اسلام آباد: وزیر مملکت برائے داخلہ شہریار آفریدی کا کہنا ہے کہ تمام قانون نافذ کرنے والے ادارے اور حکومت ایک صفحے پر ہیں۔ حکومت ریاست کی رٹ پر کوئی سمجھوتہ نہیں کرے گی۔
تفصیلات کے مطابق وزیر مملکت برائے داخلہ شہریار آفریدی نے قومی اسمبلی کے اجلاس میں اظہار خیال کرتے ہوئے کہا کہ پورا پاکستان جب ایک ہوگا تو اندرونی اور بیرونی مسائل حل ہوں گے۔
شہریار آفریدی کا کہنا تھا کہ اتحاد سے ہی اندرونی اور بیرونی چیلنجز سے نمٹا جا سکتا ہے، اہم ایشو ہے جس پر لوگ اپنی سیاسی دکانیں چمکاتے ہیں۔
انہوں نے کہا کہ بلاول بھٹو نے جو مؤقف اپنایا اس سے خوشی ہوئی، بلاول بھٹو نے درست کہا ہمیں مل کر آگے بڑھنا ہے۔ مذہب کے نام پر ریاست کے اندر ریاست بنائی گئی، مذہب کے نام پر اپنی دکانیں بنائی گئیں۔
وزیر مملکت نے کہا کہ نئے پاکستان میں مذہب کے نام پر کوئی اپنی دکان نہیں چمکائے گا۔ گرجا گھر ہو یا مندر، گردوارا ہو یا مسجد سب کو برابری کا حق ہے۔ آئین پاکستان تمام اقلیتوں کو برابری کے حقوق دیتا ہے۔
انہوں نے کہا کہ ایسا ممکن نہیں پسند کے فیصلے پر مٹھائیاں اور پسند نہ آنے پر فساد ہو، تمام قانون نافذ کرنے والے ادارے اور حکومت ایک صفحے پر ہیں۔ حکومت ریاست کی رٹ پر کوئی سمجھوتہ نہیں کرے گی۔ بات چیت کے ذریعے معاملہ حل کرنے پر اتفاق ہے۔
شہریار آفریدی نے کہا کہ فیصلہ ہوا ہے بات چیت سے معاملے کا حل نکالا جائے، کوئی سوچتا ہے کندھا استعمال کر کے اپنا فائدہ اٹھائے گا یہ نہیں ہوگا۔ کوئی سوچتا ہے سیاسی مقاصد حاصل کرے گا تو اللہ انصاف کرے گا۔
انہوں نے کہا کہ وزیر اعظم کی ہدایت پر تمام پارٹیوں کے نمائندوں سے ملے ہیں، اپوزیشن کے ساتھ بیٹھ کر ریاست کے مسائل کا حل نکالیں گے۔ ملک میں امن ہوگا تو تمام جماعتیں سکون سے سیاست کر سکیں گی۔
