Tag: Shaikh Rasheed

فیصل آباد: وزیر داخلہ رانا ثنااللہ کا کہنا ہے کہ بارہ سے چودہ ماہ کے درمیان الیکشن ہونے جارہے ہیں، آئندہ عام انتخابات میں نون لیگ پنجاب سے کلین سوئپ کرے گی۔

تفصیلات کے مطابق فیصل آباد میں میڈیا سے گفتگو کرتے ہوئے وزیر داخلہ رانا ثناء اللہ نے کہا کہ شیخ رشید کہتے ہیں مجھے جان سے مار دیا جائے گا، وہ خدا کا خوف کریں مجھ پر الزامات مت لگائیں، مجھے کیا ضرورت ہے کہ کچھ کروں، میرے خلاف تھانوں میں درخواستیں جمع کروانے سے کچھ نہیں ہوگا۔

رانا ثناء اللہ نے کہا کہ پاکستان کی چوہتر سالہ تاریخ میں کوئی بدبخت ایسا نہیں آیا جس نے چاند رات کو بھی احتجاج کیا ہو، کسی شہر میں بھی ان کی تعداد چند درجن سے زیادہ نہیں تھی۔

 انہوں نے کہا کہ پاکستان اس وقت مشکل حالات سے دوچار ہے،ایک فتنہ پرور آدمی اس ملک پر مسلط رہا، ایک نالائق اور نااہل ٹولے نے ملک کی اکانومی کا بیڑہ غرق کردیا، جب یہ حلقوں میں جائیں گے تو انہیں بتانا پڑے گا کہ مہنگائی اتنی کیوں بڑھی، ہم کوشش کریں گے کہ مہنگائی کو بھی نیچے لاسکیں

انہوں نے کہا کہ حکومت عمران خان کے خلاف مقدمہ میں مدعی نہیں ہے، جس شخص کے مذہبی جذبات کو ٹھیس پہنچی اس نے مقدمہ درج کروایا ہے، عمران خان اور ان کے ساتھیوں کے خلاف سینکڑوں درخواستیں تھانوں میں پڑی ہیں، جن کا پراسس چل رہا ہے۔

یہ بھی پڑھیں: عمران خان مقدمات سے ڈرنے اور گھبرانے والا نہیں

 رانا ثنا اللہ کا کہنا تھا کہ عمران خان یا شیخ رشید کی گرفتاری وزیراعظم شہباز شریف کے حکم کے بغیر نہیں ہو سکتی، یہ کہہ دیں کہ فرح خان نے عمران خان کی فرنٹ وومن کے طور پر کروڑوں روپیہ نہیں لوٹا، یہ لوگ فرح خاں کو واپس پاکستان لائیں، گارنٹی دیتا ہوں کہ فرح خان کو گرفتار نہیں کیا جائے گا۔

شیخ رشید کے بھتیجے اور پی ٹی آئی کے ایم این اے شیخ راشد شفیق کے حوالے سے وفاقی وزیر رانا ثنااللہ نے کہا کہ کیا راشد شفیق پاکستان سے سعودی عرب یہ سب کروانے نہیں گئے تھے، جو لوگ برطانیہ سے آئے وہاں سب احتجاج صاحبزادہ جہانگیر نے کروائے تھے، اگر ہم یہ سب چیزیں سامنے لے کر آئیں تو پھر تو معاملہ مزید خراب ہوگا۔

وفاقی وزیر کا کہنا تھا کہ اگلے ایک سال کے اندر الیکشن ہو رہے ہیں، الیکشن میں ن لیگ پنجاب سے کلین سویپ کرے گی، ہمارا چھ تاریخ کو اٹک میں جلسہ ہوگا، اس کے بعد پنجاب اور کے پی کے میں جلسے کریں گے۔