پیپلز پارٹی کی سینئر رہنما اور سابق وفاقی وزیر شیری رحمان نے کہا کہ پاکستان کا پارلیمانی وفد نیویارک میں کامیاب اور بھارت ناکام رہا۔
پیپلزپارٹی کی سینئر رہنما اور سابق وفاقی وزیر شیری رحمان نے اے آروائی نیوز کو انٹرویو میں کہا کہ ہمارا وفد بروقت نہ پہنچتا تو پاکستان کے ہاتھ سے ایک اور موقع ضائع ہوجاتا۔
سینیٹر شیری رحمان نے کہا کہ ہمارا پیغام امن کا تھا، بھارت پاکستان کیخلاف شکایتیں لیکر گیا تھا، سندھ طاس معاہدہ تکنیکی معاملہ ہے، وفد نہ جاتا تو کسی کو پتہ نہ چلتا۔
پی پی کی رہنما نے کہا کہ ہم نے سخت حالات دیکھے ہیں، جمہوریت اور مارشل لا کا فرق پتہ ہے، ہمارا لیڈر تختہ دار پر ہوتا ہے اور کہتا ہے مجھے تاریخ میں زندہ رہنا ہے۔
انہوں نے مزید کہا کہ مقبول لیڈر موجودہ نظام کو خراب اقتصادی حالت میں چھوڑ کر گئے تھے، پاکستان جس معاشی حالت میں تھا اس سے نکلنے میں وقت لگے گا، موجودہ نظام جمہوریت پر مبنی ہے، الیکشن جیتے بغیر نہیں آسکتے۔
