پشاور: وزیر اعلیٰ پنجاب شہباز شریف کا کہنا ہے کہ پشاور میرا دوسرا نہیں پہلا گھر ہے اپنے پہلے گھر آیا ہوں۔ سراج خان کو مسلم لیگ ن میں شمولیت پر مبارک باد دیتا ہوں۔ نواز شریف کل بھی ہمارے قائد تھے، آج بھی ہیں اور رہیں گے۔

تفصیلات کے مطابق صوبہ خیبر پختونخواہ کے دارالحکومت پشاور میں وزیر اعلیٰ پنجاب شہباز شریف نے ورکرز کنونشن سے خطاب کیا۔

اپنے خطاب میں ان کا کہنا تھا کہ سراج خان کو مسلم لیگ ن میں شمولیت پر مبارک باد پیش کرتا ہوں۔ جب بھی پشاور آیا یہاں کے لوگوں نے شاندار میزبانی کی۔

انہوں نے کہا کہ مسلم لیگ ن کا صدر بننے کے بعد پشاور کا یہ پہلا دورہ ہے۔ ’خیبر پختونخواہ میرا پہلا پیار ہے‘۔

شہباز شریف نے کہا کہ نواز شریف کل بھی ہمارے قائد تھے، آج بھی ہیں اور رہیں گے۔ نواز شریف نے امریکی امداد ٹھکرا کر پاکستان کو ایٹمی طاقت بنایا۔ عوام اور افواج کی قربانیوں سے دہشت گردی کا خاتمہ قریب ہے۔

انہوں نے کہا کہ ن لیگ کو حقیقی معنوں میں قائد اور اقبال کا پاکستان بنائیں گے۔ آرمی پبلک اسکول کے شہدا کا خون رائیگاں نہیں جائے گا۔

شہباز شریف نے پاکستان تحریک انصاف کے چیئرمین عمران خان پر تنقید کرتے ہوئے کہا کہ عمران خان کے تبدیلی کے نعروں کے باوجود پشاور میں کچھ نہیں بدلا۔ عمران خان 5 سال میں بھی صوبے میں ایک میگا واٹ بجلی پیدا نہ کر سکے۔

انہوں نے کہا کہ پنجاب کی طرح پختونخواہ میں انڈومنٹ فنڈ ہوتا تو تعلیمی صورتحال مختلف ہوتی۔ یہ صوبہ قدرتی حسن اور وسائل سے مالا مال ہے۔ ’موٹر وے نہ بنی ہوتی تو آج جی ٹی روڈ پر قطاریں لگی ہوتیں، میٹرو کو جنگلہ بس کہنے والوں کو اب پشاور کے لیے میٹرو یاد آگئی‘۔

خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

لاہور: وزیر اعلیٰ پنجاب شہباز شریف کا کہنا ہے کہ اورنج لائن منصوبے پر تنقید کی عوام کو مذمت کرنی چاہیئے۔ موقع ملا تو سندھ اور خیبر پختونخواہ کو پنجاب کے ہم پلہ کریں گے۔

تفصیلات کے مطابق وزیر اعلیٰ پنجاب شہباز شریف کا کہنا تھا کہ پاک فوج کے ساتھ مل کر دہشت گردی کو ناکام بنایا۔ ’نیب آج کل بہت زیادہ متحرک ہے، اسے سراہتا ہوں۔ نیب کو بلا امتیاز سب کے خلاف کارروائی کرنی چاہیئے‘۔

انہوں نے کہا کہ اورنج لائن منصوبہ پاکستان تحریک انصاف کے باعث 22 ماہ تاخیر کا شکار رہا۔ ’تحریک انصاف کا اورنج لائن منصوبے پر الزام تھوک کر چاٹنا ہے۔ لاہور ہائیکورٹ کا منصوبے پر 300 صفحے کا فیصلہ آیا، فیصلے میں ایک لائن کرپشن کی نہیں‘۔

انہوں نے کہا کہ لاہور ہائیکورٹ کے فیصلے کے بعد جو ثبوت لانے ہیں وہ لے آئیں۔ اورنج لائن منصوبے پر رونےدھونے کی عوام کو مذمت کرنی چاہیئے۔

شہباز شریف کا کہنا تھا کہ چوہدری نثار سے ملاقات ہوتی رہتی ہے اس میں خبر والی کوئی بات نہیں۔ موقع ملا تو سندھ اور خیبر پختونخواہ کو پنجاب کے ہم پلہ کریں گے۔

وزیر اعلیٰ نے کہا کہ اللہ کرے الیکشن وقت پر اور شفاف ہوں۔ ’الیکشن کمیشن اور اسٹیبلشمنٹ نے یقین دہانی کروائی ہے کہ الیکشن وقت پر ہوں گے‘۔

خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔