لاہور(23 اگست 2025): تحریک انصاف کے بانی عمران خان کی ہمشیرہ علیمہ خان کے بیٹوں کے ایف آئی آر کے متن سامنے آگئے۔
تفصیلات کے مطابق علیمہ خان کے بیٹے ملزم شیر شاہ اور شاہ ریز خان کے گرد گھیرا تنگ ہوگیا، ایف آئی آر کے متن کے مطابق ملزم شیر شاہ 9 مئی کو جلاؤ گھیراؤ، توڑ پھوڑ اور پولیس وین کو آگ لگانے میں ملوث ہے۔
ایف آئی آر کے مطابق ملزم شیر شاہ پولیس اہلکاروں پر حملوں میں بھی ملوث ہے، شیر شاہ کی جائے وقوعہ پر موجودگی کے شواہد ویڈیو ریکارڈ کی صورت میں موجود ہیں، ملزم کے پولی گرافک ٹیسٹ و دیگر کے لیے 30 روز کا جسمانی ریمانڈ درکار ہے۔
سیکیورٹی ذرائع کا کہنا ہے کہ 9 مئی 2023کو پی ٹی آئی کی شرانگیزی میں شریک دو مفرور شرپسندوں کو گرفتار کیا گیا، ملزم شیر شاہ پر 9 مئی حملہ کیس میں پہلے بھی ایف آئی آر درج ہے۔
سیکیورٹی ذرائع کا کہنا ہے کہ جناح ہاؤس حملے کے مفرور ایک اور مرکزی ملزم شیر شاہ خان کو گرفتار کر لیا گیا، 9 مئی کو جناح ہاؤس پر حملے کے وقت ملزم شیر شاہ سزا یافتہ مجرم حسان نیازی کیساتھ تھا۔
سیکیورٹی ذرائع کا کہنا ہے کہ شیر شاہ 9 مئی 2023 کو شر انگیزی کے بعد پہلے روپوش اور بعد میں لندن فرار ہو گیا تھا، کئی ما ہ تک شیر شاہ پروپیگنڈے کی آڑ میں چھپا رہا اور ریاست کیخلاف ڈیجیٹل مہم چلاتا رہا، ملزم شیر شاہ کو پاکستان واپسی پر پولیس نے 22 اگست 2025 کو گرفتار کیا۔
سیکیورٹی ذرائع نے بتایا کہ شیر شاہ دو سال سے لندن میں روپوش تھا،گرفتاری قانون کے مطابق کی گئی، گرفتاری ثبوت ہے جو ریاست، عوام یا اداروں پر حملہ کرےگا احتساب سے نہیں بچ سکے گا۔
سیکیورٹی ذرائع کا کہنا ہے کہ 9 مئی ایک غداری تھی اور اس کے مجرموں کو انصاف کے مکمل تقاضوں کا سامنا کرنا ہوگا، دونوں بھائی قیادت کی آڑ میں کارکنوں کو چھوڑ کر ایک عرصے سے روپوش تھے، شیر شاہ اور شاہ ریز خان پاکستان کے خلاف ڈیجیٹل میڈیا سیل بھی چلا رہے تھے۔