کراچی: ایف آئی اے امیگریشن نے 1 لاکھ درہم کی بیرون ملک اسمگلنگ ناکام بنا دی، جانچ پڑتال پر کرنسی جعلی نکلنے کا انکشاف ہوا ہے۔
تفصیلات کے مطابق ایف ائی اے امیگریشن نے ملتان ایئرپورٹ پر ایک کارروائی میں ایک لاکھ درہم کی بیرون ملک اسمگلنگ کی کوشش ناکام بنا دی، بعد ازاں جانچ پڑتال پر مذکورہ نوٹ جعلی پائے گئے۔
شارجہ جانے والے 3 مسافروں کو گرفتار کر لیا گیا ہے، جن میں خالق نور، نور علی جان اور قاسم اللہ شامل ہیں، گرفتار ملزمان کا تعلق شمالی وزیرستان سے ہے، جو فلائٹ نمبر 293 PK پر شارجہ کے لیے سفر کر رہے تھے۔
ملزمان پر شک گزرنے پر ایف ائی اے حکام نے ملتان ایئرپورٹ پر روک کر تلاشی لی تو ایک لاکھ درہم (جعلی) برآمد ہوئے، ملزمان نے جعلی کرنسی نوٹ بیگ کے خفیہ خانوں میں چھپائی تھی۔
ترجمان ایف آئی اے کے مطابق ملزمان کو مزید قانونی کارروائی کے لیے ملتان سرکل منتقل کر دیا گیا، ڈائریکٹر ایف آئی اے ملتان زون خالد انیس نے ٹیم کی کارکردگی کو سراہا اور آئندہ بھی ایسی کارروائیوں کے لیے چوکس رہنے کی تاکید کی۔
