Tag: sheikh rasheed

لاہور : وفاقی وزیر ریلوے شیخ رشید نے ریلوے میں چالیس ارب روپے کا خسارہ ختم کرنے کا چیلنج قبول کرلیا اور کہا کرپٹ سابقہ حکومت نے چالیس ارب کا خسارہ جہیز میں دیا ہے، میں نہیں چاہتا جب ریلوے چھوڑوں تو میرا منہ بھی کالا ہو۔

تفصیلات کے مطابق لاہور میں وفاقی وزیر ریلوے شیخ رشید نے میڈیا سے گفتگو کرتے ہوئے کہا کہ عوام سہولت سے ٹرین کا سفر چاہتے ہیں، ریلوے میں کسی سے انتقام نہیں لیا جائے گا، کراچی والوں سے امید ہے فریٹ دگنا کریں گے۔

شیخ رشید کا کہنا تھا کہ آدھا ریلوےنیب زدہ ہے، بھارت نے جس کمپنی سے خریداری کی ہم نے اسی سے دگنی قیمت پر کی، ہمیں جہیز میں37سے 40ارب کا خسارہ ملا ہے، بتایا گیا ریلوے میں سب اچھا ہے لیکن حقیقت کچھ اور ہے۔

وفاقی وزیر ریلوے نے کہا کہ ریلوے کی پٹری بھی کرائے پر دینے کے لئے تیارہیں، جہاں سڑک نہیں وہاں بھی ٹرین لے جانا چاہتا ہوں، نجی کمپنیاں ہم سے شراکت داری میں اسٹیشن ،فوڈ اسٹریٹ بنائیں، جو بھی چیز بنائی جائے گی وہ ریلوے کی ہی ملکیت رہے گی۔

ان کا کہنا تھا ریلوے کی سب سے پہلے پشاورسے لاہورڈبل ٹریک بناؤں گا، زمینوں پر کالونیوں کا معاملہ کابینہ میں لے جائیں گے، ریلوے ریسٹ ہاؤسز فروخت کے لئے دستیاب ہیں، جو نئی ٹرین چلائیں گے، اس پر 10 فیصد رعایت ہوگی۔

شیخ رشید نے کہا کرپشن پر زیرو ٹالرنس ہوگی، ریلوے کے جو لوگ نیب کو مطلوب ہوں گے، وہ سرنڈر کریں گے، وعدہ کرتا ہوں ریلوے ٹھیک ہوگی، میری ذمےداری ہے، 18گھنٹے کام کروں گا،قوم سے وعدہ کیا ہے۔

31ان کا کہنا تھا کہ 31 اسٹیشن اپ گریڈ کرنے جارہے ہیں، گریڈ 4کے 5ہزار ملازمین کے لئے اپارٹمنٹس بنائیں گے، ہمارے پاس زمین دستیاب ہے، پیسہ نہیں ہے۔

وفاقی وزیر ریلوے نے کہا جو ٹرین منافع بخش ہوگی وہی بحال ہوسکےگی، کراچی سے سکھر،راولپنڈی سے لاہور اور میانوالی کی ٹرینیں چاہتےہیں، لوکو موٹو فریٹ ٹرینوں کے ہیں،مسافر ٹرینوں کے نہیں۔

شیخ رشید کا کہنا تھا کہ میں نہیں چاہتا جب ریلوے چھوڑوں تو میرا منہ بھی کالا ہو، ریلوے کو نعرہ دیا ہے، آرام حرام ہے، قبضے والے موجودہ پرائس پر جگہ خریدنا چاہیں تو معاملہ کابینہ جاسکتا ہے۔

انھوں نے مزید کہا ریلوے پولیس میں 10ہزار اہلکار نہیں چاہئیں، میں کسی کو نہیں ہٹارہا،کام کرنے دیں، میری اپنی2 بلٹ پروف گاڑیاں ہیں، محکمے کو واپس کردوں گا، جو رعایت میں نے دی ہے، دنیا میں مرنے کے بعد بھی کوئی نہیں دے سکے گا۔

کراچی : عوامی مسلم لیگ کے سربراہ شیخ رشید کا کہنا ہے کراچی والوں تبدیلی کی بنیاد ڈالی اور عمران خان کو نیا پاکستان دیا، مہاجر کمیونٹی ذہین ہے، ان کا مشکور ہوں۔

تفصیلات کے مطابق کراچی میں عوامی مسلم لیگ کے سربراہ شیخ رشید نے میڈیا سے گفتگو کرتے ہوئے کہا تبدیلی کی بنیاد کراچی والوں نے ڈال دی اور عمران خان کو نیا پاکستان بنانے کا موقع دیا ہے، مہاجر کمیونٹی ذہین ہے، ان کا مشکور ہوں۔

شیخ رشید کا کہنا تھا کہ عوام کے فیصلے کو یہ لوگ نیا نام دے رہے ہے، کوئی ایک حلقہ بتادیں جس میں فساد ہوا ہو، انتخابات میں دھاندلی کا رونا رونے والے بتا دیں ایک بھی ووٹ زیادہ نکلا۔

انھوں نے کہا کہ عمران خان پر لوگوں نے بڑی ذمہ داری ڈالی ہے، ملکی معیشت کو ٹھیک اور آزاد خارجہ پالیسی بنانی ہے، اس ملک کو مظلوم اور غریب کا پاکستان بنانا تھا۔

سربراہ عوامی مسلم لیگ کا کہنا تھا کہ این آر او کا خواب دیکھنے والے جاگ جائیں، نوازشریف کی خواہش پر کوئی این آر اونہیں ہورہا، حسن اورحسین کو ریڈ وارنٹ کے ذریعے واپس لائیں گے۔

مزید پڑھیں : کہا تھا ایک لہر آئے گی جو عمران خان کو کام یاب کر دے گی، شیخ رشید

شیخ رشید نے کہا کہ آشیانہ ہاؤسنگ اسکینڈل سمیت دیگر فیصلے بھی آنے ہیں، عمران خان نے 22سال جدوجہد، فضل الرحمان نے انجوائے کیا۔

ان کا مزید کہنا تھا کہ کرپشن کےخلاف زیروٹولرینس کی پالیسی کواپنائیں گے اور کرپشن کے تابوت میں کیلیں لگا دیں گے۔

عوامی مسلم لیگ کے سربراہ نے کہا عمران خان پر لوگوں نے اعتماد کیا ہے، نوجوان ملک میں تبدیلی کےخواہشمند ہیں، عمران خان نے ابھی حلف نہیں اٹھایا، سب مخالفین اکٹھے ہوگئے۔

اسلام آباد : عوامی مسلم لیگ کے سربراہ شیخ رشید کا کہنا ہے کہ جو دھاندلی کا رونا رو رہے ہیں، ان کے مقدر میں اب رونا ہی ہے، عمران خان کی کامیابی غریب کی کامیابی ہے، عمران خان سے وزارت نہیں مانگوں گا،اس کا بھائی ہوں۔

تفصیلات کے مطابق عوامی مسلم لیگ کے سربراہ شیخ رشید نے میڈیا سے گفتگو کرتے ہوئے کہا کہ سپریم کورٹ نے این اے 60 میں الیکشن روکنے کا فیصلہ غلط قرار دے دیا ہے ،این اے 60 سے راشد شفیق صاحب الیکشن لڑیں گے۔

شیخ رشید کا کہنا تھا کہ عمران خان سستی بجلی، سستا گیس اور پٹرول دیں گے، جو دھاندلی کا رونا رو رہے ہیں، ان کے مقدر میں اب رونا ہی ہے، الیکشن پر چیف جسٹس، آرمی چیف اور چیف الیکشن کمشنر کو مبارکباد دیتا ہوں۔

عوامی مسلم لیگ کے سربراہ نے کہا کہ جو جمہوریت کے چیمپئن بنتے ہیں، لوگوں نے انہیں مستردکردیا، الیکشن کےذریعےعوام کی جمہوریت آئی ہے۔

ان کا کہنا تھا کہ امید ہے کہ 14 اگست کو عمران خان وزیراعظم کا حلف اٹھاچکے ہوں گے، عوام نے عمران خان پر بہت اعتماد کیا، اب بہت کام کرنا ہے۔

مزید پڑھیں : وزارتوں کا بھوکا نہیں پاکستان کےغر یبوں کا گاندھی بننے جارہا ہوں، شیخ رشید

شیخ رشید نے کہا کہ پاکستان تحریک انصاف تین صوبوں میں حکومت بنارہی ہے، میں پاکستان کا سب سے سینئر ترین پارلیمنٹرین ہوں ، عمران خان سے وزارت نہیں مانگوں گا،اس کا بھائی ہوں، عمران خان کی کامیابی غریب کی کامیابی ہے۔

سربراہ عوامی مسلم لیگ کا کہنا تھا کہ میرے علاقے میں اسپتال پر کام شروع ہوچکا،چیف جسٹس کا شکریہ، راولپنڈی کے کسی اسپتال میں وینٹی لیٹر نہیں ہیں، عمران خان تمام مسائل کے حل کیلئے کام کریں گے۔

انھوں نے مزید کہا کہ سوچ رہا ہوں کہ غریب آباد یا شکریال میں شفٹ ہوجاؤں، دونوں علاقوں کی حالت بہت خراب ہے، وہاں کا حال بہترکروں گا۔

خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔