ARYNews.tv | Urdu – Har Lamha Bakhabar

Tag: Shuaib Akhtar

  • ارشد ندیم کرکٹ کھیلتے تو شعیب اختر کی طرح ہوتے، بھائی

    ارشد ندیم کرکٹ کھیلتے تو شعیب اختر کی طرح ہوتے، بھائی

    پاکستان کے لیے پیرس اولمپکس میں طلائی کا تمغہ جیتنے والے ایتھلیٹ ارشد ندیم کے بھائی کا کہنا ہے کہ اگر ارشد کرکٹ کھیلتے تو شعیب اختر کی طرح ہوتے۔

    پاکستان کے مایہ ناز ایتھلیٹ ارشد ندیم نے اپنی کمال مہارت کا مظاہرہ کرتے ہوئے اولمپکس کی تاریخ میں نئی تاریخ رقم کردی اور ساتھ ہی 40 سال بعد پاکستانیوں کے چہروں پر خوشیاں بکھیر دیں۔

    اے آر وائی نیوز کے پروگرام میں گفتگو کرتے ہوئے ارشد کے بڑے بھائی شاہد اور چھوٹے بھائی علیم نے اپنے خیالات کا اظہار کیا اور ارشد کی ٹریننگ اور اس شعبے میں آنے کے حوالے سے تفصیلات بیان کیں۔

    بڑے بھائی شاہد ندیم نے بتایا کہ ارشد کو کرکٹ کھیلنے کا جنون کی حد تک شوق تھا اگر وہ آج کرکٹر ہوتے تو شعیب اختر کی طرح ہوتے۔ انہوں نے بتایا کہ ہمارے گاؤں میں جیولن تھرو کیلئے کسی قسم کی کوئی سہولت میسر نہیں۔

    ایک سوال کے جواب میں شاہد ندیم نے بتایا کہ میں اور میرے بڑے بھائی بھی جیولن تھرو کرتے تھے لیکن ارشد کو کرکٹ کا بہت شوق تھا، لیکن وسائل اور سہولیات نہ ہونے کی وجہ سے ہم نے اسے اس جانب راغب کیا کیونکہ اس کی جسمانی ساخت بہت مضبوط ہے وہ ہم سے اچھی تھرو کرتا تھا۔

  • افغان کھلاڑی اور تماشائیوں کی حرکت پر شعیب اختر کی شدید تنقید، ویڈیو دیکھیں

    افغان کھلاڑی اور تماشائیوں کی حرکت پر شعیب اختر کی شدید تنقید، ویڈیو دیکھیں

    یو اے ای میں جاری ایشیا کپ ٹی ٹوئنٹی ٹورنامنٹ کے انتہائی اہم میچ میں قومی ٹیم نے دلچسپ اور سنسنی خیز مقابلے کے بعد افغان ٹیم کو شکست دی جس کے ردعمل میں افغان شائقین آپے سے باہر ہوگئے، سابق فاسٹ بالر شعیب اختر نے اس رویے پر کڑی تنقید کی ہے۔

    سماجی رابطے کی ویب سائٹ پر ٹوئٹر میسج اور اپنے ویڈیو پیغام میں راولپنڈی ایکسپریس شعیب اختر نے افغان تماشائیوں کے نامناسب رویے پر شدید برہمی کا اظہار کیا۔

    شعیب اختر نے شارجہ میں مشتعل ہجوم کی ہنگامہ آرائی کے بعد افغانی تماشائیوں کے عمل پر شدید تنقید کی ان کا کہنا تھا کہ ہم بحیثیت قوم افغان بھائیوں کو سپورٹ کرتے ہیں لیکن یہ کیا طریقہ ہے آپ نے آصف علی کے ساتھ جو سلوک کیا۔

    افغان ٹیم کے میچ ہارنے کے بعد اسٹیڈیم میں شائقین کے جھگڑے کے بعد سابق کرکٹر شعیب اختر غصے میں آگئے انہوں نے کہا کہ کھیل کو کھیل سمجھ کر کھیلنا چاہیے۔

    اپنے ٹوئٹر پیغام میں انہوں نے افغانستان کرکٹ بورڈ کے سابق سی ای او شفیق ستانکزئی کو بھی ٹیگ کیا اور ایک ویڈیو پوسٹ کرتے ہوئے کیپشن لکھا کہ یہ ہے وہ عمل جو افغان شائقین کررہے ہیں۔

    ان کا کہنا تھا کہ آصف علی کے ساتھ افغانی بالر کا رویہ دیکھ کر مجھے بہت افسوس ہوا، نسیم شاہ اسی لیے غصے میں تھا۔

    شعیب اختر نے کہا کہ اس طرح کا رویہ یہ شائقین ماضی میں بھی متعدد مرتبہ اختیار کرچکے ہیں، کرکٹ ایک کھیل ہے اور اسے صحیح جذبے کے ساتھ کھیلنا اور لیا جانا چاہیے۔

    ان کا مزید کہنا تھا کہ متکبرانہ رویہ افغانستان ٹیم کی شکست کا باعث بنا۔ اگر آپ لوگ کھیل میں ترقی کرنا چاہتے ہیں تو آپ کے مداحوں اور آپ کے کھلاڑیوں دونوں کو کچھ اہم باتیں سیکھنے کی ضرورت ہے۔

  • پاکستان ٹیم نے بھارت کا غرور بھی خاک میں ملادیا، شعیب اختر

    پاکستان ٹیم نے بھارت کا غرور بھی خاک میں ملادیا، شعیب اختر

    قومی کرکٹ ٹیم کے سابق فاسٹ بولر شعیب اختر نے کہا ہے کہ ورلڈ کپ میں میچ ہارنے کی ریت ہم نے توڑ دی ہے اور بھارت کا غرور بھی خاک میں ملادیا ہے۔

    انہوں نے کہا کہ ہم میچ پہلے بڑھکیں نہیں مارتے نہ یہ کہتے ہیں کہ واک اوور مل جائے گا یا دے دیں گے، ہم نے ایک مہذب قوم کی طرح میچ کھیلا اور مکمل فتح حاصل کی ہے۔

    اپنی جاری کردہ ایک ویڈیو میں سابق فاسٹ بالر نے کہا کہ بھارت کے حوالے سے یہی کہوں گا کہ ویرات کوہلی کا ٹاس ہارنا ان کیلئے اچھا شگون نہیں تھا، اور بال بھی کافی گیلی ہوگئی تھی۔

    انہوں نے کہا کہ میری خواہش ہے کہ ٹی 20 ورلڈ کپ کے فائنل میں بھی انڈیا اور پاکستان کی ٹیمیں مدمقابل ہوں، ان کا کہنا تھا کہ پاکستان کا ورلڈ کپ تو اب شروع ہوا ہے۔

    میچ میں شاندار کارکردگی پر انہوں نے شاہین شاہ آفریدی کی تعریف کی اور کہا کہ شاباش تم نے واقعی کسی شاہین کی طرح ان پر حملہ کیا، دو خوبصورت ڈلیوریاں کیں جس کے بعد چراغوں میں روشنی نہ رہی۔

    انہوں نے پاکستانی عوام خصوصاً میڈیا سے اپیل کی کہ بھارتی میڈیا کی طرح سلوک کرنے کی ضرورت نہیں ہم مہذب قوم ہیں اور تہذیب کے دائرے میں رہ کر جیت کا جشن منائیں گے۔

    یاد رہے کہ گزشتہ روز ہونے والے پاک بھارت مقابلے میں قومی ٹیم کے اوپنرز بابراعظم اور محمد رضوان نے اپنی کارکردگی سے انڈیا اور پاکستان کے شائقین کوحیران کردیا۔

    اس میچ میں محمد رضوان نے شاندار بیٹنگ کا مظاہرہ کرتے ہوئے55 گیندوں پر79 رنز کی شاندار اننگز کھیلی جس میں 3 بلند و بالا چھکے اور 6 چوکے شامل تھے۔

    کپتان بابراعظم نے شاندار بلے بازی کرتے ہوئے 52 گیندوں پر 68 رنز کی اننگز کھیلی جس میں 2 چھکے اور 6چوکے شامل تھے۔

  • "جب افغانستان سے نکلنے کی ضروت پڑتی ہے تو پاکستان یاد آتا ہے”

    "جب افغانستان سے نکلنے کی ضروت پڑتی ہے تو پاکستان یاد آتا ہے”

    لاہور : سابق فاسٹ بالر شعیب اختر نے انگلینڈ کی جانب سے پاکستان کا دورہ منسوخ کرنے پرانگلینڈ بورڈ پر کڑی تنقید کرتے ہوئے کہا ہے کہ دورہ ختم کرنے سے پہلے پاکستان آکر حالات تو دیکھ لیتے۔.

    نیوزی لینڈ کی جانب سے یکطرفہ طور پر دورہ منسوخ کیے جانے کے بعد گزشتہ روز انگلینڈ کرکٹ بورڈ نے بھی دورہ پاکستان منسوخ کردیا۔

    اس حوالے سے قومی کرکٹ ٹیم کے سابق کپتان شعیب ملک نےانگلینڈ کرکٹ بورڈ کی جانب سے پاکستان کا دورہ منسوخ کیے جانے پر دکھ کا اظہار کیا۔

    ان کا کہنا تھا کہ نیوزی لینڈ کے ساتھ ہی انہوں نے ذہن بنا لیا تھا کہ وہ پاکستان نہیں آئیں گے، لیکن جب ان کو افغانستان سے نکلنے کیلئے سہارے کی ضرورت پڑتی ہے تو انہیں پاکستان نظر آتا ہے۔

    شعیب اختر کا کہنا تھا کہ جب کورونا کے دنوں میں جب آپ کو ہماری ضرورت پڑتی ہے تو ہماری منتیں کرتے ہیں کہ انگلینڈ کا دورہ کرلیں،

    ان کا کہنا تھا کہ یہ طے پاچکا تھاکہ پاکستان کا بیانیہ خراب کرنا ہے اور کردیا ہے، یہ سب آپس میں ملے ہوئے ہیں، پہلے دیکھ تو لیں پاکستان میں حالات کیا ہیں؟

    شعیب اختر کا کہنا تھاکہ میری خواہش تھی کہ کاش انگلینڈ پاکستان آجائے اوریہ بیانیہ دے سکیں کہ پاکستان محفوظ ملک ہے لیکن انگلینڈ نے نیوزی لینڈ کا ساتھ دیا۔

    انہوں نے واضح الفاظ میں کہا کہ اگر میں چیئر مین پی سی بی ہوتا تو میں یہی کہتا کہ ہم نے بھی نیوزی لینڈ اور انگلینڈ سے کوئی سیریز نہیں کھیلنی۔

  • یہ فینز کس کو دیکھنے آئے تھے ؟ اظہرعلی کا شعیب اختر سے سوال

    یہ فینز کس کو دیکھنے آئے تھے ؟ اظہرعلی کا شعیب اختر سے سوال

    کراچی : قومی ٹیم کے کھلاڑی اظہر علی نے ٹیم کے کھلاڑیوں پر کی جانے والی تنقید کا جواب دے دیا، ان کا کہنا ہے کہ اسٹیڈیم میں اتنے سارے شائقین کس کو دیکھنے آئے تھے؟

    سماجی رابطے کی ویب سائٹ ٹوئٹر پر اپنے ایک تازہ پیغام میں اظہر علی نے ایک تصویر شئیر کی، جس میں دیکھا جا سکتا ہے کہ ناٹنگھم کے میدان میں کھیلے جانے والے ٹی ٹوینٹی میچ میں شائقین کی بڑی تعداد موجود ہے۔

    اظہر علی نے تصویر کے کیپشن میں لکھا کہ یہ فینز کس کو دیکھنے آئے تھے ؟؟ یاد رہے کہ کچھ دنوں قبل سابق فاسٹ بالر شعیب اختر نے پاکستان ٹیم کی ناقص کاکردگی پر تبصرہ کرتے ہوئے اسے شدید تنقید کا نشانہ بنایا تھا۔

    پاک انگلینڈ ون ڈے سیریز میں قومی ٹیم کی بدترین شکست پر راولپنڈی ایکسپریس نے اپنے یوٹیوب چینل سے ٹیم انتظامیہ کو کڑی تنقید کا نشانہ بناتے ہوئے کہا تھا کہ شائقین ایسے کھلاڑیوں کو دیکھنے کیلئے پیسے خرچ کرکے اسٹیڈیم کیوں آئیں گے؟

    ان کا کہنا تھا کہ ایسی ٹیم کو دیکھنے کے لیے کون پیسے خرچ کرے گا جو انگلینڈ کی اکیڈمی ٹیم سے بھی ہار جائے، قومی ٹیم کی سلیکشن ہی صحیح نہیں، ٹی ٹوئنٹی کی بنیاد پر منتخب کھلاڑیوں کو ون ڈے اور ٹیسٹ میں کھلایا جارہا ہے۔

    ‘کون پیسے دے کر ایسی ٹیم کو دیکھنے آئے گا’ قومی ٹیم کی شکست پر شعیب اختر برہم

    واضح رہے کہ انگلینڈ کے ساتھ ٹی ٹوئنٹی سیریز کا پاکستان نے فاتحانہ آغاز کردیا ہے، پہلے ٹی ٹوئنٹی میں انگلینڈ کو31 رنزسے شکست دے دی ہے۔  جس کے بعد اظہر علی نے  یہ پیغام  کسی کا نام لیے  بغیر ٹوئٹر پرجاری کیا۔

  • "مصباح الحق کو ہیڈ کوچ کے عہدے سے ہٹانے کا فیصلہ ہوچکا ہے”

    "مصباح الحق کو ہیڈ کوچ کے عہدے سے ہٹانے کا فیصلہ ہوچکا ہے”

    لاہور : پاکستان کرکٹ بورڈ کی وضاحت کے باوجود قومی ٹیم کے ہیڈ کوچ مصباح الحق کو عہدے سے ہٹانے کی خبریں منظر عام پر آرہی ہیں، فاسٹ بالر شعیب اختر نے ایک بار پھر یہی دعویٰ کردیا۔

    تفصیلات کے مطابق سابق ٹیسٹ کرکٹر اور فاسٹ بالر شعیب اختر نے دعویٰ کیا ہے کہ پاکستان کرکٹ بورڈ (پی سی بی) نے مصباح الحق کو ہیڈ کوچ کے عہدے سے ہٹانے کا اصولی فیصلہ کرلیا گیا ہے۔

    سابق تیزفتار بالر نے یہ بات زور دے کر کہی کہ ان کی جگہ زمبابوے کے سابق کرکٹر اینڈی فلاور قومی ٹیم کے نئے ہیڈ کوچ مقرر کیے جائیں گے۔

    اپنے یوٹیوب چینل پر بات کرتے ہوئے راولپنڈی ایکسپریس کا کہنا تھا کہ مصباح الحق کی چھٹی کا فیصلہ ہوچکا ہے اینڈی فلاور ابھی عہدہ قبول نہیں کر رہے کیونکہ وہ ملتان سلطانز کے کوچ اور چاہتے ہیں کہ رواں سال پی ایس ایل سے کچھ کمالیں۔

    شعیب اختر کا کہنا تھا کہ اینڈی فلاور پاکستان سپر لیگ ( پی ایس ایل ) کے چھٹے ایڈیشن کے بعد قومی ٹیم کو جوائن کریں گے اور وہ اپنا سیٹ اپ لائیں گے اور چہیتے کھلاڑیوں کی چھٹی کریں گے۔

    شعیب اختر نے مزید کہا کہ وقار یونس اپنی نوکری بچانے کے لیے بھاگ دوڑ کر رہے ہیں، کرکٹ کی تاریخ کے عظیم ترین بالر مصباح الحق کے ماتحت کام کر رہے ہیں مگر اب بھی انہیں ملازمت کے لالے پڑ جائیں گے۔

    کیا مصباح الحق کو ہیڈ کوچ کے عہدے سے ہٹایا جارہا ہے؟ پی سی بی نے وضاحت کردی

    واضح رہے کہ دو روز قبل پی سی بی نے اپنے ایک جاری کردہ بیان میں اس قسم کی خبروں کی تردید کرتے ہوئے انہیں افواہ قرار دیا تھا، پی سی بی نے وضاحت کی تھی کہ مصباح کے عہدہ چھوڑنے کی خبروں میں صداقت نہیں ہے۔