شیخوپورہ : شوہر نے ایک گھنٹے کے دوران بیوی اور دو بچوں سمیت 5 افراد کو گولیوں سے بھون ڈالا، مرنے والوں میں اس کی سالی بھی شامل ہے۔
تفصیلات کے مطابق شیخوپورہ کے علاقے فاروق آباد میں بیک وقت پانچ افراد کے قتل کی واردات ہوئی ہے جس میں ایک ہی ملزم نے یکے بعد دیگرے فائرنگ کرکے 5 افراد کو موت کے گھاٹ اتار دیا۔
اس حوالے سے پولیس کا کہنا ہے کہ ملزم تنویر نے اپنی بیوی، 2 بچوں اور سالی کو قتل کرنے کے بعد فلورملز کے مالک کو بھی قتل کردیا۔ پولیس نے فوری کارروائی کرتے ہوئے ملزم کو گرفتار کرلیا ہے۔
پولیس کے مطابق پہلے ملزم تنویر نے اپنے گھر میں 2بچوں سمیت اپنی بیوی کو اندھا دھند فائرنگ کرکے ان کو قتل کر دیا اور دوسری واردات میں محلہ نور پورہ میں اپنی سالی کے گھر جاکر اس کو بھی گولیاں ماردیں۔
ملزم نے اس سے قبل قتل کی پہلی واردات تھانہ صدر شیخوپورہ کے ایریا جھامکے کے قریب فلور مل میں کی تھی جہاں اس نے فلور مل کے مالک نذیر ہاشمی کو گولیاں مار کر قتل کر دیا تھا۔
پولیس کا کہنا ہے کہ تنویر نامی ایک ہی قاتل نے ایک گھنٹے کے دوران یہ تینوں وارداتیں کیں، ملزم کو گرفتار کرکے مقدمہ درج کرلیا گیا ہے، مزید تفتیش جاری ہے۔
