سیالکوٹ : بھارتی سیکورٹی فورسز نے مسلسل تیسرے روز بھی جنگ بندی کی خلاف ورزی کرتے ہوئے سیالکوٹ کے سرحدی علاقے جروال اور چپ ڑار سیکٹر پر بلااشتعال فائرنگ اور گولہ باری کی ،جس کے نتیجے میں ایک خاتون سمیت دوافراد شہید جبکہ متعددد زخمی ہوگئے۔
بھارتی سیکورٹی فورسز کی جانب سے جنگ بندی معاہدے کی مسلسل تیسرے روز بھی خلاف ورزی کی گئی، جنگی جنون میں مبتلا بھارتی فوج کی سیالکوٹ کے سرحدی علاقے جروال پوسٹ پر بلااشتعال فائرنگ اور گولہ باری کی، مارٹر گولے کی ذد میں آکر کھدرال گاؤں ایک خاتون شہید ہو گئیں جبکہ تین افراد زخمی ہیں جبکہ گاؤں حاجراں گڑی میں بھی ایک شخص شہید ہوا۔
مارٹر گولے گھروں پر گرنے سے متعدد مویشی بھی مارے گئے جبکہ متعددمکانات کو بھی نقصان پہنچا ہے، چناب رینجرز کی بھرپور جوابی کارروائی سے بھارتی توپیں خاموش ہوگئیں۔
بھارت کی جانب سے گولہ باری کے باعث سرحدی دیہات میں شدید خوف و ہراس پایا جاتا ہے، مسلسل تین روز سے جاری فائرنگ اور گولہ باری کی وجہ سے دیہات کے رہائشی اپنے گھروں میں محصور ہو کر رہ گئے ہیں۔
