کراچی : سندھ ہائی کورٹ نے سابق وزیراطلاعات سندھ اور پی پی رہنما شرجیل میمن سمیت دیگر ملزمان کی ضمانت منسوخ کرکے گرفتاری کا حکم دے دیا۔
تفصیلات کے مطابق محکمہ اطلاعات سندھ میں 6 ارب روپے کی کرپشن کیس کی سماعت سندھ ہائیکورٹ کے چیف جسٹس کی سربراہی میں دو رکنی بینچ نے کی ، سماعت کے دوران عدالت نے شرجیل میمن سمیت 13 ملزمان کی عبوری ضمانت میں توثیق کی درخواست مسترد کردی۔
سندھ ہائیکورٹ نے شرجیل میمن و دیگر کی ضمانتیں منسوخ کرتے ہوئے سندھ ہائیکورٹ نے انھیں گرفتار کرنے کا حکم دیدیا۔
شرجیل میمن اور دیگرملزمان کمرہ عدالت میں موجود ہیں ، نیب کی درخواست پر شرجیل میمن کی گرفتاری میں نیب کی مدد کے لیے رینجرز سندھ ہائیکورٹ پہنچ گئی ہے، نیب نے شرجیل میمن سے درخواست کی ہے کہ کمرہ عدالت سے باہر آجائیں۔
ترجمان نیب کا کہنا ہے کہ عدالتی حکم پر شرجیل میمن سمیت دیگر افراد کو گرفتار کیا جائیگا، عدالت کے فیصلے پر فوری عملدرآمد کیا جائے گا، کل شرجیل میمن کو پیش کرکے 14دن کا ریمانڈ حاصل کیاجائیگا۔
مزید پڑھیں : شرجیل میمن کا نام ای سی ایل سے خارج کرنے کی درخواست مسترد
واضح رہے کہ کہ شرجیل میمن سمیت12ملزمان پرمحکمہ اطلاعات سندھ میں کرپشن کاالزام ہے۔ پیپلز پارٹی کے رہنما شرجیل میمن کو وطن واپس پہنچنے پر نیب نےاسلام آباد ایئرپورٹ پر حراست میں لے لیا تھا تاہم ضمانتی دستاویزات کی جانچ پڑتال کے بعد انہیں رہا کردیا گیا تھا۔
خیال رہے کہ شرجیل میمن سندھ حکومت کے وزیراطلاعات رہے ہیں اور ان پر اربوں روپے کی کرپشن کے الزامات ہیں جبکہ نیب نے شرجیل میمن کے خلاف کرپشن کا ریفرنس دائر کررکھا ہے اور ان کا نام بھی ای سی ایل میں شامل ہے۔
