ARYNews.tv | Urdu – Har Lamha Bakhabar

Tag: sidney

  • اے بی ڈی ویلئیرزنے ویسٹ انڈین بالرز کے پرخچے اُڑادئیے

    اے بی ڈی ویلئیرزنے ویسٹ انڈین بالرز کے پرخچے اُڑادئیے

    سڈنی : جنوبی افریقی کپتان اے بی ڈی ویلئیرز نے سڈنی میں ویسٹ انڈیز بولرز کو دن میں تارے دکھادیئے۔ ڈی ویلئیرز نے ورلڈ کپ کی دوسری تیز ترین سینچری جڑدی۔

    سڈنی کا میدان ویسٹ انڈین بولرز کیلئے قبرستان بن گیا۔ پروٹیاز نے رحم کی تمام اپیلیں مسترد کردیں، جنوبی افریقی کپتان اے بی ڈی ولئیرز رنز کی مشین بن گئے،میچ کا نقشہ ہی بدل دیا۔

    گیند بلے پر آتی رہی اور باؤنڈری سے باہر جاتی رہی۔ اے بی  ڈی ویلئیرز کی بیٹنگ نے شائقین کو جھومنے پر مجبورکردیا۔ کپتان نے چھکا لگا کر باون گیندوں پر ورلڈ کپ کی دوسری تیز ترین سینچری بنائی۔

    ڈی ویلئیرز کا ہاتھ ایسا کھلا کے پھر روکنا مشکل ہوگیا۔ تیر ترین ففٹی اور سینچری کے بعد پروٹیاز کپتان نے ون ڈے کی تاریخ میں تیز ترین ایک سو پچاس رنز بھی بنالئے۔

    ڈی ویلئیرز کی ایک سو باسٹھ رنز کی دھواں دھار اننگز آٹھ چھکوں اور سترہ چوکوں سے سجی تھی۔ ون ڈے کی تیز ترین سینچری بنانے کا اعزاز بھی ڈی ویلئیرز کو ہی حاصل ہے۔

  • ورلڈ کپ : ساؤتھ افریقہ نے ویسٹ انڈیز کو 409 رنز کا ٹارگٹ دیدیا

    ورلڈ کپ : ساؤتھ افریقہ نے ویسٹ انڈیز کو 409 رنز کا ٹارگٹ دیدیا

    سڈنی : ورلڈ کپ کے گروپ بی کے میچ میں جنوبی افریقہ اور ویسٹ انڈیزمدمقابل ہیں، ورلڈ کپ کے گروپ بی کے میچ میں جنوبی افریقہ نے اے بی ڈویلیئر کی جارحانہ بیٹنگ کی بدولت ویسٹ انڈیز کو جیت کیلئے چار دو نو رنز کا ہدف دیا ہے۔

    تفصیلات کے مطابق سڈنی میں کھیلے جانے والے میچ کا ٹاس جنوبی افریقہ نے جیت کر پہلے بیٹنگ کا فیصلہ کیا۔ اٹھارہ رنز پر پہلی وکٹ گرنے کے بعد ہاشم آملہ اور ڈوپلیسی وکٹ پر ڈٹ گئے اور دوسری وکٹ کے لئے ایک سو ستائیس رنز کی شراکت قائم کی۔

    دونوں بیٹسمینوں نے نصف سینچریاں اسکور کیں۔ ہاشم آملہ پینسٹھ اور ڈوپلیسی باسٹھ رنزبناکر آؤٹ ہوئے۔ جس کے بعد ڈی ویلئیرز اور روسو کی جارحانہ بیٹنگ نے ٹیم کی پوزیشن مستحکم کردی۔

    اے بی ڈویلیئرایک سو باسٹھ رنز بنا کر ناٹ آؤٹ رہے۔  جنوبی افریقہ کی ٹیم نے پانچ کھلاڑیوں کے نقصان پر چار سو آٹھ رنز بنائے۔

    دونوں ٹیموں کے لئے یہ انتہائی اہم میچ ہے، جنوبی افریقہ نے اب تک دومیچز کھیلے ہیں، جس میں ایک میں کامیابی اور ایک میچ میں شکست کا سامنا کرنا پڑا جبکہ ویسٹ انڈیز نے اب تک تین میچز کھیلے ہیں۔ جس میں دو میچز میں اس کو کامیابی اور ایک میچ میں شکست کا سامنا کرنا پڑا ہے۔

    ورلڈکپ میں ویسٹ انڈیز اب تک اپنے تین میں سے دو میچز جیت کر پول بی کے پوائنٹس ٹیبل پر بھارت کے بعد دوسرے نمبر پر ہے جبکہ دومیں سے ایک میچ جیتنے اور ایک میں شکست کھانے والے جنوبی افریقی ٹیم دو پوائنٹس کے ساتھ چوتھے نمبر پر موجود ہے۔

  • وارم اپ میچ: پاکستان نے انگلینڈ کو چار وکٹ سے شکست دیدی

    وارم اپ میچ: پاکستان نے انگلینڈ کو چار وکٹ سے شکست دیدی

    سڈنی: پاکستان نے ورلڈ کپ کے وارم اپ میچ میں انگلینڈ کوچار وکٹ سے ہرا دیا، میچ کی اہم بات کپتان مصباح الحق کی شاندار بیٹنگ تھی، ان کے ساتھ عمراکمل نے بھرپورساتھ دیا۔.

    تفصیلات کے مطابق پاکستان نے وارم اپ میچ میں انگلینڈ کی ٹیم کو چار وکٹ سے شکست دیدی، مصباح الحق 91 رنز کے ساتھ ناٹ آؤٹ رہے، جبکہ عمر اکمل نے پینسٹھ رنز اسکور کئے۔

    حارث سہیل 33 اور صہیب مقصود بیس رنز کے ساتھ نمایاں رہے، انگلینڈ کی جانب سے جیمز اینڈریسن اور اسٹیورٹ براڈ  نے دو دو جبکہ کرس جورڈن اور جیمز ٹریڈول نے ایک ایک وکٹ لی۔

    اس سے قبل انگلینڈ کی ٹیم نے پہلے کھیلتے ہوئے  پاکستان کو دوسو اکیاون رنز کا ہدف دیا تھا،انگلش ٹیم نے مقررہ اوورزمیں آٹھ وکٹوں کے نقصان پر دوسو پچاس رنز بنا ئے۔

    جبکہ پاکستان کی جانب سے یاسر شاہ نے دس اوورز میں پینتالیس رنز دیکر تین کھلاڑیوں کو آؤٹ کیا۔ سہیل خان نے دو ،احسان عادل ،شاہد آفریدی اوروہاب ریاض نے ایک ایک کھلاڑی کو پویلین کی راہ دکھائی۔

    جواب میں پاکستان کے شاہینوں نے مذکورہ دوسواکیاون رنز کا ہدف 48.5  اوورز میں چھ کھلاڑیوں آؤٹ پر پورا کرلیا۔

  • وارم اپ میچ: انگلینڈ نے آٹھ وکٹوں پر دوسو پچاس رنز بنالئے

    وارم اپ میچ: انگلینڈ نے آٹھ وکٹوں پر دوسو پچاس رنز بنالئے

    سڈنی: وارلڈ اپ وارم اپ میچ میں انگلینڈ نے پاکستان کو دوسو اکیاون رنز کا ہدف دیدیا،انگلش ٹیم نے مقررہ اوورزمیں آٹھ وکٹوں کے نقصان پر دوسو پچاس رنز بنا لئے۔

    تفصیلات کے مطابق سڈنی میں کھیلے جارہے پاکستان اور انگلینڈ کے وارم اپ میچ میں انگلینڈ کی ٹیم پچاس اوورز میں ڈھائی سو رنز بنا کر آؤٹ ہوگئی۔

    جوروٹ پچیاسی رنز بنا کر نمایاں رہے، جبکہ پاکستان کی جانب سے یاسر شاہ نے دس اوورز میں پینتالیس رنز دیکر تین کھلاڑیوں کو آؤٹ کیا جبکہ سہیل خان نے دو ،احسان عادل ،شاہد آفریدی اوروہاب ریاض نے ایک ایک کھلاڑی کو پویلین کی راہ دکھائی۔

  • قومی ٹیم دوسرے وارم اپ میچ میں آج انگلینڈ کے مدمقابل

    قومی ٹیم دوسرے وارم اپ میچ میں آج انگلینڈ کے مدمقابل

     سڈنی: ورلڈ کپ کے لئے قومی ٹیم دوسرا وارم اپ میچ آج انگلینڈ کے خلاف سڈنی میں کھیلے گی، محمد عرفان کوریسٹ دیئے جانے کا امکان ہے۔

    مشن ورلڈ کپ کے آغاز سے قبل پاکستان کے پاس وارم اپ کا آخری موقع ہے سڈنی میں وارم اپ میچ میں پاکستان کا انگلینڈ سے ٹاکرا کے دوران صلاحیتوں کا ا امتحان ہوگا۔

    گرین شرٹس نے مسلسل ناکامیوں کو بریک بنگلہ دیش کے خلاف وارم اپ میچ میں مشکل سے لگائی۔

    انگلینڈ سے فتح ورلڈ کپ میں بھارت کے خلاف ہونے والے میچ میں قومی کھلاڑیوں کے حوصلے بلند کرسکتی ہے۔

    مسلسل پانچ میچز کھیلنے والے فاسٹ بولر محمد عرفان کو دوسرے وارم اپ میچ کیلئے ریسٹ دیئے جانے کا امکان ہے۔

    وکٹ کیپر سرفراز احمد کے ستارے بھی گردش میں ہیں، ذرائع کا کہنا ہے کہ انہیں ریسٹ دے کر عمر اکمل سے وکٹ کیپرنگ کرائی جائے گی، فاسٹ بولر راحت علی اور ناصر جمشید آج رات ٹیم کو جوائن کرلیں گے، انہیں فائنل الیون میں شامل کرنے کا فیصلہ ٹیم منیجمنٹ ان کی فٹنس دیکھنے کے بعد کرے گی۔

  • آسٹریلیا اورنیوزی لینڈ ورلڈ ٹی ٹوئنٹی کی بھی میزبانی کریں گے

    آسٹریلیا اورنیوزی لینڈ ورلڈ ٹی ٹوئنٹی کی بھی میزبانی کریں گے

     سڈنی : آئی سی سی نے دوہزار بیس ورلڈ ٹی ٹوئنٹی کی میزبانی مشترکہ طور پر آسٹریلیا اور نیوزی لینڈ کو سونپ دی۔ آئی سی سی کے چیف ایگزیکٹو ڈیوڈ رچرڈسن نے ورلڈ کپ سے چار روز قبل سڈنی میں نیوز کانفرنس کے دوران ورلڈ ٹی ٹوئنٹی کے میزبان ممالک کا اعلان کیا۔

    ورلڈ ٹی ٹوئنٹی کی میزبانی دیئے جانے پر کرکٹ آسٹریلیا کے چیف ایگزیکٹو جیمز سدرلینڈ نے خوشی کا اظہار کیا۔ ان کا کہنا تھا کہ آئی سی سی ایونٹ کی میزبانی کرنا اعزاز کی بات ہے۔

    ورلڈ کپ کے بعد ان کی تمام تر توجہ ورلڈ ٹی ٹوئنٹی پر مرکوز ہو گی۔ آسٹریلیا اور نیوزی لینڈ نے انیس سو بانوے میں پہلی مرتبہ آئی سی سی کے کسی بڑے ایونٹ کی میزبانی کی تھی۔۔ دوہزار پندرہ عالمی کپ بھی مشترکہ طور پر آسٹریلیا اور نیوزی لینڈ میں کھیلا جارہار ہے۔

  • محمد حفیظ، جنید خان کے بعد سہیل خان بھی انجری کا شکار

    محمد حفیظ، جنید خان کے بعد سہیل خان بھی انجری کا شکار

    سڈنی : پاکستان کرکٹ ٹیم کو انجری مسائل نے گھیر لیا ہے۔ محمد حفیظ، جنید خان کے بعد سہیل خان بھی انجری کا شکار ہوگئے۔ انگلینڈ کے خلاف دوسرے وارم اپ میچ سہیل خان کی شرکت مشوک ہوگئی ہے۔

    انجری نے پاکستان کرکٹ کا دروازہ ہی دیکھ لیا۔۔۔ پیچھا ہی نہیں چھوڑ رہی۔ ایک کے بعد ایک کھلاڑی انجرڈ ہورہا ہے۔ ورلڈ کپ کے لئے ٹیم کتنی فٹ ہے سوال کھڑے ہوگئے۔

    پہلے جنید خان، پھر محمد حفیظ اور اب سہیل خان بھی انجری میں مبتلا ہوگئے۔ بنگلہ دیش کے خلاف وارم اپ میچ میں سہیل خان چھ اوور کرانے کے بعد پنڈلی میں تکلیف کے باعث میدان سے باہر چلے گئے اور وہ مزید بولنگ نہیں کرسکیں گے۔

    سال یہ پیدا ہوتا ہے کہ کیا پاکستانی ٹیم کو ایک اور دھچکا لگنے والا ہے؟؟ محمد حفیظ اور جنید خان تو پہلے ہی ورلڈ کپ سے باہر ہوگئے ہیں۔

    سہیل خان کی انگلینڈ کے خلاف دوسرے وارم میچ میں شرکت مشکوک ہوگئی ہے۔ پی سی بی کا کہنا ہے کہ سہیل خان کی انجری شدید نوعیت کی نہیں۔تاہم  انہیں آرام کا مشورہ دیا گیا ہے امید ہے وہ جلد ٹھیک ہوجائیں گے۔

  • بنگلہ دیش نے پاکستان کو دوسو سینتالیس رنز کا ہدف دیدیا

    بنگلہ دیش نے پاکستان کو دوسو سینتالیس رنز کا ہدف دیدیا

    سڈنی : ورلڈ کپ سے قبل ہونے والے وارم اپ میچز جاری ہیں۔ عالمی ورلڈ کپ کے وارم اپ میچ میں پاکستان اور بنگلہ دیش کی ٹیمیں مد مقابل ہیں۔

    تفصیلات کے مطابق سڈنی میں کھیلے جارہے وارم اپ میچ میں  بنگلہ دیش کے کپتان نے ٹاس جیت کر پہلے بیٹنگ کا فیصلہ کیا۔بنگلہ دیش کی پوری ٹیم مقررہ اوور ز سے صرف ایک گیند قبل دو سو چھیالیس رنز بنا کر آؤٹ ہوگئی۔

    بنگلہ دیشی اوپنر کھیل کا اچھا آغاز نہ کر سکے اور پاکستان کے سہیل خان نے اپنے دوسرے اوور میں انعام الحق کو پویلین بھیج دیا جبکہ محمد عرفان نے مومن الحق کا کیچ پکڑ کر چلتا کیا ۔انعام الحق صفر جبکہ مومن الحق صرف سولہ رنز بنا کر آؤٹ ہوئے۔

    محمود اللہ نے 83 اور تمیم اقبال نے 81 رنز بنا ئے، اور شکیب الحسن 31 رنز بنا کر آؤٹ ہوئے۔ اس کے علاوہ بنگلہ دیش کا کوئی کھلاڑی اہم کارکر دگی نہ دکھا سکا۔

    محمد عرفان نے  اکیاون رنز دے کر پانچ کھلاڑیوں کو آؤٹ کیا۔یاسر نے دو وکٹیں ، جبکہ سہیل خان اور وہاب ریاض کے حصے میں ایک ایک وکٹ آئی۔

    علاوہ ازیں  ورلڈ کپ کے دوسرے وارم اپ میچ میں جنوبی افریقہ نے سری لنکا کو پانچ وکٹوں سے شکست دے دی۔ نیوزی لینڈ اور زمبابوے کا میچ بارش کی نذر ہوگیا۔

    ویسٹ انڈیز اور انگلینڈ کا مقابلہ جاری ہے۔ سڈنی میں انگلینڈ نے ویسٹ انڈیز کو قابو کرلیا۔ ویسٹ انڈیز نے ٹاس جیت کر پہلے بیٹنگ کا فیصلہ کیا۔

    ویسٹ انڈین بیٹسمین انگلش بولرز کے سامنے بے بس دکھائی دیئے اور پوری ٹیم تیسویں اوور میں ایک سو بائیس رنزبناکر آؤٹ ہوگئی۔

    ویسٹ انڈیز کے سات بیٹسمین ڈبل فیگرز تک بھی نہ پہنچ سکے۔ کرس ووکس نے پانچ وکٹیں حاصل کیں۔ دوسرے میچ میں جنوبی افریقہ نے سری لنکا کو ڈک ورتھ لوئس قانون کے تحت پانچ وکٹوں سے شکست دے دی۔

  • انجریز مسائل: کئی اہم کرکٹرز ورلڈ کپ نہیں کھیل پائیں گے

    انجریز مسائل: کئی اہم کرکٹرز ورلڈ کپ نہیں کھیل پائیں گے

    سڈنی : ورلڈ کپ دو ہزار پندرہ پر انجریز کے سائے منڈلانے لگے۔ کئی ٹیموں کے سپر اسٹارز انجریز مسائل کی وجہ سے میگا ایونٹ سے آؤٹ ہوگئے۔

    کرکٹ کے سب سے بڑے عالمی میلے کو انجری مسائل نے اپنی لپیٹ میں لے لیا ہے۔ میگا ایونٹ کے آغاز سے قبل کئی ٹیموں کے اسٹارز کھلاڑی زخمی ہوکر ٹورنامنٹ سے آؤٹ ہوگئے۔

    انجری مسائل نے سب سے زیادہ نقصان گرین شرٹس کو پہنچایا ہے۔ پہلے فاسٹ بولر جنید خان ان فٹ ہوکر عالمی کپ سے باہر ہوئے اور اب قومی ٹیم پروفیسر کے کارآمد فارمولے سے بھی محروم ہوگئی۔

    میزبان ٹیم آسٹریلیا بھی فٹنس مسائل سے کافی پریشان ہے، آسٹریلوی قائد مائیکل کلارک اور آل راؤنڈرجیمزانجریزمسائل کی وجہ سے ورلڈ کپ کا افتتاحی میچ حصہ نہیں کھیل سکیں گے۔

    ایشین ٹائیگرز کا سب سے اہم ہیتھار لاستھ ملنگا ٹخنے کی انجری سے نجات پانے میں تاحال ناکام ہیں۔ چھ ماہ سے کرکٹ سے دورملنگا کی پہلے میچ میں شرکت پرسوالیہ نشان ہے۔

    دفاعی چیمپیئن بھارت بھی انجری مسائل سے نہ بچ سکی۔ ایشانت شرما گھٹنے کی انجری کے سبب ورلڈ کپ سے باہر ہوگئے۔

    ورلڈ کپ سے قبل انجری مسائل کئی ٹیموں کو بڑے بڑے دھچکے دے چکی ہے۔ اور نہ جانے مزید کتنے کھلاڑی فٹنس مسائل کا شکار ہوکر عالمی میلہ کھیلے بغیر گھر جائیں گے۔

  • ورلڈ کپ میں سعید اجمل کی شمولیت مشکل ہے

    ورلڈ کپ میں سعید اجمل کی شمولیت مشکل ہے

    سڈنی : پاکستان کرکٹ ٹیم کے کپتان مصباح الحق نے کہا ہے کہ حال میں ہماری ون ڈے میں کارکردگی اچھی نہیں رہی، کوشش یہی ہے کہ ٹیم کی خراب کارکردگی کے تسلسل کو توڑنے میں کامیاب ہوجائیں۔

    سڈنی میں پریس کانفرنس کرتے ہوئے پاکستان ٹیم کے کپتان مصباح الحق کا کہنا تھا کہ سعید اجمل بہترین بولر ہیں، لیکن انھوں نے معطلی کے بعد بالکل بھی انٹرنیشنل کرکٹ نہیں کھیلی ہے۔

    ورلڈ کپ میں سعید اجمل کی شمولیت کا فیصلہ بہت مشکل ہے۔سعید اجمل کو خود بھی یقین نہیں وہ انٹرنیشنل کرکٹ کب کھیلیں گے۔

    پاکستان ٹیم کی موجودہ کارکردگی کے حوالے سے مصباح نے کہا کہ گذشتہ کچھ سیریزمیں ٹیم کی کارکردگی اچھی نہیں رہی۔ کوشش ہوگی کہ خراب پرفارمنس کے بھنور سے نکلا جائے۔

    انہوں نے کہا کہ ٹیم کو ایک اچھی جیت کی ضرورت ہے، ایک مرتبہ جیت کا سلسلہ شروع ہوا تو کارکردگی بہتر ہوتی چلی جائے گی۔

    مصباح الحق نے مزید کہا کہ جنید خان کی انجری سے ٹیم کو بڑا نقصان ہوا، اس ٹیم کے بارے میں بھی کافی پرعزم ہوں، یہ ٹیم کسی بھی ٹیم کو مشکل میں ڈال سکتی ہے۔