لاہور : آمدن سے زائد اثاثہ جات اور منی لانڈرنگ کیس میں شہباز شریف کی فیملی نے ابھی تک نیب سوالات کے جوابات جمع نہیں کروائے، نیب کو سوالنامہ ارسال کئے دس سےزیادہ دن گزر گئے۔
تفصیلات کے مطابق نیب کی جانب سے چیئرمین نیب کی ہدایت پر شہبازشریف کی اہلیہ اوربیٹیوں کو سوالنامہ بھجوایا گیا تھا، نیب کو سوالنامہ ارسال کئے دس سےزیادہ دن گزرگئے لیکن انہوں نے ابھی تک نیب کو سوالوں کے جوابات نہیں بھجوائے۔
شہباز شریف کی بیگم نصرت شہباز، بیٹیوں جویریہ اور رابعہ سے 2008 سے 2017 تک کے آمدن کے ذرائع، بیرون ملک سے آنے والی رقوم، مختلف کمپنیوں میں شیئرز، موصول ہونے والے تحفے تحائف اور دیگر تفصیلات مانگی گئی ہیں جبکہ ماڈل ٹاؤن اورڈونگاگلی کی رہائشگاہ کی خریداری کےذرائع معلوم کئے گئے ہیں۔
یاد رہے 13 اپریل کو نیب نے اثاثہ جات کیس میں شہباز شریف خاندان کے خلاف تحقیقات کا دائرہ کار مزید وسیع کرتے ہوئے شہباز شریف کے پورے خاندان کو بیان کیلئے طلب کیا تھا۔
مزید پڑھیں : نیب نے شہباز شریف کی اہلیہ اور بیٹیوں کو سوالنامہ بھجوادیا
نیب نے منی لانڈرنگ کیس میں نصرت شہباز کو 17 اپریل کو ذاتی حیثیت میں طلب کیا جبکہ اثاثہ جات کیس میں 18 اپریل کو رابعہ شریف اور 19 اپریل کو جویریہ شریف کو بھی طلب کیا گیاتھا۔
بعد ازاں چیرمین نیب جسٹس ر جاوید اقبال نے شہبازشریف کی اہلیہ اوربیٹیوں طلبی کے نوٹسز منسوخ کرنے کا حکم دیا تھا اور سوالنامہ بھجوانے کی ہدایت کی تھی۔
واضح رہے کہ نیب نے گزشتہ ماہ شہباز شریف کی دو بیگمات کے اثاثوں کی تفصیلات بھی حاصل کرلی تھیں، نصرت شہباز 69 لاکھ 56 ہزار پانچ سو شیئرز کی مالک اور تہمینہ درانی کے پاس گوادر میں چار کنال کے پلاٹ اور ایک ایکڑ بیش قیمت زمین کا انکشاف ہوا تھا۔
