سیالکوٹ : دو خطرناک اشتہاری ڈاکو بجلی کا ہائی وولٹیج کرنٹ لگنے سے اپنے انجام کو پہنچ گئے، دونوں ڈاکوئوں پر متعدد تھانوں میں جرائم کی مختلف وارداتوں کے مقدمات درج ہیں۔
تفصیلات کے مطابق سیالکوٹ تھانہ مراد پور کے نواحی گاؤں میں چھپ کر رات بسر کرنے والے دو خطرناک اشتہاری ڈاکو اصغر حسین عرف ککری اور عمران عرف ہرنی مکان کی چھت سے گزرنے والی گیارہ ہزار وولٹ بجلی کی تاروں سے ٹکرا گئے۔
اطلاعات کے مطابق ڈاکو موقع پر ہی کرنٹ لگنے سے جاں بحق ہوگئے بعدازاں پولیس نے ان کی لاشیں اسپتال منتقل کیں، ڈاکوئوں کو کرنٹ لگنے کی وجوہات کا علم نہیں ہوسکا۔
متعلقہ تھانے کی پولیس کے مطابق دونوں ڈکیتی راہزنی اور بھتہ خوری کی متعدد وارداتوں میں پولیس کو مطلوب تھے،عدالت انہیں اشتہاری قرار دے چکی ہے۔
اطلاعات ہیں کہ دونوں ڈاکوئوں پر مختلف تھانوں میں مقدمات درج ہیں جن میں سے اصغر حسین عرف ککری پر دس سے زائد جبکہ عمران عرف ہرنی پر اکتیس مقدمات درج ہیں۔
