لاہور : پاکستان عوامی لیگ کے سربراہ شیخ رشید احمد نے وزیر خزانہ اسحاق ڈار کو نواز شریف کا مخبر قرار دے دیا انہوں نے کہا کہ یہ شخص یہاں کی ہر بات وہاں پہنچاتا ہے۔
ان خیالات کا اظہار انہوں نے زمان پارک لاہور میں چیئرمین پی ٹی آئی عمران خان سے ملاقات کے بعد میڈیا سے گفتگو کرتے ہوئے کیا۔
شیخ رشید نے وزیر خزانہ اسحاق ڈار کو نواز شریف کا مخبر قرار دیتے ہوئے کہا کہ یہ شخص یہاں کی ہر بات وہاں پہنچاتا ہے۔
انہوں نے کہا کہ اب شہباز شریف لندن جاکر نوازشریف سے فیصلہ لائیں گے، عدلیہ جیتے گی اور یہ لوگ ہاریں گے۔
میڈیا سے گفتگو میں ان کا کہنا تھا کہ میں نے ایک ماہ پہلے ہی قوم کو آگاہ کردیا تھا کہ یہ مذاکرات نہیں مذاق کی رات بنیں گے۔
شیخ رشید نے کہا کہ پوری قوم کو چیف جسٹس کے پیچھے کھڑا ہونا پڑے گا، شہباز شریف کہتا ہے کہ میں3ججز کو نہیں مانتا۔
انہوں نے کہا کہ یہ لوگ الیکشن نہیں کرائیں گے، کوئی غیرآئینی کام ہوا تو13جماعتیں ذمہ دار ہوں گی، عدلیہ جیتے گی، آئین و قانون جیتے گا، 13جماعتیں الیکشن سے بھاگ رہی ہیں، ان کا ووٹ تندور میں جائے گا۔
ان کی عمران خان پر حملہ کرنے کی پھر کوشش ہے، یہ چاہتے ہیں کہ عمران خان شہید ہو یا گرفتار ہو، ایسی خبر ہے کہ ایسے ہتھیار پکڑے گئے ہیں جو بلٹ پروف گاڑی کو ہٹ کرسکیں، عمران خان کے پاس کال دینے کے سوا کوئی راستہ نہیں۔
لاہور : عوامی مسلم لیگ کے سربراہ شیخ رشید احمد نے پرویزالہٰی کو پی ٹی آئی کا صدر بنانے پر کہا ہے کہ ان کو جنہوں نے صدر بنایا اس کی منطق کا ان ہی کو معلوم ہوگا، ان کا کہنا ہے کہ عمران خان کی جگہ میں ہوتا تو خود گرفتاری دے چکا ہوتا۔
اے آر وائی نیوز کے پروگرام اعتراض ہے میں خصوصی بات چیت کرتے ہوئے شیخ رشید نے کہا کہ عمران خان کی گرفتاری ہو یا نہ وہ کوئی فرق نہیں پڑتا اگر وہ گرفتار ہوئے تو پارٹی کی کمان کون سنبھالے گا یہ فیصلہ پی ٹی آئی نے کرنا ہے۔
ایک سوال کے جواب میں ان کا کہنا تھا کہ عمران خان کی جگہ میں ہوتا تو اب تک خود گرفتاری دے چکا ہوتا اور ہو بھی سکتا ہے کہ میں گرفتار ہوجاؤں اور ماہ رمضان جیل میں ہی گزار دوں، میں جیل چلا گیا تو وہاں سے بھی الیکشن لڑ سکتا ہوں اور عمران خان جیل گئے تب بھی الیکشن وہی جیت جائیں گے۔
ق لیگ کے حوالے سے ایک سوال پر شیخ رشید نے کہا کہ میں سوچ بھی نہیں سکتا تھا کہ چوہدری شجاعت اور پرویزالہٰی الگ ہوں گے، چوہدری برادران کو الگ کرنے میں نگراں وزیراعلیٰ پنجاب محسن نقوی نے اہم کردار ادا کیا، وہ آصف زرداری کا فرنٹ مین ہے، سندھ سے پیسہ جمع کرتا ہے۔
حکمران اتحاد پر تبصرہ کرتے ہوئے انہوں نے کہا کہ پی ڈی ایم تو ٹوٹ چکی ہے 10 ماہ میں ان کا کوئی اجلاس نہیں ہوا، سب جماعتیں اپنے نشانات پر الیکشن لڑیں گی، مولانا فضل الرحمان نے ساری پیدا گیری کی وزارتیں لی ہیں، انہوں نے ن لیگ کو گندا کردیا اور مریم نواز کو تقریروں پر لگادیا۔ الیکشن یہ لڑ نہیں سکتے اور کہہ رہے کہ سیکیورٹی نہیں ہے، عام انتخابات کرانے میں سیکیورٹی کا کوئی مسئلہ نہیں ہے،اصل مسئلہ صرف یہی ہے، الیکشن ون سائیڈڈ ہیں۔
پی ٹی آئی کارکن علی بلال عرف ظل شاہ کے قتل کے حوالے سے شیخ رشید نے کہا کہ ظل شاہ کی پوسٹ مارٹم رپورٹ پر محسن نقوی جیل جائیں گے، یہ لوگ پریس کانفرنس کررہے کہ ظل شاہ کو ٹرک نے مار دیا تو عمران خان پر پرچہ کیو ں کیا گیا؟ ظل شاہ کی پوسٹ مارٹم رپورٹ کی بنیاد پر محسن نقوی گرفتار ہوگا۔
لاہور : عوامی مسلم لیگ کے سربراہ شیخ رشید نے ہر مشکل وقت میں چیئرمین پی ٹی آئی عمران خان کا ساتھ نبھانے کا عہد کرتے ہوئے کہا ہے کہ انہیں گرفتار کرنے والا بے وقوف ہوگا،انہوں نے نوازشریف کو بھی وطن واپسی کا چیلنج دے دیا۔
لاہور میں تحریک انصاف کے سربراہ عمران خان نے سے ملاقات کے بعد صحافیوں سے گفتگو کرتے ہوئے شیخ رشید نے کہا کہ عمران خان سے آدھاگھنٹہ ملاقات رہی انہوں نے مجھے حکم دیا ہے کہ ابھی واپس نہیں جانا۔
انہوں نے کہا کہ میں ایک سیٹ کی سیاست کرتا ہوں اور مشکل وقت میں عمران خان کا ساتھی ہوں،
18کو میری پیشی ہے اور 19،20اور21 کو عمران خان نے لاہور کی میٹنگ میں بلالیا ہے، بدھ کو اس ٹرک پر ہوں گا جس پر عمران خان ہوگا۔
شیخ رشید کا کہنا تھا کہ کوئی بے وقوف ہی ہوگا جو عمران خان کو گرفتار کرے گا کیونکہ وہ اس سے اور مقبول ہوگا اور جو عمران خان کو جیل بھیجے گا اور نااہل کروائے گا وہ الیکشن میں عمران خان کا مقابلہ بھی نہیں کرسکتا، عمران خان پر 74کیسز پہلے ہی ہیں پورے 100کیسز بنا دیں۔
ملک میں عام انتخابات سے متعلق انہوں نے اپنا تبصرہ بیان کرتے ہوئے کہا کہ ہماری خواہش ہے کہ پورے ملک میں قومی اور صوبائی کے انتخابات اکٹھے ہونے چاہئیں، موجودہ حکومت کے پاس کوئی پالیسی نہیں، شہبازشریف کو چاہیے کہ 72گھنٹے میں اسمبلی توڑکر اور صوبوں اور مرکز میں اکٹھے الیکشن کرائے۔
ایک سوال کے جواب میں عوامی مسلم لیگ کے سربراہ نے کہا کہ سپریم کورٹ کا فیصلہ تین ججز کا نہیں بلکہ 17ججز کا فیصلہ ہے، ساتھ ہی انہوں نے نواز شریف کو چیلنج دیتے ہوئے کہا کہ آپ کا بھائی اس وقت وزیراعظم بھی ہے، نوازشریف اگر تم میں ہمت ہے تو وطن واپس آؤ۔
اسلام آباد : عوامی مسلم لیگ کے سربراہ شیخ رشید احمد نے سپریم کورٹ کے حالیہ فیصلے، موجودہ حکومت کی مشکلات، عام انتخابات اور مریم نواز کے حوالے سے اپنے روایتی انداز میں خیالات کا اظہار کیا ہے۔
اے آر وائی نیوز کے پروگرام دی رپورٹز میں خصوصی گفتگو کرتے ہوئے انہوں نے شہباز شریف کو مشورہ دیا کہ وہ قومی اسمبلی بھی توڑ دیں اور پورے ملک میں مکمل الیکشن کروائیں،13جماعتیں اس وقت شدید ٹوٹ پھوٹ اورخلفشار کا شکار ہیں، اچھا ہے الیکشن کروالیں، ن لیگ کا لاہورمیں ہی برا حال ہوجائے گا۔
شیخ رشید نے کہا کہ امید ہے کہ موجودہ ملکی حالات 15،10دنوں میں بہتر ہوجائیں گے، ان کو آخری وارننگ جائے گی پھر ان کی امیدیں ٹوٹ جائیں گی، ہمارے لوگ سامراج کو زیادہ اہمیت دے رہے ہیں، سمجھ رہے ہیں کہ ہمیں زیادہ خیرات مل جائے گی، اب 98،97والا ماحول نہیں رہا کہ سپریم کورٹ پرحملہ ہوجائے، افواج اپنا رول ادا کریں گی۔
چیئرمین پی ٹی آئی عمران خان کی سیکیورٹی کے حوالے سے پوچھے گئے ایک سوال کے جواب میں شیخ رشید نے کہا کہ عمران خان کو عدالت بلایا جاتا ہے جبکہ ان پر حملہ کرنے والوں کو ویڈیو لنک کی سہولت دی جارہی ہے، عمران خان نے مجھ سے کہا ہے کہ ان میں میرا مقابلہ کرنے کی ہمت نہیں ہے، یہ لوگ مجھے نااہل یا ختم کروانا چاہتے ہیں۔
مسلم لیگ ن کی رہنما مریم نواز کے گوجرانوالہ میں ورکرز کنونشن سے خطاب کے درعمل میں انہوں نے کہا کہ مریم بی بی یہ کوشش کریں گی پھر کوئی آڈیو ویڈیو آجائے لیکن لیک ویڈیو آڈیو نا کوئی سن رہا ہے نہ دیکھ رہا ہے۔
سپریم کورٹ کے حالیہ فیصلے پر شیخ رشید کا کہنا تھا کہ سپریم کورٹ نے بہت بڑا کام کیا ہے، یہ کام آسان نہیں تھا، 2ججز نے بھی یہ کہا ہے کہ 90دن میں الیکشن ہونے چاہئیں، اگر انہیں عقل ہے تو پنجاب کے پی اور قومی اسمبلی کے الیکشن ساتھ کرادیں۔
ملکی معیشت کی بدحالی کا تذکرہ کرتے ہوئے انہوں نے کہا کہ اسحاق ڈار کی نااہلی کی وجہ سے آئی ایم ایف سے ڈیل مکمل نہیں ہوئی اور شرح سود20فیصد تک ہوگئی، انہوں نے بتایا کہ اسحاق ڈار کی سیاست میں پہلی انٹری میرے ساتھ ہی ہوئی تھی ، وہ اس وقت اتفاق فاؤنڈری کے منشی تھے، پرویز مشرف کو اسحاق ڈار کی وجہ سے آئی ایم ایف کو جرمانہ ادا کرنا پڑا تھا۔
موجودہ پی ڈی ایم حکومت پر کڑی تنقید کرتے ہوئے شیخ رشید کا کہنا تھا کہ یہ تھک چکے ہیں، پی ڈی ایم میں پھوٹ پڑچکی ہے، ان لوگوں کو قومی اسمبلی کے امیدوار نہیں مل سکیں گے، یہ لوگ سوچ کے آئے تھے کہ دو سال لگالیں گے لیکن ملک ان کے گلے پڑگیا ہے، ان کی وجہ سے ریاست داؤ پر لگی ہوئی ہے۔
انہوں نے مزید کہا کہ آج کل مولانا فضل الرحمان مجھے کچھ بدلا ہوا سا نظرآرہا ہے، اس نے ساری پارٹی کوغرق کردیا، فضل الرحمان اس باپ کا بیٹا ہے جس نے ذوالفقارعلی بھٹو جیسے لیڈر کو اس کے دورعروج میں شکست دی تھی۔
راولپنڈی : پاکستان عوامی لیگ کے سربراہ شیخ رشید احمد نے کہا ہے کہ ایم کیو ایم کا بھی 15جنوری کو پتا چل جائے گا کہ آر ہوتی ہے یا پار؟ وہ اسی تنخواہ پر کام کرتی ہے یا نہیں؟
یہ بات انہوں نے اے آر وائی نیوز کے پروگرام دی رپورٹرز میں خصوصی گفتگو کرتے ہوئے کہی انہوں نے کہا کہ آرمی چیف نے کہا ہے کہ ملک نازک موڑ سے گزررہا ہے، معیشت تباہ ہوتی ہے تو ملک تباہ ہوتے ہیں، ملک اب سرحدوں پر حملوں سے نہیں ٹوٹ سکتے۔
شیخ رشید نے کہا کہ ہمیں بھی لوگ محبت کی نظر سے نہیں دیکھ رہے کیونکہ وہ سمجھتے ہیں ہم بھی اس نظام کا حصہ ہیں، بلاول بھٹو نے پونے دو ارب روپے دوروں پر خرچ کردیے، وہ پوری دنیا میں گیا لیکن کابل نہیں گیا، سمجھ نہیں آتی بلاول بھٹو کابل جانے سے کیوں ڈرتا ہے؟
ان کا کہنا تھا کہ زمینی حقائق یہ ہیں کہ لوگ تباہ ہوگئے ہیں جس کا حساس اداروں نے بھی نوٹس لیا ہے، یہ حکمران صبح سے شام تک صرف عمران خان پر ہی گفتگو کرتے ہیں، نئے سال میں 13 جماعتیں سیاسی طور پر دفن ہوجائیں گی، ان کو عوام کے جوتے پڑیں گے۔
ایک سوال کے جواب میں ان کا کہنا تھا کہ دنیا کہہ رہی ہے کہ پہلے اپنا گھر ٹھیک کرو پھر ہم امداد دیں گے، کوئی دوست ملک پاکستان کی مدد کرنے کو تیار نہیں ہے، اس ساری صورتحال میں صرف غریب عوام کی حالت مزید بری ہورہی ہے۔
شیخ رشید نے کہا کہ ان 3سے4 ماہ میکے دوران حکمرانوں کے لیے کسی پل سکھ چین نہیں ہوگا، ان کو بھی پتا چل گیا ہے کہ بات بہت آگے نکل گئی ہے، اس وقت پاکستان کو بچانے کےلیے الیکشن کرانے پڑیں گے، الیکشن نہ ہوئے تو ایسے حالات بھی ہوسکتے ہیں سیاستدان ملک نہ سنبھال سکیں۔
انہوں نے بتایا کہ پاکستان کے پاس قرضے کی قسط دینے کے لیے بھی پیسے نہیں اور نہ ہی مزید قرضہ ملنے کی امید ہے، مجھے حلقے کے لوگ کہتے ہیں کہ سیاستدان تو سارے خوشحال ہیں، وہ ان ہی لوگوں کو واپس لائے ہیں جنہیں منی لانڈرنگ پر باہرنکالا گیا تھا۔
سربراہ عوامی لیگ کا کہنا تھا کہ جو بھی کرلیں آنے والے الیکشن عمران خان کے ہی ہیں، یہ جو کام عمران خان کیخلاف کرتے ہیں الٹا ان ہی کے گلے میں پڑتے ہیں، عمران خان سادہ زبان میں کہہ رہا ہے الیکشن ہی حل ہے، ان کو سمجھ آگئی ہے کہ پی ڈی ایم مسترد ہوچکی ہے۔
عوامی مسلم کے سربراہ شیخ رشید احمد نے بلاول بھٹو زرداری کو لال حویلی آنے کی دعوت دے دی ان کا کہنا ہے کہ صدقے جاؤں، بلاول صدر پاکستان کو دھمکی دے رہا ہے۔
اپنے ایک بیان میں انہوں نے کہا کہ نوازشریف نے اگر واپس آنا ہو تو اس کے پاس سفارتی پاسپورٹ ہے، انہیں اگر کورونا ہے تو اللہ اس کو صحت دے اور اگرڈرونا ہے تو اللہ حوصلہ دے۔
شیخ رشید نے کہا کہ قوم سے معافی مانگتا ہوں کہ مجھے بہت پہلے ٹوئٹر پر چلے جانا چاہیے تھا، انہوں نے کہا کہ جی کا جانا ٹھہر گیا ہے،26نومبر کو راولپنڈی میں عوام کا ٹھاٹھیں مارتا سمندر ہوگا۔
ایک سوال کے جواب میں ان کا کہنا تھا کہ صدقے جاؤں! بلاول زرداری صدر پاکستان کو دھمکی دے رہا ہے، میں کہتا ہوں کہ بلاول دھمکی دینے سے پہلے لال حویلی سے ہوکر جائے۔
انہوں نے کہا کہ عمران خان کی سیکیورٹی کا اہم مسئلہ ہے، پہلے بھی انہیں مارنے کی کوشش کی گئی، ہماری کوشش ہوگی کہ عمران خان کا خطاب مغرب کے وقت سے پہلے ہوجائے کیونکہ عمران خان کو سیکیورٹی تھریٹس ہیں۔ ڈاکٹرز نے بھی عمران خان کو کہا ہے کہ وہ سفر نہ کریں۔
شیخ رشید احمد نے کہا کہ افواہیں زیرگردش ہیں کہ ٹیکنوکریٹ حکومت آنے والی ہے لیکن عمران خان کو کوئی ٹیکنوکریٹ حکومت قبول نہیں، عمران خان کہتا ہے کہ عدلیہ اور فوج دونوں میرے ادارے ہیں جو بھی آئے وہ میرٹ پر آئے۔
ان کا مزید کہنا تھا کہ پاکستان کی تاریخ کا26نومبر کو تاریخی اجتماع ہوگا، سارا پاکستان راولپنڈی پہنچ رہا ہے، ہمارامطالبہ ایک ہی ہے کہ جلد از جلد صاف شفاف انتخابات کرائے جائیں۔
راولپنڈی : سابق وزیرِ داخلہ شیخ رشید کا کہنا ہے کہ آج کے ضمنی الیکشن کے مکمل نتائج آنے کے بعد عمران خان اکثریت سے جیتیں گے۔
یہ بات انہوں نے میڈیا سے گفتگو کرتے ہوئے کہی، انہوں نے کہا کہ ضمنی الیکشن میں عمران خان کے مقابلے میں13جماعتیں ایک طرف ہیں اور وہ دوسری طرف تنہا کھڑا ہے۔
شیخ رشید نے کہا کہ آج کی رات بڑی اہم ہے، عمران خان کو بھی لانگ مارچ کے اعلان کیلئے آج رات کے فیصلے کا انتظار ہوگا، ہر علاقے میں برادریاں ہوتی ہیں۔
انہوں نے کہا کہ لانگ مارچ کیلئے ہر چیز عمران خان کے حق میں جارہی ہے، کل جوبائیڈنگ نے جو بیان دیا اس پر عوامی ردعمل آرہا ہے، میرے خیال میں عمران خان کوکال دینی چاہیے۔
سابق وزیرِ داخلہ نے حکمرانوں کو مخاطب کرتے ہوئے کہا کہ ہم آپ کے مخالف ضرور ہیں لیکن اس قوم کا حصہ ہیں، کیا آپ ہم پر ڈرون ماریں گے؟ چور چور قومی اور بین الاقوامی نعرہ بن گیا ہے۔
شیخ رشید احمد نے مزید کہا کہ 13پارٹیوں کی اس وقت ایسی پوزیشن نہیں کہ وہ عوام میں جاسکیں، مجھے یقین ہے کہ عمران خان کے مقابلے میں ان 13جماعتوں کو شکست فاش ہوگی۔
اسلام آباد : وفاقی زویر داخلہ شیخ رشید نے کہا ہے کہ شہباز شریف نواز شریف سے زیادہ کرپٹ ہے، وزیراعظم عمران خان منتخب اور مقابلہ کرنے والا آدمی ہے۔
پریس کانفرنس سے خطاب میں ان کا کہنا تھا کہ آئندہ50دن سیاست کیلئےاہم ہیں عمران خان سرخرو ہوں گے،14فروری کو ایرانی وزیر داخلہ بھی پاکستان تشریف لارہے ہیں، اس کے علاوہ وزیراعظم چین کے دورے کے بعد روس کا دورہ بھی کرنے جارہے ہیں۔
شیخ رشید نے کہا کہ وہ اپوزیشن جماعتیں جو کسی بل میں بھی حکومت کو شکست نہ دے سکیں اب ان کے پیٹ میں درد ہورہا ہے، مجھے تو یہ23مارچ کو بھی آتے دکھائی نہیں دے رہے۔
وفاقی وزیر نے کہا کہ سیاسی طور پر یہ اپوزیشن آپ کو کیا پیغام دینا چاہتی ہے، فضل الرحمان ،ن لیگ اور پیپلزپارٹی کی الگ الگ سیاست ہے، فنانس بل میں بھی ان کے بندوں نے ہمیں ووٹ دیا۔
انہوں نے بتایا کہ گزشتہ روز وزیراعظم نے رینجرز، ایف سی و دیگر تنخواہوں میں15فیصد اضافے کا اعلان کیا، ہمارے جوانوں کو اضافی تنخواہ مارچ کے مہینے سے ملے گی، کل درخواست کی دیگر سول سروس کی تنخواہوں میں بھی اضافہ کیا جائے۔
وزیر داخلہ اپوزیشن کو مخاطب کرتے ہوئے کہا کہ آپ عدم اعتماد کے بھی بندے نہیں لاسکتے اپنے بندوں کا خیال کرو ہماری چارپائی کے نیچے جھاڑو دے رہے ہو، اگر ان کو بندے لانے ہوتے توساڑھے3سال پہلے لے آتے۔
شیخ رشید نے کہا کہ سب سے مضبوط کیسز شہباز شریف اور حمزہ شہباز کے ہی ہیں، شہباز شریف نواز شریف سے زیادہ کرپٹ ہے، اس کے کیس میں بڑی جان ہے، فیصل واوڈا نااہلی کیخلاف سپریم کورٹ جائیں گے، عمرامین گنڈاپور کو بھی اسٹے ملا ہے امید ہے کہ قانونی حق استعمال کریں گے۔
وفاقی وزیر نے کہا کہ ہمارے افغان طالبان حکومت سےاچھے تعلقات ہیں، افغان طالبان اپنی سرزمین پاکستان کیخلاف استعمال نہیں ہونے دیں گے، کرناٹک میں کل مسلمان لڑکی نے ہندوستان کی سیاست کو بےنقاب کردیا۔،
میں پہلے دن سے کہتا تھا یہ وہ لوگ نہیں جو ٹی وی پر ہوتے ہیں، ان کی سیاست50دن کی ہے، اس کے بعد عمران خان مزید مضبوط ہوگا، عمران خان کرپشن کیخلاف ایک ہتھیار ہے اس ہتھیار کا نام دیانت ہے،
شیخ رشید کا کہنا تھا کہ کوئی بتائے میری منسٹری کے دوران اسلام آباد میں اگر کرپشن ہوئی ہو، پاکستان میں 70کیسز میگا کرپشن کے ہیں ان کا فیصلہ ہونا چاہیے، حکومت کوشش کرے گی کہ ڈیڑھ سال میں70کرپشن کیسز کا فیصلہ ہو، نیب کی عدالتوں میں کیسز نے کافی وقت لیا ہے۔
اسلام آباد : وزیر داخلہ شیخ رشید احمد نے کہا ہے کہ ڈھائی سال ریلوے کی ترقی کیلئے کام کیا، وزارت داخلہ کے ساتھ مجھے کچھ اورذمہ داریاں بھی دی گئی ہیں جو شیئر نہیں کرسکتا۔
اسلام آباد میں میڈیا سے گفتگو کرتے ہوئے انہوں نے کہا کہ ریلوے میرے دل کے قریب رہی ہے، ڈھائی سال ریلوے کی ترقی کیلئے کام لیا، کچھ غلط کیا تو ذمہ داری لیتا ہوں، انشااللہ پاکستان ریلوے ترقی کرے گی۔
شیخ رشیداحمد نے بتایا کہ وزارت داخلہ کے ساتھ مجھے کچھ اورذمہ داریاں بھی دی گئی ہیں جو شیئر نہیں کرسکتا، وزارت داخلہ کا چارج ابھی تک نہیں لیا،پیر کو لوں گا۔
وزیر داخلہ مولانا فضل الرحمان کا خطاب سن کر دکھ ہوا، مولانا فضل الرحمان کی نظراسلام پر نہیں اسلام آباد پر ہے، عمران خان کبھی بھی اسرائیل کوتسلیم نہیں کرسکتے، ختم نبوت کا وفادار ہوں، مینار پاکستان پر عمران خان نے سیاست کی بلندیوں کو چھوا تھا۔
مینار پاکستان پرپی ڈی ایم مزید پستی کا شکار ہوجائے گی، انہوں نے اپنے بچوں کو لندن میں بم پروف گھروں میں رکھا ہے، یہ لوگ غریب کے بچے کو کہتے ہیں ہم پر قربان ہوجاؤ، یہ سوداگر ہیں ملکی سیاست میں اتوار بازار لگانے جارہے ہیں۔
شیخ رشید نے کہا کہ ایک شخص کو ہٹانے کیلئے یہ تمام متحد ہوچکے ہیں، اپوزیشن بتائے کس سے بات کرے گی کیوں شرمارہی ہے، مارچ میں سینیٹ کے الیکشن کے بعد نئی صورتحال سامنے آئے گی۔
سینیٹ الیکشن کے بعد سیاست نئی شکل اختیار کرے گی، جو ریڈ لائن کراس کرے گا اس کےخلاف قانون حرکت میں آئے گا،
تمام سیاستدانوں کی جانوں کوخطرہ ہے مجھ پر بھی قاتلانہ حملہ ہوا تھا۔
شاہدرہ میں کل بڑےدہشت پکڑے،نیکٹانےبھی خبردارکیاہے، تمام دینی قیادت کو دل سے لگاؤں گا،اپوزیشن بےشک باہر نکلے مگر ذہن میں رکھے کہ حکومت5سال پورے کرےگی۔
اسلام آباد : وزیر داخلہ شیخ رشید احمد نے کہا ہے کہ اپوزیشن کو کھلی اجازت ہے جلسہ کریں کوئی پابندی نہیں، ملک میں آئین و قانون کی بالادستی ہوگی، عمران خان تمام مسائل کامیابی سے حل کریں گے۔
یہ بات انہوں نے اسلام آباد میں پریس کانفرنس سے خطاب کرتے ہوئے کہی، ان کا کہنا تھا کہ میں جدید بارڈر مینجمنٹ کاسسٹم لاؤں گا، غریبوں کو بھی پاسپورٹ کی سہولت حاصل ہوگی۔ عمران خان دور میں اللہ اور اس کے رسول کے علم کو برتری حاصل ہوگی۔
13دسمبر کے پی ڈی ایم کے جلسے سے متعلق ایک سوال پر ان کا کہنا تھا کہ اپوزیشن کو کھلی اجازت ہے کہ وہ جلسہ کریں کوئی پابندی نہیں ہے، اصل طاقت میڈیا کی ہے ،عوام کو پیغام جارہا ہے۔
انہوں نے کہا کہ سیاستدان پیغام دیتا ہے گلی گلی دعوت نامے نہیں بانٹا،یہ لوگ پچھلے دو ماہ سے مہم چلارہے ہیں ان کی امیدیں بر نہیں آئیں گی، آپ اسی مینار پاکستان سے سیاست میں نیچے جائیں گے۔
یہ سمجھتے ہیں جلسے سے کچھ ہوگا مگر عمران خان کہیں نہیں جارہا، یہ کہتے ہیں عمران خان سے بات نہیں ہوسکتی تو بتائیں کس سے بات کرنا چاہتےہیں، دراصل یہ لوگ اپنی لوٹی ہوئی دولت کو بچانا چاہتے ہیں۔
شیخ رشید نے اپوزیشن رہنماؤن سے کہا کہ آپ اسلام آباد آئیں، ہم نے بھی پڑاؤ کیا تھا لیکن اس وقت بھی کوئی نتیجہ نہیں نکلا تھا، عمران خان تمام مسائل کامیابی اور بخوبی سے حل کرلیں گے، ملک میں جو کوشش کی جارہی ہے انشاءاللہ وہ ناکام ہوگی۔
بطور وزیرداخلہ تمام مدارس کی آواز بنوں گا، شیخ رشید
انہوں نے واضح طور پر کہا کہ میں بطور وزیرداخلہ کہتا ہوں کہ تمام مدارس کی آواز بنوں گا، ملک کو اندر سے خطرہ ہے ، انتشار کیلئے غیرملکی فنڈنگ کی جارہی ہے۔
شیخ رشید نے پیش گوئی کرتے ہوئے کہا کہ مستقبل میں وزیر اعظم عمران خان کے لئے کامیابیاں اور خوشخبریاں ہیں، ملک سے لوٹ مار اور منی لانڈرنگ کا خاتمہ ہوگا، ملک میں آئین و قانون کی بالادستی ہوگی۔
ایک سوال کے جواب میں انہوں نے کہا کہ مجھے کوئی ٹاسک نہیں دیا گیا اپنی ذمہ داریوں کا پتہ ہے، پی ڈی ایم کے گلوں میں کچرا پھنسا ہوا ہے، عمران خان اگلا الیکشن بھی بھرپور طریقےسے جیتے گے۔
حکومت نوازشریف کو واپس لانے کی پوری کوشش کررہی ہے، نوازشریف کو لانے میں کچھ قانونی رکاوٹیں ہیں جنہیں دور کیا جارہا ہے۔
