کراچی: شہر ِقائد میں ایک بار پھرگرمی کی شدید لہرآنے کا امکان ہے، متعلقہ اداروں کو ریڈ الرٹ جاری کردیا گیا۔
تفصیلات کے مطابق محمکہ موسمیات نے اعلان کیا ہے کہ کراچی میں آئندہ روز درجہ حرارت 40 ڈگری سینٹی گریڈ تک جانے کا امکان ہے، آج کراچی میں زیادہ سے زیادہ درجہ حرارت 36 ڈگری سینٹی گریڈ ریکارڈ کیا گیا۔
محکمہ موسمیات کے مطابق آئندہ 24گھنٹوں کے دوران ملک کے بیشترعلاقوں میں موسم گرم اورخشک رہے گا تاہم مالاکنڈ ڈویژن، فاٹا کے بالائی علاقے اورکشمیرمیں چند مقامات پرگرج چمک کے ساتھ بارش کا بھی امکان ہے۔
میٹ آفس کے جاری کردی اعدادوشمار کے مطابق آج ریکارڈ کیے گئے گرم ترین مقامات میں سب سےزیادہ درجہ حرارت تربت میں45 ڈگری سینٹی گریڈ جبکہ سبی، رحیم یار خان، لسبیلا42، نورپورتھل،کوٹ ادو اور بہاولپور میں 41ڈگری سینٹی گریڈ ریکارڈ کیا گیا۔
کمشنر کراچی شعیب صدیقی کا کہنا ہے کہ ستمبر اور اکتوبر کے مہینے کراچی میں اکثر شدید گرم رہتے ہیں اور گرمی کی متوقع شدید لہر کے پیشِ نظرتمام متعلقہ اداروں کو ریڈالرٹ جاری کردیا ہے۔
اس موقع پر ماہرین کا کہنا ہے کہ گرمی کی شدید لہر میں بچے اور بزرگ بلا ضرورت گھر سے باہرنکلنے سے اجتناب کریں اور اگر مجبوراً نکلنا ہو تو سراورچہرہ ڈھانپ کرنکلیں۔
