپ نہیں ہوگا جو صرف الیکشن کے اردگرد پیدا ہوتا ہے۔
سابق وزیر اعظم نے کہا کہ تینوں جماعتوں نے اپنی کارکردگی اور رویے سے نئی جماعت کیلئے خلا پیدا کیا، نئی جماعت ایسی ہوگی جو بڑے مقصد کے لیے ہو، بہت سے لوگوں نے رابطہ کیا اور میں اتفاق کرتا ہوں نئی جماعت ہونی چاہیے، یہ وہ جماعت نہیں ہوگی جو خاص مقاصد کے لیے بنائی جاتی ہے یا بنتی ہے۔
شاہد خاقان کا کہنا تھا کہ آئی پی پی، ق لیگ، پیٹریاٹ جیسے تماشے کا حصہ نہیں بننا چاہتا، تلوار کو تیر کردیا، شیر کے خلاف گائے کو کھڑا کر کے ایسی شکل بنائی کہ گائے شیر لگے، میرے خلاف گائے کو 12 ہزار ووٹ پڑ گئےجبکہ امیدوار کو کوئی جانتا نہیں تھا۔
سابق وزیر اعظم شاہد خاقان عباسی نے مزید کہا کہ ہم نے ماضی سے کچھ نہیں سیکھا، پرانی فائلیں نکال کرپھر وہی کام شروع کردیتے ہیں، آج کل ہر آدمی سوال کررہا ہے الیکشن ہوں گے یا نہیں حتٰی کہ امیدوار بھی پوچھتا ہے۔
لندن: پاکستان مسلم لیگ (ن) کے قائد نواز شریف سے لندن میں صحافیوں نے شاہد خاقان عباسی سے ملاقات کا احوال پوچھ لیا۔
مسلم لیگ ن کے قائد نواز شریف خوشگوار مُوڈ میں نظر آنے کے باوجود کچھ کہنے کے مُوڈ میں دکھائی نہیں دیے، صحافیوں نے سوال کیا کہ شاہد خاقان عباسی سے بات چیت ہوئی؟
تو نواز شریف نے مُسکراتے ہوئے کہا ظاہر ہے بات چیت ہی ہوئی ہے، صحافیوں نے شاہد خاقان عباسی کی بات کا حوالہ دے کر پوچھا کہ شاہد خاقان نے تمام قیادت کیساتھ مل بیٹھنےکا مشورہ دیا ہے۔
صحافی نے سوال کیا کہ آپ تمام سیاسی قیادت کے مل بیٹھنے پر غور کریں گے؟ تو نواز شریف بولے ضرور ، پھر سب کا شکریہ ادا کیا اور گاڑی میں بیٹھ کر روانہ ہو گئے۔
خیال رہے کہ سابق وزیراعظم شاہد خاقان عباسی نے پارٹی قائد نواز شریف سے لندن میں حسن نواز کے دفتر میں ملاقات کی۔
ملاقات کے بعد میڈیا سے گفتگو میں شاہد خاقان عباسی نے بتایا کہ میرے مسلم لیگ (ن) یا نواز شریف سے کوئی اختلافات نہیں ہیں۔
اسلام آباد: پاکستان مسلم لیگ ن کے رہنما نے اپنی ہی حکومت پر آٹا چوری کا الزام لگا دیا، شاہد خاقان نے مفت آٹا تقسیم میں 20 ارب روپے کی چوری کا بڑا دعویٰ کر دیا ہے۔
تفصیلات کے مطابق سابق وزیر اعظم پاکستان شاہد خاقان عباسی نے مفت آٹا تقسیم کی حکومتی اسکیم میں 20 ارب کی چوری کا انکشاف کیا ہے، انھوں نے سوال اٹھایا ’’کیا ملا اُس غریب کو جس کے لیے 84 ارب روپے خرچ کیے گیے۔‘‘
ن لیگی رہنما شاہد خاقان عباسی ایک بار پھر اپنی حکومت پر برس پڑے ہیں، انھوں نے کہا حکومت اپنی ذمہ داری اور مقصد سے لاعلم ہے، پچھلے 2 سال تمام جماعتیں اقتدار میں رہیں، کوئی ڈیلیور نہیں کر سکی، یہ بہت بڑی ناکامی ہے، ایک دوسرے کے سامنے صف آرا ہونے سے مسائل حل نہیں ہو سکتے۔
دوسری طرف وزیر اطلاعات مریم اورنگزیب نے شاہد خاقان کا دعویٰ جھٹلا دیا ہے، مریم اورنگزیب نے ٹویٹ کیا کہ حکومت نے مہنگائی میں پوری شفافیت، ایمان داری سے مفت آٹا فراہم کیا۔
رمضان میں پنجاب،خیبرپختونخوا , سندھ اور اسلام آباد میں کروڑوں غریبوں کو اس مہنگائی میں پوری شفافیت اور ایمان داری سے مفت آٹا فراہم ہوا، وزیراعظم شہباز شریف نے خود نگرانی کی، شہروں کے دورے کرکے جائزہ لیا۔ تاریخی سکیم کی کامیابی میں انتظامی افسران اور عملے نے دن رات محنت کی جو…
انھوں نے کہا پنجاب، کے پی، سندھ اور اسلام آباد میں کروڑوں غریبوں میں آٹا تقسیم کیا گیا، وزیر اعظم نے مفت آٹے کی تقسیم کے عمل کی خود نگرانی کی، شہباز شریف نے شہروں کے دورے کر کے آٹے کی تقسیم کا جائزہ لیا۔
مریم اورنگزیب نے کہا کہ تاریخی اسکیم کی کامیابی میں انتظامی افسران اور عملے نے دن رات محنت کی۔
واضح رہے کہ لیگی رہنما شاہد خاقان عباسی نے انکشاف کیا تھا کہ مفت آٹے کی تقسیم میں بیس ارب کی چوری ہوئی ہے، وفاقی حکومت کی جانب سے مفت آٹے کی تقسیم میں کئی قیمتی جانیں بھی چلی گئی تھیں۔
لاہور: پاکستان مسلم لیگ کی چیف آرگنائزر مریم نواز نے سینئر رہنما شاہد خاقان عباسی کے تحفظات دور کرنے کی یقین دہانی کرا دی ہے۔
ذرائع کے مطابق پارٹی سیکریٹریٹ ماڈل ٹاؤن میں ن لیگ کا مشاورتی اجلاس منعقد ہوا، جس کی صدارت چیف آرگنائزر مریم نواز نے کی، اجلاس میں تنظیمی دوروں کے حوالے سے مشاورت کی گئی۔
ذرائع ن لیگ کے مطابق اجلاس میں شاہد خاقان عباسی کے پارٹی عہدے سے مستعفی ہونے کی گونج سنائی دی، مریم نواز نے شاہد خاقان کے تحفظات دور کرنے کی یقین دہانی کرا دی، اور کہا کہ وہ ہماری پارٹی کا اثاثہ ہیں۔
پارٹی ذرائع نے بتایا کہ مریم نواز نے اس سلسلے میں گفتگو کرتے ہوئے کہا کہ وہ جلد شاہد خاقان سے ملاقات کریں گی۔
اجلاس میں پارٹی کو مستحکم کرنے کے لیے مریم نواز نے رہنماؤں سے تجاویز بھی مانگیں، عمران خان کے بیانیے پر ن لیگ اپنا ایک نیا بیانیہ سامنے لائے گی۔
ذرائع کا کہنا ہے کہ مریم نواز نے پارٹی امیدواروں کی ہار اور جیت کی تمام تفصیلات مانگ لی ہیں، انھوں نے پارٹی کو انتخابات کے لیے تیار رہنے کی بھی ہدایت کر دی ہے۔
مسلم لیگ نے کے مرکزی رہنما شاہد خاقان عباسی نے کہا ہے کہ اسمبلی کے رولز میں کوئی ابہام نہیں اسپیکر نے آج ووٹنگ نہ کرائی تو جیل جائیں گے۔
پاکستان مسلم لیگ ن کے مرکزی رہنما وسابق وزیراعظم شاہد خاقان عباسی نے قومی اسمبلی آمد کے موقع پر میڈیا کے سوالات کے جوابات دیتے ہوئے کہا کہ اسمبلی رولز میں سب کچھ واضح ہے کوئی ابہام نہیں اگر اسپیکر نے آج عدم اعتماد پر ووٹنگ نہ کرائی تو جیل جائیں گے۔
ایک اور سوال کے جواب میں شاہد خاقان کا کہنا تھا کہ سرپرائز بہت ہوچکے، حکومت کے پاس اب کوئی سرپرائز نہیں ہے۔
لیگی رہنما سے صحافیوں نے جب یہ سوال کیا کہ وزیراعظم عمران خان کہتے ہیں کہ وہ کہیں نہیں جارہے تو شاہد خاقان نے مسکراتے ہوئے کہا کہ عمران خان کہیں اور نہیں جارہے بلکہ واپس گھر جارہے ہیں۔
اس سے قبل شاہد خاقان عباسی نے اے آر وائی نیوز سے گفتگو کرتے ہوئے کہا تھا کہ جیسا بھی الیکشن تھا وزیراعظم آئین کےتحت آیا آئین کے تحت جارہا ہے رونادھونا، گالیاں دھمکیاں اس سےملک نہیں چل سکتا آپ کے پاس اکثریت نہیں رہی اب عدم اعتماد کا احترام کریں۔
انہوں نے کہا تھا کہ صدر، وزیراعظم اور اسپیکر کے پاس بہت سے اختیار ضرور ہیں لیکن وہ آئین نہیں توڑ سکتے آئین کے مطابق ووٹنگ کروائیں اور وقار سے وزیراعظم گھر جائیں ملک کا نظام آگے چلے۔
سابق وزیراعظم نے یہ بھی کہا تھا کہ کسی نے کوئی سازش نہیں کی یہاں سازش صرف عوام نے کی ہے یہ ناکام حکومت تھی جو تنگ تھی ملکی سیاسی کا تقاضا ہے عدم اعتماد کا سامنا کریں اور وقار سے گھر جائیں۔
اسلام آباد : اسلام آباد ہائی کورٹ نے سابق وزیراعظم شاہدخاقان عباسی اور مسلم لیگ ن کی نائب صدر مریم نوازکے خلاف توہین عدالت کی کارروائی کیلئے فیصلہ محفوظ کرلیا۔
تفصیلات کے مطابق اسلام آباد ہائی کورٹ میں مسلم لیگ ن کی نائب صدر مریم نواز اور سابق وزیراعظم شاہد خاقان عباسی کے خلاف توہین عدالت کی درخواست پر سماعت ہوئی ، سماعت اسلام ہائی کورٹ کےچیف جسٹس اطہرمن اللہ نے کی۔
درخوست گزار وکیل نے اپنی درخواست کی پیروی خود کی ، چیف جسٹس نے ریمارکس میں کہا ریٹائرمنٹ کے بعد ثاقب نثار کی حیثیت عام شہری کی ہے، ججز اونچی جگہ پر بیٹھے ہوتے ہیں، ججز کو دل بڑا کرنا چاہئے۔
درخوست گزار وکیل نے بتایا شاہدخاقان عباسی نےکہانوازشریف جیل جا سکتےہیں توثاقب نثارکیوں نہیں، مریم نواز اور شاہدخاقان عباسی توہین عدالت کے مرتکب ہوئے۔
کلثوم خالق ایڈووکیٹ کا کہنا تھا کہ دونوں نےعدلیہ کےخلاف توہین آمیزالفاظ استعمال کیے، ثاقب نثارکےخلاف بات کرکےعدلیہ کواسکینڈلائزکرنےکی کوشش کی گئی، اسلام آبادہائی کورٹ توہین عدالت کے تحت سزا دے۔
جس پر اسلام آباد ہائی کورٹ نے شاہدخاقان عباسی اور مریم نوازکےخلاف توہین عدالت کی کارروائی کیلئے فیصلہ محفوظ کرلیا۔
راولپنڈی : ایل این جی کیس میں نیب کو سابق وزیراعظم شاہد خاقان عباسی سے 63 کروڑ روپے کی وضاحت درکار ہیں، کل637 ملین روپے کی رقم شاہد خاقان اور بیٹے عبداللہ کے اکاؤنٹ میں منتقل ہوئی۔
تفصیلات کے مطابق ایل این جی کیس کی انویسٹی گیشن رپورٹ سامنے آگئی ، جس میں نیب راولپنڈی کو 63 کروڑ روپے کی وضاحت درکار ہے۔
رپورٹ میں کہا گیا ہے کہ شاہدخاقان نےائیربلیواکاونٹ سےپیسےلیکرشیئرزخریدے، انھوں نے اپنا ایک اکاؤنٹ بطور انجینئر کھلوایا، اکاؤنٹ میں ٹرنینٹی ایف زی سی کمپنی سے 5لاکھ ڈالر رقم منتقل ہوئی، رقوم بطورایجنٹ کمیشن سروسز اور انجینئرنگ سروس مد میں وصول گئی۔
انویسٹی گیشن رپورٹ کے مطابق 2016میں 5دنوں کے اندر اس اکاؤنٹ میں57ملین ٹرانسفر ہوئے اور 56ملین ائیر بلیو کو واپس کرتے ہوئے ایئربلیو کے شیئرز خریدے۔
رپورٹ میں بتایا گیا کہ بیٹے عبداللہ نے 49لاکھ کی رقم اپنے والد کو ٹرانسفر کئے جبکہ دسمبر2016 سے جنوری 2017 بھارتی کمپنی سے رقوم منتقل ہوئی، بھارتی کمپنی سے کل 563ملین شاہد خاقان کے اکاؤنٹ میں ٹرانسفر ہوئے۔
نیب رپورٹ میں کہا گیا ہے کہ بیرون ملک سے رقوم شاہد خاقان کے اکاؤنٹ میں وزیر پیٹرولیم کےدورمیں آئی، 5لاکھ 38 ہزار 895 ڈالر شاہد خاقان کے اکاؤنٹ میں منتقل ہوئے۔
رپورٹ کے مطابق رقوم کی منتقلی کس مدمیں ہوئی، شاہد خاقان وضاحت دینےمیں ناکام رہے، کل637 ملین روپے کی رقم شاہد خاقان اور بیٹے عبداللہ کے اکاؤنٹ میں منتقل ہوئی۔
اسلام آباد : مسلم لیگ ن کے رہنما شاہد خاقان عباسی نے دعویٰ کیا ہے کہ الیکشن کمیشن پرالزامات کی وجہ فارن فنڈنگ کیس ہے، فیصلہ حکومت کے خلاف ہی آئے گا۔
تفصیلات کے مطابق سابق وزیراعظم اور مسلم لیگ ن کے رہنما شاہد خاقان عباسی نے میڈیا سے گفتگو کرتے ہوئے کہا وفاقی کابینہ الیکشن کمیشن پر حملہ آور ہوئی ہے، چیئرمین نیب سپریم کورٹ کے جج نہیں ہیں، ہارتسلیم کرنےکی بجائےالیکشن کمیشن پرعدم اعتمادکااظہارکردیا.
شاہد خاقان عباسی نے حکومت پر تنقید کرتے ہوئے کہا کہ حکومت ،وزیرخزانہ اوروزیراعظم ناکام ہوگئے، ہراساں کرنےکی پٹیش نہ دیں توبہترہے، یہ وہی الیکشن کمیشن ہے، جس کے 20 پی او حکومت اٹھا کرلے گئی۔
سینیٹ چیئرمین کے انتخاب کے حوالے سے لیگی رہنما کا کہنا تھا کہ ہدایت میں واضح ہے کہ خانے کے اندر کہیں بھی مہر لگائیں، عدالتوں کے چکر لگیں گے، عدالتیں فیصلہ کریں گی۔
ان کا کہنا تھا کہ اخلاقی قدریں ہوتیں توچیئرمین سینیٹ کہتےمیں ہارگیاہوں، ملک کی جمہوری تاریخ میں ایک باب رقم ہوتا، یہ معاملہ چلنے والا ہے ، نہ چل سکتا ہے یہ لوگ بے نقاب ہوں گے ، یہ لوگ عدالتوں کے سامنے کھڑے ہوں گے۔
سینیٹ الیکشن سے متعلق شاہد خاقان عباسی نے کہا کہ سینیٹ الیکشن 2018کےالیکشن کا ری پلے ہے، ملک اب 2018الیکشن ری پلے برداشت نہیں کرسکتا، یہ لوگ بے نقاب ہوں گے، انہی عدالتوں میں اصلی کیسز میں کھڑے ہوں گے۔
مسلم لیگ ن کے رہنما نے دعویٰ کیا کہ الیکشن کمیشن پر الزامات کی وجہ فارن فنڈنگ کیس ہے، یہ فیصلہ حکومت کے خلاف ہی آئے گا ، فیصلہ آئے گا باہر سے پیسے آئے تھے اور عمران خان نے اپنے اکاؤنٹ میں پیسے ڈالے۔
شہباز گل پر سیاہی پھینکنے کے واقعے پر ان کا کہنا تھا کہ شہبازگل کومیں نہیں جانتا ان پرسیاہی پھینکی گئی ہےتوبہت غلط ہوا، ایسانہیں ہونا چاہیے تھا، ہم نے ایسی سیاست کی کبھی حمایت نہیں کی۔
لاہور : مسلم لیگ ن کی نائب صدر مریم نواز نے کہا ہے کہ گزشتہ روز مینار پاکستان لاہور میں ہونے والے پی ڈی ایم کے جلسے میں رش اتنا تھا کہ شاہد خاقان موٹرسائیکل پر جلسہ گاہ پہنچے، عوام بہت بڑی تعداد میں موجود تھے۔
میڈیا سے گفتگو کرتے ہوئے ان کا کہنا تھا کہ جلسے کی کامیابی پر میں نے اپنے ایم این ایز، ایم پی ایز کو دونوں ہاتھوں سے سلام پیش کیا ہے، انہوں نے اپنی محنت سے جلسے کو کامیاب بنایا ہے۔
مریہم نواز نے کہا کہ وہاں ایک جلسہ جلسہ گاہ میں دوسرا جلسہ گاہ کے پیچھے اور تیسرا جلسہ سڑکوں پر ہورہا تھا، کچھ لوگ ہیں جو منفی پروپیگنڈا کررہے ہیں۔
ان کا کہنا تھا کہ رش اتنا تھا کہ شاہد خاقان نے مجھے بتایا کہ وہ تنگ راستوں کی وجہ سے موٹرسائیکل پر جلسہ گاہ پہنچے ہیں،
رش زیادہ ہونے کی وجہ سے بجلی کی تاریں ٹوٹ گئی تھیں۔
مریم نواز نے بتایا کہ میں حیران ہوں کہ عوام میں جلسے کیلئے ایسا جذبہ میں نے پوری زندگی نہیں دیکھا، مینار پاکستان کے اطراف عوام سمندر کی طرح موجود تھی جانے لگی تو راستہ بنانے کیلئے20،25منٹ لگ گئے۔
انہوں نے کہا کہ جلسہ گاہ میں جگہ کم تھی اس لیے لوگ ہزاروں کی تعداد میں جلسہ گاہ سے باہر بھی موجود تھے، میڈیا پر تنقید کرتے ہوئے انہوں نے کہا کہ ابھی گھر سے نہیں نکلی تھی کہ کچھ لوگوں نے میڈیا پر میرے خلاف پروپیگنڈا شروع کردیا تھا،
ایک سوال کے جواب میں رہنما ن لیگ کا کہنا تھا کہ پی ڈی ایم کو اب عوام لیڈ کررہی ہے، ہم انتخابی حریف ضرور ہیں لیکن ایک دوسرے کے دشمن نہیں، حکومت کی جو رپورٹس ملی ہیں وہاں بھی صف ماتم بچھا ہوا ہے۔
