اے آر وائی ڈیجیٹل کی مشہور ڈرامہ سیریل دو بول اور دیگر ٹی وی ڈراموں میں زبردست اداکاری کرنے والے اداکار عفان وحید نے عوام کی جانب سے شوبز شخصیات پر کی جانے والی تنقید پرجواب دے دیا۔
ان کا کہنا ہے کہ لوگ چاہتے ہیں کہ شوبز شخصیات ہر لحاظ سے مکمل پرفیکٹ دکھائی دیں، ان میں کوئی خامی نہ ہو، لوگوں کے شوبز شخصیات کی بڑھتی عمر اور ان جسمانی ساخت پر منفی تبصرے نامناسب بات ہے۔
یہ بات انہوں نے ایک پوڈ کاسٹ انٹرویو میں گفتگو کرتے ہوئے کہی، اس موقع پر انہوں نے شوبز انڈسٹری سے متعلق بہت مسائل پر اظہار خیال کیا۔
اداکار عفان وحید کا کہنا تھا کہ شائقین کے اس قسم کے پریشر میں جب کوئی مشہور اداکار کسی بھی قسم کی بیوٹی ٹریٹمنٹ لیتا ہے تو بھی اس پر تنقید کی جاتی ہے کہ اس کو قدرت کی دی ہوئی خوبصورتی پر خوش نہیں ہے وغیرہ وغیرہ۔
انہوں نے کہا کہ لوگوں کو سمجھنا چاہیے کہ انسان ہمیشہ ایک جیسا نہیں رہ سکتا، جیسے جیسے عمر بڑھتی ہے تبدیلیاں آتیں ہیں اور اگر لوگوں کو کسی بھی اینگل سے یہ اندازہ ہوجائے کہ کسی اداکار کی عمر بڑھ رہی ہے تو اس پر جملے کسے جاتے ہیں کہ اب آپ کا کیریئر ختم۔
اداکار عفان کا مزید کہنا تھا کہ لوگ اس بات کو سمجھیں کہ اداکار بھی انسان ہوتے ہیں جن میں آپ کی طرح ہی خامیاں اور خوبیاں ہوتیں ہیں، لہٰذا بے جا قسم کی تنقید کرنا نامناسب سی بات ہے۔
