Tag: SHO

کراچی (11 اگست 2025): شہر قائد میں راشد منہاس روڈ پر گزشتہ روز پیش آنے والے نہایت افسوس ناک ٹریفک حادثے (ڈمپر حادثہ) کو غفلت قرار دیتے ہوئے 2 تھانوں کے ایس ایچ اوز معطل کر دیے گئے۔

تفصیلات کے مطابق راشد منہاس روڈ پر ڈمپر کی ٹکر سے بہن بھائی کے جاں بحق ہونے کے واقعے میں ایڈیشنل آئی جی کراچی نے غفلت اور لاپروائی پر 2 ایس ایچ اوز کو معطل کر دیا ہے۔

ایس ایچ او یوسف پلازہ افتخار خانزادہ، اور ایس ایچ او فیڈرل بی صنعتی ایریا شاہد بلوچ معطل کیے گئے ہیں، ان ایس ایچ اوز کو بی کمپنی رپورٹ کرنے کی ہدایت کر دی گئی ہے۔

کراچی میں ڈمپر اور موٹرسائیکل حادثے کی ویڈیو سامنے آگئی

واضح رہے کہ کراچی میں ایڈووکیٹ ناصر ملک کے قتل کے واقعے کے بعد بھی پولیس حکام نے ایس ایچ او سولجر بازار تھانہ وقار عظیم کو معطل کر دیا ہے۔ اس میں کیس میں ملوث مرکزی ملزم کو بھی گرفتار کر لیا گیا ہے، ملزم محسن مقتول ایڈووکیٹ ناصر ملک کا رشتے دار نکلا ہے۔

خیال رہے کہ راشد منہاس روڈ حادثے کی ایک سی سی ٹی وی فوٹیج بھی سامنے آئی ہے جس سے معلوم ہوا ہے کہ غلطی ڈمپر کی نہیں تھی، فوٹیج میں دیکھا جا سکتا ہے کہ بائیک سوار بائیں سے اچانک دائیں ہو گیا تھا، بائیک اچانک اچھلی اور سلپ ہو کر ڈمپر کے نیچے آ گئی۔

کراچی (05 اگست 2025): تھانے میں ایک شخص کی ہلاکت کے بعد شاہ لطیف تھانے کا ایس ایچ او، ہیڈ محرر سمیت 4 افراد گرفتار کر لیے گئے۔

تفصیلات کے مطابق گزشتہ روز کراچی کے شاہ لطیف تھانے میں فائرنگ سے ایک شخص کی ہلاکت کا واقعہ پیش آیا تھا، جس میں تھانے کے ایس ایچ او، ہیڈ محرر سمیت 4 افراد کے خلاف قتل کا مقدمہ درج کر لیا گیا ہے۔

پولیس حکام نے کہا ہے کہ ایس ایچ او سمیت تمام افراد کو گرفتار کر لیا گیا ہے، ایس ایس پی ملیر نے شاہ لطیف تھانہ میں فائرنگ کے واقعے کی انکوائری کی تو معلوم ہوا کہ فائرنگ کرنے والا اور اس کا ساتھی ایس ایچ او کی اسپیشل پارٹی میں شامل تھے، جب کہ ایس ایچ او اور ہیڈ محرر نے واردات کے ثبوت بھی مٹائے۔

پولیس رپورٹ کے مطابق اس واقعے میں ایس ایچ او شاہ لطیف، ہیڈ محرر، اور فائرنگ کرنے والے عاطف اور شاہ زیب گرفتار ہیں۔

کراچی میں تھانے کے اندر فائرنگ سے ایک شخص جاں بحق

قبل ازیں یہ پولیس کی جانب سے یہ اطلاع دی گئی تھی کہ 2 نوجوان ایک شخص کو پکڑ کر شاہ لطیف تھانے لائے اور بتایا کہ یہ ڈکیت ہے، پھر نوجوانوں کا لائے گئے شخص کے ساتھ جھگڑا ہوا، ایک نے پستول نکال لی، تھانے میں جھگڑے کے دوران گولی چلی جو مبینہ ڈکیت کو لگ گئی۔

ایس ایس پی ملیر ڈاکٹر خالق پیرزادہ کے مطابق گولی لگنے سے نوجوان موقع پر دم توڑ گیا تھا، دونوں نوجوانوں کو حراست میں لے کر تحقیقات کی گئی کہ تھانے کے اندر مارا گیا شخص ڈاکو ہے یا نہیں، تو معلوم ہوا کہ وہ دونوں ایس ایچ او کی اسپیشل پارٹی میں شامل تھے۔

کراچی: شہر قائد کے علاقے شاہ فیصل کالونی کے ایس ایچ او کو ٹاسک فورس کی کارروائی کے دوران برآمد 24 لاکھ سے زائد رقم مبینہ طور پر غائب کرنے پر معطل کر دیا گیا۔

تفصیلات کے مطابق ایس ایچ او شاہ فیصل کالونی ناصر محمود پر ٹاسک فورس کی کارروائی کے دوران برآمد ہونے والی لاکھوں کی رقم غائب کرنے کا الزام تھا، جس پر آئی جی سندھ نے رقم کم ظاہر کرنے پر ایس ایچ او کے خلاف کارروائی کا حکم دیا تھا۔

ڈی آئی جی ویسٹ عرفان بلوچ کے مطابق ایس ایچ او ناصر محمود کے خلاف انکوائری شروع کر دی گئی ہے، انھیں معطل کر دیا گیا ہے، اور گارڈن ہیڈ کوارٹرز بی کمپنی بھیج دیا گیا۔ انھوں نے یہ بھی بتایا کہ ٹاسک فورس کی تفصیلی رپورٹ بھی آئی جی سندھ غلام نبی میمن کو بھیج دی گئی ہے۔

تاہم اس معاملے میں سوشل میڈیا پر ایک ویڈیو بھی گردش کر رہی ہے جس میں گٹکا فروش کاشف بتا رہا ہے کہ اس کے گھر سے چوبیس لاکھ روپے ایس ایچ او نے نہیں بلکہ ٹاسک فورس نے لیے تھے، جب کہ شکایت پر ایس ایچ او نے ٹاسک فورس کے پاس سے وہ رقم برآمد کر کے واپس کی۔

واضح رہے کہ 20 جون کو گٹکا فروش کاشف کے گھر پر ٹاسک فورس کے چھاپے میں برآمد ہونے والی چوبیس لاکھ سے زائد نقدی مبینہ طور پر غائب ہو گئی تھی۔ شاہ فیصل کالونی تھانے میں درج کیے گئے مقدمے میں صرف 1500 روپے ظاہر کیے گئے تھے، مقدمے میں نہ سامان ظاہر کیا گیا اور نہ ہی 24 لاکھ سے زائد نقدی کا کہیں ذکر کیا گیا۔

رپورٹ کے مطابق شاہ فیصل کالونی میں گٹکا فروش کاشف لنگڑا کی فیکٹری پر چھاپے کے دوران ٹاسک فورس نے چوبیس لاکھ روپے، گٹکا، چھالیہ اور دیگر ممنوعہ سامان برآمد کیا تھا، تاہم تھانیدار پر الزام لگایا گیا کہ اس نے لاکھوں روپے مالیت کا گٹکا، چھالیہ اور دیگر سامان غائب کر دیا، ٹاسک فورس نے چھاپے کے دوران برآمد ہونے والی رقم اور سامان کی ویڈیو بھی بنا لی تھی۔