سرینگر: مقبوضہ وادی میں بھارتی فورسز کی ریاستی دہشت گردی کا سلسلہ جاری ہے، جعلی آپریشن میں مزید 3 نوجوانوں کو شہید کردیا گیا ہے۔
کشمیر میڈیاسروس کے مطابق بھارتی فوجیوں نے نوجوانوں کو ضلع کے علاقے چک چولان میں محاصرے اور تلاشی کی کارروائی کی ، کارروائی کے دوران تین نوجوانوں کو شہید کردیا۔
کے ایم ایس کے مطابق سرچ آپریشن کی آڑ فوجیوں نے بھاری ہتھیاروں اور کیمیائی مواد کا استعمال کرتے ہوئے علاقے میں ایک رہائشی مکان کو بھی تباہ کیا، آخری اطلاعات تک علاقے میں بھارتی فوج کا آپریشن جاری تھا۔
کشمیر میڈیاسروس کے مطابق جعلی سرچ آپریشن کے دوران قابض انتظامیہ نے علاقے میں انٹرنیٹ سروس بھی معطل کردی ہے جبکہ میڈیا نمائندگان کو آپریشن کی کوریج سے روک دیاہے۔
یہ بھی پڑھیں: بھارتی فوج کی فائرنگ سے تین کشمیری جوان شہید
واضح رہے کہ نومبر کے آخری ہفتے میں قابض بھارتی فوج کی فائرنگ سے مزید تین کشمیری نوجوان شہید ہوئے تھے، تینوں نہتے نوجوانوں کو جعلی آپریشن کی آڑ میں گھروں سے گرفتار کرنے کے بعد شہید کیا گیا۔
ماہ نومبر کے وسط میں بھارتی قابض افواج نے دو روز کے دوران 9 کشمیریوں کو شہید کیا تھا، جس پر ترجمان دفتر خارجہ پاکستان نے شدید ردعمل کا اظہار کیا تھا۔
عا صم افتخاراحمد کا کہنا تھا کہ پاکستان مقبوضہ کشمیر میں ماورائے عدالت قتل کی شدید مذمت کرتا ہے اور بھارت کے سامنے جرات سے کھڑے کشمیریوں کو سلام پیش کرتے ہیں۔
ترجمان دفتر خارجہ کا کہنا تھا کہ پاکستان کشمیریوں کی سیاسی ،سفارتی اور اخلاقی حمایت جاری رکھے گا، بھارت کی انسانی حقوق کی خلاف ورزیوں پرعالمی برادری نوٹس لے۔
