ساہیوال : امیرجماعت اسلامی سراج الحق نے کہا ہے کہ نواز شریف، زرداری اور عمران خان نے لیا جانے والا قرضہ کھا کر ملکی معیشت کو ڈبو دیا۔
یہ بات انہوں نے ساہیوال میں جماعت اسلامی کے ورکرز کنونشن سے خطاب کرتے ہوئے کہی، ان کا کہنا تھا کہ مریم نواز چاہتی ہے اس ملک کا بادشاہ نوازشریف بنے لیکن یہ کبھی نہیں ہوگا۔
انہوں نے کہا کہ ہم ایک جدید اسلامی خوشحال پاکستان بنانا چاہتے ہیں ایسا نظام چاہتے ہیں جہاں ہر خاص وعام کیلئے انصاف، مزدوراور کسان کیلئے خوشحالی ہو، ہم ایسا پاکستان چاہتے ہیں جس کا فیصلہ امریکی سفیر نہ کرے، ایسا وزیراعظم چاہتے ہیں جو دنیا بھرمیں مانگتا نہ پھرے، یہ ملک قرض لینے والا نہ ہو بلکہ دینے والا ہو۔
سراج الحق نے کہا کہ حکومت میں آنے سے پہلے یہی لوگ کہتے تھے کہ اسحاق ڈار آئے گا اور ڈالر بھی ساتھ لائے گا، اسحاق ڈارنے دعویٰ کیا تھاوہ 200روپے تک ڈالر لائے گا لیکن اس نے غریب عوام پر مہنگائی کے بم سے حملہ کیا۔
ان کا کہنا تھا کہ پٹرول کی قیمت 300روپے فی لیٹر تک جائے گی، میرا ملک اس لئےغریب ہے کہ اس پر چور مسلط ہیں، نیپال، افغانستان، بنگلہ دیش جیسا ملک معاشی طور پر ہم سے آگے نکل گیا،
امیر جماعت اسلامی نے کہا کہ نواز، زرداری، عمران نے لیا جانے والا قرضہ کھا کر ملکی معیشت کو ڈبو دیا، بھینس کو چارہ عوام دیتی ہے اور دودھ کوئی اور پی جاتا ہے، حیران ہوں غریب آدمی اس مہنگائی میں کیسے بجلی کےبل ادا کرے گا؟
انہوں نے کہا کہ وزیراعظم کہتا ہے میں مہنگائی کی وجہ سے کپڑے بیچ دوں گا، وزیراعظم کہاں کپڑے بیچے گا یہ تو عوام کے کپڑے نوچ رہے ہیں، حکمران اپنےاخراجات کم کرنے کیلئےتیار نہیں، 5لاکھ گاڑیاں ہیں جن میں عوام کے ٹیکس سے پٹرول ڈلوایا جاتا ہے۔
