Tag: shehbaz sharif

سانحہ سندر فیکٹری کے ذمہ داروں کے خلاف سخت کارروائی ہوگی، شہباز شریف

لاہور : وزیر اعلیٰ پنجاب شہباز شریف نے کہا ہے کہ گورننس بہتر نہ کرنے والے ادارے اور وزیر اب ہمارے ساتھ نہیں چل سکتے۔

ان خیالات کا اظہار انہوں نے لاہور میں سندر انڈسٹریل اسٹیٹ میں منہدم ہونے والی فیکٹری کے دورے کے بعد اعلیٰ سطح کے اجلاس سے خطاب کرتے ہوئے کیا۔

شہباز شریف نے صوبائی کابینہ میں تبدیلی کا اشارہ دے دیا، اجلاس سے خطاب کرتے ہوئے وزیر اعلی پنجاب نے کہا کہ واقعہ کے ذمہ داروں کے خلاف سخت کارروائی جائے گی اور ذمہ دار سزا سے بچ نہیں پائیں گے۔

اس موقع پر وزیر اعلی پنجاب نے متعلقہ حکام کی سخت سرزنش کرتے ہوئے کہا کہ متعدد وزراء اور صوبائی سیکرٹریز اپنا کام صحیح طریقے سے نہیں کررہے۔

فیکٹری حادثے میں بھی شدید محکمہ جاتی غفلت پائی جاتی ہے، انہوں نے کہا کہ متعلقہ اداروں کو ہر صورت اپنی گورننس کو بہتر کرنا ہوگا۔ گورننس بہتر نہ کرنے کے اداروں کے سربراہ اور وزیر اب ہمارے ساتھ نہیں چل سکتے۔

نومبر 18, 2015
غیرملکی سرمایہ کاروں کو ہر ممکن سہولیات فراہم کی جائینگی، شہباز شریف

لاہور: وزیر اعلیٰ پنجاب میاں شہباز شریف نے کہا ہے کہ پنجاب سرمایہ کاری کیلئے ایک محفوظ مرکز بن کر ابھرا ہے،روزگار پیدا کئے بغیر دہشت گردی کو شکست نہیں دی جاسکتی۔

ان خیالات کا اظہار انہوں نے لاہور میں ’پنجاب میں تجارت کے مواقع‘کے موضوع پر سیمینار سے خطاب کرتے ہوئے کیا، سیمینار میں دنیا بھر کے ڈھائی سو سے زائد سرمایہ کاروں کی شرکت کی۔

شہباز شریف کا کہنا تھا کہ پاکستان اپنے اہداف حاصل کرنے میں کامیاب ہو گیا ہے ۔ترکی اور چین نے نواز شریف حکومت پر اعتماد کا اظہار کیاہے۔

ان کا کہناتھا کہ غیرملکی سرمایہ کاروں کا اعتماد حکومت کے مثبت اور ٹھوس اقدامات کی غمازی کرتا ہے۔

سرمایہ کاروں کا پنجاب میں توانائی، معدنیات، صنعت، زراعت، انفراسٹرکچر، انفارمیشن ٹیکنالوجی، صحت اور تعمیراتی شعبوں میں سرمایہ کاری کرنے پر گہری دلچسپی کا اظہار خوش آئند ہے۔

وزیر اعلیٰ پنجاب نے کہا کہ غیرملکی سرمایہ کاروں کو ترجیحی بنیادوں پر سہولتیں دیں گے،پنجاب کے 300 طلبا و طالبات کو چینی زبان سکھانے کیلئے بیجنگ بھجوایا جا رہا ہے، چینی زبان سیکھنا وقت کی ضرورت ہے۔

انہوں نے بتایا کہ پاکستان،چین اور ترکی کے درمیان 158معاہدوں اور مفاہمت کی کئی یادداشتوں پر دستخط ہوئے ہیں۔

انہوں نے کہا کہ میٹرو اور ویسٹ منیجمنٹ میں ترکی کی سرمایہ کاری قابل قدرہے۔ ترکی نے پاکستان میں کئی شعبوں میں سرمایہ کاری کی ہے ،ترکی کے ساتھ اقتصادی تعلقات مزید بہتر کرنے کے شاندار مواقع موجود ہیں۔

نومبر 7, 2015
بلدیاتی انتخابات میں آخر شیر ہی دھاڑا، رانا ثنا اللہ

لاہور: وزیر قانون پنجاب رانا ثناءاللہ نے کہا ہے کہ پنجاب کے بلدیاتی انتخابات میں آخر شیر ہی دھاڑا۔۔۔شیر کے کان اور دم کاٹنے کے دعوے کرنے والے بھاگ گئے۔

لاہور میں میڈیا سے گفتگو کرتے ہوئے رانا ثناءاللہ کا کہنا تھا پاکستان میں الیکشن ہوں تو ایک جیتتا ہے اور دوسرے کے ساتھ دھاندلی ہوجاتی ہے ہار کوئی نہیں مانتا۔

رانا ثناءاللہ کا کہنا تھا کہ میرے خلاف مقدمات کی بڑی وجہ میڈیا ہےکہیں بھی کچھ ہوتا ہے تو میڈیا اسے مجھ سے منسوب کردیتا ہے۔

نومبر 4, 2015
راولپنڈی میں میٹرو پل سےپتھرگرنے کے سبب نوجوان جاں بحق

راولپنڈی: میٹرو بس کے پل سے وزنی پتھرگرنے کے سبب ایک غریب نوجوان جاں بحق ہوگیا ہے۔

تفصیلات کے مطابق آج بروز اتوار میٹرو پل سے کئی کلو وزنی ایک پھتر نیچے موجود نوجوان پر آگرا، متاثرہ شخص کو شدید زخمی حالت میں اسپتال منتقل کیا گیا جہاں وہ زخموں کی تاب نہ لاتے ہوئے جاں بحق ہوگیا۔

پولیس کے مطابق میٹرو بس ٹریک پر مختلف نوعیت کے حادثات میں اب تک 13 افراد اپنی جان سے ہاتھ دھوبیٹھے ہیں۔

وزیراعلیٰ پنجاب شہباز شریف نے واقعے کا نوٹس لیتے ہوئے تحقیقات کی ایک اعلیٰ سطحی کمیٹی قائم کرنے کا حکم دے دیا ہے۔

پاکستان مسلم لیگ ن کے رہنماء حنیف عباسی نے اے آروائی نیوز سے خصوصی گفتگو کرتے ہوئے واقعے پر انتہائی افسوس کا اظہار کرتےہوئے کہا کہ کمیٹی کی تحقیقات کی روشنی اور مقتول کے ورثاء جسے قصوروارٹھہرائیں گے اس کے خلاف اس سانحے کامقدمہ درج ہوگا۔

انہوں نے یہ بھی کہا کہ اس نوعیت کے واقعات ترقی یافتہ ممالک میں پیش آتے رہتے ہیں، میٹرو پل میں کہیں کسی قسم کی لیکج یا تکنیکی خرابی نہیں ہے۔

راولپنڈی میٹرو بس ٹریک کا افتتاح 4 جون 2015 کو وزیراعظم نواز شریف نے کیا تھا اور اس منصوبے پر 44 ارب روپے لاگت آئی تھی۔

اکتوبر 18, 2015
قصور ویڈیواسکینڈل: وزیراعلیٰ پنجاب نے متعدد سینئر پولیس افسران کو معطل کردیا

لاہور : وزیراعلٰی پنجاب شہباز شریف نے قصور ویڈیو اسکینڈل میں غفلت برتنے پر ایڈیشنل آئی جی اسپیشل برانچ کو او ایس ڈی جبکہ ڈی پی او قصور اور ایس پی اسپیشل برانچ قصور سمیت متعدد افسران کو معطل کر دیا۔

پنجاب حکومت کے ترجمان کے مطابق وزیر اعلٰی شہباز شریف نے قصور ویڈیو اسکینڈل میں غفلت برتنے اور ملزمان کو بروقت گرفتار نہ کرنے پر ایڈیشنل آئی جی اسپیشل برانچ عارف مشتاق کو او ایس ڈی بنانے کے احکامات جاری کر دیئے ہیں۔

جبکہ شواہد موجود ہونے کے باوجود کارروائی نہ کرنے پر ڈی پی او قصور رائے بابر سعید، ایس پی سپیشل برانچ قصور، ڈی ایس پی سپیشل برانچ قصور اور ڈی ایس پی سمیت متعدد افسران کو معطل کر دیا۔

ذرائع کے مطابق ایوان وزیر اعلٰی میں ہونے والے اعلٰی سطح کے اجلاس میں وزیراعلٰی نے قصور ویڈیو اسکینڈل پر آئی جی پنجاب سمیت سنیئر پولیس افسران کی سخت سرزنش کی۔

ان کا کہنا تھا کہ اڑھائی ماہ گزر جانے کے باوجود متعلقہ پولیس کا زیادتی کا شکار ہونے والے بچوں کی داد رسی نہ کرنا اور اسپیشل برانچ جیسے ادارے کے افسران کا اس واقعہ سے بے خبر ہونا انتہائی افسوسناک ہے۔

وزیر اعلٰی نے اس موقع پر ڈی آئی جی ابوبکر خدابخش کی قیادت میں 5 رکنی جوائنٹ انوسٹی گیشن ٹیم تشکیل دیتے ہوئے اسے 14 روز میں تحقیقات مکمل کرنے کی ہدایت بھی کی۔

اگست 12, 2015
مہاجروں کے قتل عام میں شریف برادران برابر کے شریک ہیں، ایم کیو ایم

کراچی : متحدہ قومی موومنٹ کی رابطہ کمیٹی نے کہاہے کہ کراچی آپریشن کی آڑ میں محب وطن مہاجروں کے سیاسی ، معاشی اور جسمانی قتل عام میں شریف برادران بھی برابر کے شریک ہیں اور انشاء اللہ بہت جلد ظالموں کو عبرتناک انجام کا سامنا کرنا پڑے گا ۔

ایک بیان میں رابطہ کمیٹی نے وزیراعلیٰ پنجاب میاں شہباز شریف اور وزیراعلیٰ بلوچستان سرفراز بگٹی کے بیانات شدیدالفاظ میں مذمت کرتے ہوئے کہا کہ قائد تحریک الطاف حسین نے سچائی بیان کرکے پانچ کروڑ مہاجروں کے دلوں کی ترجمانی کی ہے ۔

بین الاقوامی ذرائع ابلاغ اور انسانی حقوق کمیشن آف پاکستان کی رپورٹ سے ثابت ہوگیا ہے کہ کراچی آپریشن کی آڑ میں کروڑوں عوام کی منتخب نمائندہ جماعت ایم کیوایم کو کچلنے کی سازش کی جارہی ہے اورمہاجروں کے بنیادی انسانی حقوق پامال کیے جارہے ہیں لیکن اس ظلم کے خلاف میاں شہبازشریف اور سرفراز بگٹی کو ایک لفظ تک بولنے کی توفیق نہیں ہوئی ۔

رابطہ کمیٹی نے کہاکہ ہم مذہب اورہم وطن شہریوں پر ڈھائے جانے والے مظالم کی حمایت کرنے والے خود پاکستان کے سب سے بڑے دشمن اور بدمعاش ہیں۔رابطہ کمیٹی نے کہاکہ جب قانون نافذ کرنے والے ادارے اور حکومت اپنے شہریوں کی جان ومال کی دشمن بن جائے تو ظلم کا شکار مہاجر عوام کو انصاف کون فراہم کرے گا؟

رابطہ کمیٹی نے کہاکہ بانیان پاکستان کی اولادوں نے عزت سے جینے اور عزت سے مرنے کا فیصلہ کرلیا ہے اور انشاء اللہ بہت ظالموں اور ان کا ساتھ دینے والوں کو انجام عبرتناک ہوگا۔

رابطہ کمیٹی نے کہاکہ میاں شہبا زشریف ، قوم کو جواب دیں کہ وزیراعظم میاں محمد نوازشریف اور وفاقی وزیرداخلہ چوہدری نثارعلی خان کی باربار یقین دہانیوں کے باوجود کراچی آپریشن کیلئے آج تک مانیٹرنگ کمیٹی کیوں تشکیل نہیں دی گئی؟

میاں شہبازشریف کو کراچی میں رینجرز کی جانب سے ایم کیوایم کے بے گناہ رہنماوٴں ، ذمہ داروں اور کارکنوں کی غیرقانونی گرفتاریاں، حراست کے دوران ان پرکیا گیابہیمانہ تشدد،گرفتارشدہ کارکنان کی گمشدگی اوربے گناہ کارکنان کے ماورائے عدالت قتل کے واقعات کیوں دکھائی نہیں دیئے؟

بانیان پاکستان کی اولادوں کو مسلسل غیرقانونی اورغیرانسانی ظلم کا نشانہ بناکر کیا پاکستان دشمنی کامظاہرہ نہیں کیاجارہا؟ شہبازشریف ،خواجہ آصف کی جانب سے مسلح افواج کے خلاف توہین آمیز زبان استعمال کرنے پر کیوں خاموش رہے؟

رابطہ کمیٹی نے کہاکہ عدالت کی جانب سے رابطہ کمیٹی کے اسیررکن قمرمنصور کو طبی معائنہ کیلئے اسپتال بھیجنے کا حکم دینے کے باوجود انہیں کو علاج ومعالجہ کی سہولت سے محروم رکھنے کاعمل کیا توہین عدالت نہیں ہے؟ اور توہین عدالت کے اس عمل پر میاں شہباز شریف کی زبان پر کیوں تالے لگے ہوئے ہیں؟

اگست 2, 2015
پوری قوم بھارت کو پکارنے والے لیڈرکے انجام کی منتظرہے، شہباز شریف

لاہور: وزیراعلیٰ پنجاب شہباز شریف نے کہا ہے کہ پاک فوج اورمملکتِ پاکستان کے خلاف الطاف حسین کی ہرزہ سرائی سے ثابت ہوگیا ہے کہ وہ دشمن کیلئے کام کررہے ہیں۔

وزیرِاعلیٰ پنجاب شہبازشریف نے اپنے ایک بیان میں کہا ہے کہ الطاف حسین کے واویلا سے ثابت ہوگیا ہے کہ کراچی میں رینجرز نے درست قدم اٹھایا ہے۔

انہوں نے کہا کہ فوج کے خلاف ہرزہ سرائی سے الطاف حسین کا اصل چہرہ بے نقاب ہوگیا ہے، پوری پاکستانی قوم بھارت کو پکارنے والے نام نہاد لیڈر کے انجام کی منتظر ہے۔

الطاف حسین نے اردو بولنے والوں سمیت پاکستان کے 20 کروڑعوام کے دلوں کو زخمی کیا ہے اوروہ اسے کبھی معاف نہیں کریں گے۔

الطاف حسین نے گزشتہ روزامریکی شہرڈلاس میں متحدہ کے سالانہ کنونشن سے ٹیلی فونک خطاب میں کہا تھا کہ کارکنان اقوام متحدہ ،وائٹ ہاؤس اور نیٹو سے کراچی میں فو ج بھیجنے کا مطالبہ کریں۔

ان کا کہنا تھا کہ بھارت خود بزدل اورڈرپوک ملک ہے اگراس میں ذرا سی بھی غیرت ہوتی تو پاکستان کی سرزمین پرمہاجروں کا خون نہ ہونے دیتے۔

الطاف حسین نے کارکنوں کو ہدایت کی کہ وہ امریکی اخباروں کو خط لکھیں اورپاکستان کی اصل صورتحال سے آگاہ کریں۔

اگست 2, 2015
شریف خاندان نے ایک روپے کا قرض معاف نہیں کرایا، شہبازشریف

لاہور: وزیراعلیٰ پنجاب شہباز شریف کا کہنا ہے کہ شریف خاندان نے ایک روپے کا قرض معاف نہیں کرایا، مشرف نے دوہزار دو میں سرکاری نوٹیفیکیشن کے ذریعے اربوں کے قرضے معاف کیے ۔

وزیراعلیٰ پنجاب شہباز شریف نے نیب رپورٹ مسترد کردی، لاہور میں پریس کانفرنس کرتے ہوئے شہباز شریف نے کہا کہ سود سمیت پانچ ارب سے زائد قرضے بینکوں کو ادا کئے۔

ان کا کہنا تھا کہ مشرف دور میں سرکاری نوٹیفیکیشن کے ذریعے قرضے معاف کئے گئے۔

شہباز شریف نے کہا کوئی سیاستدان قرضہ معاف نہ کرانےکادعویٰ نہیں کرسکتا،بینکوں کو ادائیگی کےکلیئرنس سرٹی فکیٹس بھی موجود ہیں۔

جولائی 8, 2015
اسلام آباد کے بعد صوبوں میں بھی نظام صلوٰة کے قیام کا فیصلہ

اسلام آباد : وفاقی وزیر مذہبی امورسردار یوسف کا وزیر اعلیٰ پنجاب شہبازشریف سے ٹیلیفونک رابطہ کیا ہے، تفصیلات کے مطابق وفاقی حکومت نے اسلام آباد کے بعد صوبوں میں بھی ایک ہی وقت میں اذان اور نظام صلوة کا فیصلہ کیا ہے۔

اس سلسلے میں وفاقی وزیرمذہبی امور سردار یوسف نے وزیر اعلی پنجاب شہباز شریف سے ٹیلیفونک رابطہ کیا ہے ۔وزیر اعلیٰ پنجاب شہباز شریف نے سردار یوسف کو پنجاب میں نظام صلوة کیلئے معاونت کی یقین دہانی کرائی ہے۔

وفاقی وزیر مذہبی امور سردار یوسف نے کہا ہے کہ حکومت صوبوں میں ایک ہی وقت میں اذان اور نماز کا نفاذ چاہتی ہے۔انہوں نے کہا کہ وفاقی حکومت نے اسلام آباد کے بعد صوبوں میں بھی نظام صلوة کا فیصلہ کیا ہے۔

انہوں نے کہا کہ نظام صلوة کے تحت ہر شہر کی مساجد میں ایک ہی وقت میں اذان اور نماز ادا ہوگی۔نظام صلوة کے لئے پنجاب بھر میں کمیٹیاں تشکیل دی جائیں گی۔نظام صلوة کیلئے صوبائی حکومتوں سے بھی مشاورت کی جائے گی۔

جون 29, 2015
پنجاب میں ترقیاتی منصوبےجاری، کراچی کھنڈرات میں تبدیل

کراچی : پنجاب میں توبےشمارترقیاتی منصوبےبن رہے ہیں، لیکن سندھ اوردوسرے صوبے ان پروجیکٹ سے محروم ہیں۔ وزیراعلٰی پجناب شہبازشریف کےمقابلےمیں سندھ کےسائیں کی کارکردگی پرسوال اٹھ رہےہیں۔

شمسی بجلی گھر، میٹرو بس سروس، دانش اسکول پروگرام، آشیانہ اسکیم، پندرہ ارب لاگت سے دیہی روڈز پروگرام اور بے شمار تعمیراتی کام پنجاب میں جاری ہیں۔

وزیراعلیٰ پنجاب نے صوبے میں ترقیاتی منصوبوں کے ڈھیر لگادیے۔ دوسری جانب سید قائم علی شاہ سات سال سے وزیراعلیٰ سندھ کی کرسی پر ڈیرہ جمائے بیٹھے ہیں۔

اس کے باوجود سب سے زیادہ ریونیو دینے والا کراچی کھنڈر بنتا جا رہا ہے۔ سڑکیں، پُل، انڈر پاسز ٹوٹ پھوٹ کا شکار ہیں۔

تو دوسری جانب تھر میں کوئلے سے بجلی بنانے کا منصوبہ، ہو یا پورٹ قاسم پربجلی پراجیکٹ یا کوئی اور سندھ حکومت کا کوئی منصوبہ بھی پایہ تکمیل تک نہیں پہنچ سکاہے۔ اندرون سندھ کے شہری بھی تباہ حالی کا شکار ہیں۔

مئی 5, 2015