لاہور: پی ایس ایل کے فائنل کے دوران قذافی اسٹیڈیم میں گو نواز گو کے نعرے لگ گئے، عمران خان نے خدشہ ظاہر کیا تھا کہ نواز شریف اپنے حق میں نعرے لگوائیں گے۔
اطلاعات کے مطابق پاکستان سپر لیگ کا فائنل کسی حد تک سیاسی بھی ہوگیا ہے، اسٹیڈیم میں مختلف سیاسی شخصیات بھی میچ دیکھنے آئی ہیں ان میں شیخ رشید بھی موجود ہیں۔
میچ کے دوران نجم سیٹھی جب خطاب کرنے آئے تو اسٹیڈیم میں موجود شائقین نے گو نواز گو کے نعرے لگانے شروع کردیے جیسا کہ ویڈیو میں دیکھا جاسکتا ہے۔
اس بات کی تصدیق نہیں ہوسکی کہ مذکوہ شائقین تحریک انصاف کے کارکنان یا ہمدرد تھے یا عام عوام تاہم پی ٹی آئی انہیں عام عوام جب کہ ن لیگ انہیں پی ٹی آئی کے کارکنان اور سپورٹر قرار دے گی۔
قبل ازیں ہفتے کی رات کو اے آر وئی نیوز کو انٹرویو دیتے ہوئے پاکستان تحریک انصاف کے چیئرمین عمران خان نے کہا تھا کہ اسٹیڈیم میں اپنے حق میں نعرے لگوانا نواز شریف کی سیاسی روایت ہے۔
انہوں نے الزام عائد کیا تھا کہ نواز شریف نے سیاسی طور پر لاہور میں فائنل کرایا اور ن لیگ نے سارے ٹکٹ اپنے کارکنوں کو فروخت کردیے اب اسٹیڈیم میں نواز شریف کے حق میں نعرے لگائے جائیں گے۔
یہ پڑھیں: پی ایس ایل کا فائنل نوازشریف کا سیاسی فیصلہ ہے، عمران خان
فی الوقت ایسی کوئی اطلاع نہیں ملی کہ ن لیگ کے حق میں کوئی نعرے لگے ہوں تاہم ن لیگ کے خلاف نعرے ضرور لگے جس کی ویڈیو مل گئی۔
