شنگھائی : وزیر اعظم نواز شریف دو روزہ دورے پر چین پہنچ گئے ۔وزیر اعظم شنگھائی تعاون تنظیم کے اجلاس میں شرکت کر یں گے ۔
وفاقی وزیرترقی و منصوبہ بندی احسن اقبال اوروزیر اعظم کے معاون خصوصی طارق فاطمی بھی ہمراہ ہیں۔ وزیر اعلیٰ پنجاب شہبازشریف بھی وزیراعظم کے ساتھ ہیں۔
شنگھائی تعاون تنظیم کا سربراہان حکومت کا چودہواں اجلاس چین کے شہر چنگ ژو میں ہو رہا ہے۔ اجلاس میں پاکستانی وفد کی قیادت وزیر اعظم نواز شریف کر رہے ہیں۔
قازقستان، کرغزستان، روس، تاجکستان اور چین کے وزرائے اعظم بھی اجلاس میں شرکت کریں گے۔ افغانستان، ایران، بھارت، بیلا روس اور منگولیا کے نمائندے بھی شریک ہوں گے۔
اجلاس کے ایجنڈے میں سرفہرست دہشت گردی اور انتہاء پسندی کے مشترکہ خطرات سے نمٹنا ہے۔رکن ملکوں کے درمیان معیشت، تجارت، ٹرانسپورٹ اور عوامی رابطوں کے فروغ پر بھی بات چیت ہو گی۔
اجلاس کے موقع پر وزیر اعظم نواز شریف چینی ہم منصب سے بھی ملاقات کریں گے۔ چین، قازقستان، کرغستان، روس، تاجکستان اور ازبکستان تنظیم کے مستقل ارکان ہیں جبکہ پاکستان اور بھارت کو بھی آئندہ سال مستقل رکن بنانے کا فیصلہ کیا گیا ہے۔
