ARYNews.tv | Urdu – Har Lamha Bakhabar

Tag: sikh community

  • سکھ برادری کا دنیا بھر میں 8 جولائی کو آزاد خالصتان ریلیاں منعقد کرنے کا اعلان

    سکھ برادری کا دنیا بھر میں 8 جولائی کو آزاد خالصتان ریلیاں منعقد کرنے کا اعلان

    سکھ برادری نے دنیا بھر میں 8 جولائی کو ہردیپ سنگھ نجر کی یاد میں آزاد خالصتان ریلیاں منعقد کرنے کا اعلان کر دیا ہے۔

    میڈیا رپورٹس کے مطابق آٹھ جولائی کو سکھ برادری کے افراد امریکا، برطانیہ، کینیڈا اور آسٹریلیا سمیت کئی ممالک میں ہردیپ سنگھ نجر کی یاد میں آزاد خالصتان ریلیاں نکالیں گے۔

    یہ ریلیاں امریکی شہر سان فرانسسکو، کینیڈا کے شہر ٹورنٹو اور آسٹریلیا کے شہر برسبین میں نکالی جائیں گی، ریلیوں کے اختتام پر بھارتی سفارت خانوں کے باہر مظاہرے اور مذمتی قراردادیں پیش کی جائیں گی۔

    ریلیوں میں بڑی تعداد میں مظاہرین کی شرکت متوقع ہے، ہردیپ سنگھ نجر کو بدنام زمانہ بھارتی ایجنسی را کے قاتلوں نے 18 جون کو کینیڈا میں گردوارے کے باہر قتل کر دیا تھا۔

    رہنما کے قتل پر سکھوں کا بھارتی خفیہ ایجنسی ’’را‘‘ کے ضلعی ہیڈکوارٹر کے باہر مظاہرہ

    آزاد خالصتان ریلیوں سے متعلق اشتہاری پوسٹرز بھی جاری کر دیے گئے ہیں، ان پوسٹرز میں متعلقہ بھارتی سفیروں کو قاتل قرار دیا گیا ہے، آزاد خالصتان کی زور پکڑتی تحریک پر مودی سرکار شدید دباوٴ میں ہے۔

  • سکھ کمیونٹی کا جنیوا میں سیاسی قیدیوں کی رہائی کے لیے احتجاجی مظاہرہ

    سکھ کمیونٹی کا جنیوا میں سیاسی قیدیوں کی رہائی کے لیے احتجاجی مظاہرہ

    جنیوا: سکھ کمیونٹی نے جنیوا میں سیاسی قیدیوں کی رہائی کے لیے احتجاجی مظاہرہ کیا ہے۔

    تفصیلات کے مطابق سکھ کمیونٹی نے مودی سرکار کے بہیمانہ مظالم کے خلاف احتجاجی مظاہرہ کرتے ہوئے جینوا میں عالمی برادری سے مدد کی اپیل کر دی ہے۔

    احتجاجی مظاہرہ جنیوا میں اقوام متحدہ انسانی حقوق کونسل کے ہیڈکوارٹرز کے سامنے کیا گیا، جس کا مقصد سیاسی قیدیوں کی رہائی تھا، واضح رہے کہ اس وقت جنیوا میں اقوام متحدہ کے انسانی حقوق کونسل کے ہیڈکوارٹر میں اجلاس جاری ہے، جس میں دنیا بھر سے انسانی حقوق کی تنظیمیں اور سفارت کار شریک ہیں۔

    احتجاج کے دوران مظاہرین نے مُودی حکومت کے خلاف شدید نعرے بازی کی، شرکا کا کہنا تھا کہ بھارت میں خالصتان کا نام لینے والوں کو غیر آئینی اور غیر قانونی طور پر قید کیا جاتا ہے، اور عدالتوں کی جانب سے دی جانی والی سزا کے بعد بھی قیدیوں کو رہا نہیں کیا جاتا۔

    سکھ کمیونٹی کا کہنا ہے کہ جنیوا کنونشن بین الاقوامی قوانین کے خلاف اور سراسر غیر آئینی غیر قانونی ہے، بھارت میں سکھوں اور دیگر مذہبی اقلیتوں کے ساتھ مظالم میں روز بہ روز اضافہ ہو رہا ہے، عالمی برادری بھارت میں سکھوں کے ساتھ ہونے والے مظالم پر نوٹس لے۔

    سکھ مظاہرین نے مودی حکومت کے خلاف پلے کارڈ اٹھا رکھے تھے، اور ان کا کہنا تھا کہ خالصتان کے قیام تک وہ اپنی جدوجہد جاری رکھیں گے۔

  • وزیراعظم عمران خان کی سکھوں کو باباگرونانک کے جنم دن پر مبارکباد

    وزیراعظم عمران خان کی سکھوں کو باباگرونانک کے جنم دن پر مبارکباد

    اسلام آباد : وزیراعظم عمران خان نے سکھوں کو باباگرونانک کے جنم دن پر مبارکباد دیتے ہوئے کہا سکھ برادری کو مذہبی رسومات کے لیے سہولیات فراہم کرتے رہیں گے۔

    تفصیلات کے مطابق سکھوں کےروحانی پیشواباباگرونانک کے پانچ سو باون ویں جنم دن کی تقریبات جاری ہے ، وزیراعظم عمران خان نے سماجی رابطے کی ویب سائٹ ٹوئٹر پر سکھوں کو بابا گرونانک کے جنم دن پر مبارکباد دیتے ہوئے کہا ہم سکھوں کو پاکستان میں ان کے مذہبی مقامات کا دورہ کرنے پر خوش آمدید کہتے ہیں، سکھ برادری کو مذہبی رسومات کے لیے سہولیات فراہم کرتے رہیں گے۔

    دوسری جانب وزیراعلیٰ پنجاب عثمان بزدار نے سکھ برادری کوباباگرونانک کے552ویں جنم دن پرمبارکباد دیتے ہوئے اپنے پیغام میں کہا کہ باباگورونانک کاجنم دن سکھ برادری کےلئےخوشیوں بھرا تہوار ہے، سکھ برادری کو پنجاب آمدپر”جی آیاں نوں“کہتے ہیں۔

    عثمان بزدار کا کہنا تھا کہ ہرسال سکھ برادری کی مہمان نوازی کرکےدلی خوشی ہوتی ہے، سکھ برادری کوتقریبات میں شرکت کی ادائیگی کیلئےسہولیات فراہم کی ہیں، ایک دوسرےکی خوشیوں میں شریک ہونےسےبھائی چارےکوفروغ ملتا ہے۔

    انھوں نے مزید کہا کہ بابا گورونانک نےامن وآتشی،اخوت،بھائی چارے اور محبت کا پیغام دیا، باباگرونانک مذہبی رواداری اوربین المذاہب ہم آہنگی کی بہترین مثال تھے۔

    وزیراعلیٰ پنجاب کا کہنا تھا کہ پنجاب سمیت پاکستان میں سکھ برادری کے مقدس مقامات موجود ہیں، سکھ برادری کواپنےعقائدکےمطابق زندگی بسرکرنےکی مکمل آزادی ہے، سکھ برادری سمیت اقلیتوں کی فلاح وبہبودحکومت کی ترجیحات میں شامل ہے، تحریک انصاف کی حکومت نےاقلیتوں کے حقوق کےتحفظ کو یقینی بنایا ہے۔

  • وزیر اعظم کی سکھ برادری کو بیساکھی کی مبارکباد

    وزیر اعظم کی سکھ برادری کو بیساکھی کی مبارکباد

    اسلام آباد: وزیر اعظم عمران خان نے سکھ برادری کو ان کے مذہبی تہوار بیساکھی کی مبارک باد دیتے ہوئے کہا ہے کہ پاکستان میں موجود مذہبی مقامات کے دورے کے لیے خصوصی اجازت دی گئی ہے۔

    تفصیلات کے مطابق وزیر اعظم عمران خان نے سماجی رابطے کی ویب سائٹ ٹویٹر پر ٹویٹ کرتے ہوئے سکھ برادری کو ان کے تہوار بیساکھی کی مبارکباد دی۔

    وزیر اعظم کا کہنا تھا کہ بھارتی سکھ یاتریوں کو خصوصی اجازت دی گئی ہے تاکہ وہ بیساکھی کی رسومات ادا کرنے کے لیے پاکستان میں موجود مذہبی مقامات کا دورہ کرسکیں۔

    انہوں نے کہا کہ ایس او پیز کے تحت یاتریوں کو لنگر، ٹرانسپورٹ اور رہائشی سہولیات دی جائیں گی۔

    خیال رہے کہ ہر سال بھارت سے سکھ یاتری اپنے مذہبی تہواروں کے موقع پر کرتار پور اور ننکانہ صاحب میں گردوارہ جنم استھان پہنچتے ہیں اور اپنی مذہبی رسومات ادا کرتے ہیں۔

  • خالصتان کے لیے ریفرنڈم کی تیاری : سکھوں کا واشنگٹن میں ہیڈ کوارٹرز قائم

    خالصتان کے لیے ریفرنڈم کی تیاری : سکھوں کا واشنگٹن میں ہیڈ کوارٹرز قائم

    واشنگٹن : سکھوں نے خالصتان کے لیے ریفرنڈم کی تیاری شروع کردی ہے، دنیا بھر کے سکھ نومبر دوہزار بیس میں اپنی الگ ریاست کا فیصلہ کریں گے، سکھ فار جسٹس نے واشنگٹن میں ہیڈ کوارٹرز قائم کردیا۔

    تفصیلات کے مطابق بھارتی پنجاب سمیت سکھ مذہب سے تعلق رکھنے والے دنیا بھر کےسکھ قائدین بھارتی قبضے سے خو د کو آزاد کرانے اور خالصتان سکھ سٹیٹ قائم کرنے کے لیے کافی عرصے سے کوشاں ہیں اسی سلسلے میں پنجاب کو آزاد کرانے کے حوالے سے مہم زوروشورسے جاری ہے.

    اس سلسلے میں ریفرنڈم کی تیاری کا آغاز کردیا گیا ہے، سکھ فار جسٹس نے اپنا ہیڈکوارٹر قائم کیا ہے، ریفرنڈم کیلئے20 ملکوں میں پولنگ بوتھ قائم کیے جائیں گے، جس میں بھارتی سکھ آن لائن ووٹنگ کے ذریعےحصہ لیں گے۔

    واشنگٹن کی نیشنل پریس بلڈنگ میں پریس کانفرنس سے خطاب کرتے ہوئے سکھ فار جسٹس کے قانونی مشیر گرپتونت سنگھ پنو کا کہنا تھا کہ سکھوں کیخلاف جاری بھارتی پروپیگینڈے کا جواب دینے کیلئے امریکی دارالحکومت میں تنظیم کا ہیڈ کوارٹر قائم کیا جارہا ہے.

    نومبر 2020 میں ہونے والے ریفرنڈم کی تیاری بھی اب واشنگٹن سے کی جائے گی، امریکی محکمہ خارجہ سمیت کانگریس اراکین کے سامنے بھارت کا مکروہ چہرہ بے نقاب کیا جائے گا.

    ایک سوال کے جواب میں بھارت میں شہریت کے حوالے سے نئے متنازعہ قانون پر بات کرتے ہوئے مقررین کا کہنا تھا کہ مودی حکومت کے اس اقدام سے ثابت ہوتا ہے کہ بھارت میں اقلیتوں کیلئے کوئی جگہ نہیں، کشمیریوں سمیت سکھوں اور دیگر اقلیتوں کے حقوق خطرے میں ہیں.

    انہوں نے مزید کہا کہ ریفرنڈم کیلئے بیس ممالک میں پولنگ بوتھ قائم کئے جائیں گے جبکہ بھارت میں رہنے والی سکھ آن لائن ووٹنگ کے ذریعے ریفرنڈم میں حصہ لیں گے،،دنیا بھر کے سکھ ریفرنڈم میں اپنی الگ ریاست کے حوالے سے فیصلہ کریں گے۔

  • آج نہ صرف بارڈر بلکہ سکھوں کے لئے اپنے دل کھول رہے ہیں، وزیراعظم

    آج نہ صرف بارڈر بلکہ سکھوں کے لئے اپنے دل کھول رہے ہیں، وزیراعظم

    اسلام آباد : وزیراعظم عمران خان نے کہا ہے کہ آج نہ صرف بارڈر بلکہ سکھوں کے لئے اپنے دل کھول رہے ہیں، کرتارپور راہداری منصوبہ ثابت کرتا ہے ہمارے دل تمام مذاہب کے پیروکاروں کے لئے کھلے ہیں۔

    تفصیلات کے مطابق وزیراعظم عمران خان نے کرتارپورراہداری کے افتتاح کے موقع پر سکھ برادری کو مبارک باد دیتے ہوئے کہا ہے کہ مسلمان مقدس مقامات کی زیارت کی اہمیت کو سمجھتے ہیں، آج نہ صرف بارڈر بلکہ سکھوں کےلئےاپنےدل کھول رہے ہیں، منصوبہ ثابت کرتا ہے ہمارے دل تمام مذاہب کے پیروکاروں کے لئے کھلے ہیں۔

    خیال رہے پاکستان میں آج نئی تاریخ رقم ہوگی ، وزیراعظم عمران خان کرتارپور راہداری کا افتتاح کریں گے، تاریخ میں پہلی بار بھارتی سکھ یاتری بغیر ویزا پاکستان آرہے ہیں۔

    زیرو لائن پر سکھ یاتریوں کے استقبال کی تیاریاں مکمل کرلی گئیں ہیں، سکھ یاتریوں کے لئے 76 کاؤنٹر فعال کردیے گئے ہیں، پاک بھارت سرحدی مقام زیرو پوائنٹ پر سکھ یاتریوں کی آمد جاری ہے اور یاتریوں کو زیرو پوائنٹ سے گردوارہ لانے کے لئے بسیں ٹرمینل پر پہنچادی گئیں ہیں۔

    مزید پڑھیں : وزیراعظم عمران خان آج تاریخی منصوبے کرتارپور راہداری کا افتتاح کریں گے

    وزیراعظم کےاعلان کے مطابق سکھ یاتریوں کو پاسپورٹ اور 20 ڈالرفیس کی ادائیگی سے استثنیٰ حاصل ہیں جبکہ کرتارپورراہداری کی افتتاحی تقریب کے پیش نظر نارووال میں چھٹی کا اعلان کیا گیا ہے۔

    و اضح رہے کہ18 اگست 2018ء کو وزیراعظم عمران خان کی تقریب حلف برداری میں آرمی چیف نے سابق بھارتی کرکٹر نوجوت سنگھ سدھو کو کرتارپور راہداری کھولنے کی نوید سنائی تھی۔

    بعد ازاں جذبہ خیرسگالی کے تحت 28 نومبر 2018ء کو وزیراعظم عمران خان نے کرتارپور راہداری کا سنگ بنیاد رکھا تھا اور پاکستان کی جانب سے سکھ برادری کے لیے شاندار انتظامات کئے گئے تھے۔

  • کرتارپورراہداری منصوبہ، فیز ون کی تعمیر پر 45 فیصدکام مکمل

    کرتارپورراہداری منصوبہ، فیز ون کی تعمیر پر 45 فیصدکام مکمل

    نارووال: کرتارپور راہداری منصوبے کے فیز ون کی تعمیر پر 45 فیصد کام مکمل کرلیا گیا ہے ، فیز ون میں گردوارے سے پاک بھارت زیرو پوائنٹ تک روڈ کی تعمیر شامل ہیں، سکھ یاتریوں کی سہولت کے لئےگردوارے کو وسیع کیا جارہا ہے۔

    تفصیلات کے مطابق کرتارپور میں نارووال سے7 گنا بڑا شہرآباد کیا جارہا ہے، نارووال شہر 130 ایکڑ سے 150 ایکڑ اراضی پرمحیط ہے، کرتارپور راہداری منصوبے کے فیز ون کی تعمیر پر 45 فیصد کام مکمل کرلیا گیا ہے۔

    [bs-quote quote=” فیزون میں گردوارے سے پاک بھارت زیروپوائنٹ تک روڈ کی تعمیرشامل ہیں” style=”style-7″ align=”left”][/bs-quote]

    منصوبے کے لئے 43 مربع، 8 ہزار 600 کنال زمین ایکوائرکی جارہی ہے، فیزون میں گردوارے سے پاک بھارت زیروپوائنٹ تک روڈ کی تعمیرشامل ہیں۔

    دریائے راوی پر پل اورامیگریشن ٹرمینل کی تعمیرکی جارہی ہے، پل کے لیے پلر اور کالم تیار کیے جارہےہیں جبکہ چاروں اطراف سڑکوں کے بیڈ تیار کر دیئے گئے ہیں۔

    سکھ یاتریوں کی سہولت کیلئےگردوارےکووسیع کیاجارہاہے اور نارووال میں شاپنگ مال، 5 اسٹار اور 7اسٹار ہوٹل بھی تعمیر کیے جائیں گے۔

    یاد رہے نومبر 2018 کو وزیراعظم عمران خان نے شکرگڑھ میں کرتارپورراہداری کا سنگ بنیاد رکھا تھا اور دنیا کو پیغام دیاکہ پاکستان نفرت کا جواب بھی محبت سے دیتا ہے۔

    مزید پڑھیں : وزیراعظم عمران خان نے کرتارپورکوریڈور کا سنگ بنیاد رکھ دیا

    تقریب میں آرمی چیف جنرل قمر جاوید باجوہ ، وزیرخارجہ شاہ محمود قریشی،بھارتی وزیروں کا وفد، کئی ملکوں کے سفارتکار، عالمی مبصرین اور سکھ برادری نے بڑی تعداد میں شرکت کی، خصوصی مہمان نوجوت سنگھ سدھو نے بھی تقریب میں موجود تھے۔

    وزیراعظم نے اپنے خطاب میں بھارت کو پھر مذاکرات کی دعوت دیتے ہوئے کہا تھا ہندوستان ایک قدم بڑھائےہم دوبڑھائیں گے، بارڈرکھل جائیں توتیزی سےغربت کم ہوگی، ماضی صرف سیکھنے کے لیے ہے، ہم آگےبڑھنا چاہتےہیں، نیا چاند پرپہنچ گئی کیاہم کشمیرکامسئلہ حل نہیں کرسکتے۔

    آرمی چیف کا کہنا تھا کہ کرتارپوربارڈرکھلناخطے میں امن کی جانب بڑا قدم ہے، کوریڈور اورگیٹس پُرامن لوگوں کی قانونی گزرگاہیں ہیں۔

    خیال رہے کرتار پور راہداری ایک سال میں مکمل ہوگی، ساڑھے چار کلو میٹر طویل سڑک دریائے راوی پر آٹھ سومیٹرطویل پل اورپارکنگ ایریابھی بنایا جائے گا، اگلے سال نومبر میں بابا گرو نانک کے پانچ سو پچاسویں جنم دن سے پہلے کام مکمل کرلیا جائے گا، جس کے بعدسکھ یاتری بغیر ویزادربار پر حاضری دینے آسکیں گے۔

  • کرتار پوربارڈر: سکھ برادری کی پاکستان کا شکریہ ادا کرنے کے لیے خصوصی تقریب

    کرتار پوربارڈر: سکھ برادری کی پاکستان کا شکریہ ادا کرنے کے لیے خصوصی تقریب

    لندن : کرتار پور بورڈر کھولے جانے کے حوالے سے منعقدہ تقریب میں سکھ برادری نے اسے پاکستان وزیر اعظم کا تاریخی اقدام قرار دے دیا۔

    تفصیلات کے مطابق لندن کے ساؤتھ ہال میں کرتار پور بارڈر کھولے جانے پر سکھ کمیونٹی نے پاکستانی حکومت کا شکریہ ادا کرنے کے لیے خصوصی تقریب کا انعقاد کیا۔

    تقریب میں سکھ برادری سے تعلق رکھنے والے ممبران پارلیمنٹ اور کونسلرزکی بڑی تعداد شریک ہوئی ۔شرکاء نے کرتارپور راہداری کو وزیراعظم عمران خان کا تاریخی اقدام قرار دیتے ہوئے قرار دیا کہ کرتارپور بارڈ کھولنے کا فیصلہ کرکے پاکستان نے بھارت کیساتھ امن اور محبت کی مثال قائم کردی ہے ۔

    سکھ کمیونیٹی نے حکومت پاکستان کا شکریہ ادا کرتے ہوئے کہا کہ کرتارپور بارڈر کھل جانے سے دونوں ممالک کے درمیاں فاصلے کم ہوں گے۔ اس موقع پر سکھ کمیونٹی نے پاک فوج کی قیادت کو بھی خراج تحسین پیش کیا۔

    یاد رہے کہ گزشتہ ماہ وزیراعظم عمران خان نے کرتارپور کوریڈورکا سنگ بنیاد رکھ کر تاریخ رقم کردی تھی ، کرتارپورراہداری کے ذریعے بھارتی سکھ بنا ویزے کے کرتارپور صاحب درشن کے لئے آسکیں گے۔

    تقریب میں عمران خان کے ہمراہ آرمی چیف جنرل قمر باجوہ بھی موجود تھے ۔ ان کے ساتھ وفاقی وزراء، وزیر خارجہ شاہ محمودقریشی، شفقت محمود، گورنر پنجاب چوہدری سرور، شیخ رشید اور غیر ملکی سفیر بھی کرتار پورکوریڈور کے سنگ بنیاد کی افتتاحی تقریب میں شریک ہوئے جبکہ بھارت سے نوجوت سنگھ سدھو اور 2بھارتی وزرا بھی موجود تھے ، تقریب میں سکھ یاتریوں کی بھی بڑی تعداد شریک تھی۔

  • وزیراعظم عمران خان کل کرتارپور راہداری کی سڑک کا سنگ بنیاد رکھیں گے

    وزیراعظم عمران خان کل کرتارپور راہداری کی سڑک کا سنگ بنیاد رکھیں گے

    نارووال : وزیراعظم عمران خان کل کرتارپور راہداری کی سڑک کا سنگ بنیاد رکھیں گے، کرتار پور بارڈر سے لے کر گردوارے تک ساڑھے چار کلو میٹر طویل کوریڈور تعمیر کیا جائے گا۔

    تفصیلات کے مطابق وزیراعظم عمران خان کل دوپہر کے وقت کرتارپور راہداری کی سڑک کا سنگ بنیاد رکھیں گے، کوریڈور کی تعمیر میں دریائے راوی پر پل اور بارڈر کے قریب مختلف محکموں کے دفاتر کے قیام کا بھی سنگ بنیاد رکھا جائے گا۔

    کرتارپور راہداری کی سڑک کی سنگ بنیاد تقریب کے لیے اسٹیج کی تیاری آخری مراحل میں ہیں ، 20 فٹ چوڑا 60 فٹ طویل اسٹیج بنایا جا رہا ہے اور راہداری منصوبے کی سڑک کو ہموار کیا جا رہا ہے۔

    وزیراعظم کے سنگ بنیاد رکھتے ہی تعمیر کاکام باضابطہ شروع ہو جائے۔

    بدھ کے روز پاکستان کی جانب سنگ بنیاد رکھنے کی تقریب میں کسی بھی اعلی بھارتی شخصیت کی شمولیت کا امکان انتہائی کم ہے تاہم کرتارپور کوریڈور سنگ بنیاد کی تقریب میں بھارتی وفد اور 40صحافی کوریج کے لئے پاکستان آئیں گے۔

    مزید پڑھیں :  کرتارپورراہداری کے سنگ بنیاد کی تقریب، ،بھارتی وفد اور 40 بھارتی صحافی پاکستان آئیں گے

    خیال رہے بھارت نے گزشتہ روز اپنی جانب بابا ناننک گردوارے سے بارڈر تک کوریڈور کا سنگ بنیاد رکھ دیا تھا۔

    وزیراعظم عمران خان نے کرتارپور راہداری کے افتتاح پر نوجوت سنگھ سدھوکو دورہ پاکستان کی دعوت دے دی ، جسے نوجوت سنگھ سدھونے دعو ت قبول کرتے ہوئے کہا تھا مجھے تقریب میں مدعو کئے جانا باعث فخر ہے۔

    یاد رہے بھارت کے دفترخارجہ نے نئی دہلی میں پاکستانی ہائی کمیشن کو خط لکھ کر گرونانک کے جنم دن پر کرتارپور کوریڈور کھولنے پر شکریہ ادا کیا تھا جبکہ بھارت کی کابینہ نے کرتارپور بارڈر تک کوریڈورکی تعمیر کی منظوری بھی دی تھی۔

    جس کے بعد وفاقی وزیراطلاعات فوادچوہدری نے سماجی رابطے کی ٹوئٹ میں کہا تھا کہ کرتارپور بارڈر کھلنا دونوں ممالک کی امن پسند لابی کی فتح ہے، بھارتی کابینہ نے کرتارپوربارڈر پرپاکستان کی تجویز کی توثیق کردی، یہ درست سمت میں قدم ہے، توقع ہے ایسے اقدامات سے سرحد کی دونوں جانب متوازن آوازوں کی حوصلہ افزائی ہوگی۔

    وزیرخارجہ شاہ محمود قریشی نے سماجی رابطے کی ویب سائٹ ٹوئٹر پر اپنے بیان میں کہا تھا کہ بھارت کو باباگرونانک کے 550 جنم دن پر کرتارپور کھولنے کا مطلع کرچکے ہیں۔

    واضح رہے وزیراعظم عمران خان کی تقریب حلف برداری میں سابق بھارتی کرکٹرنوجوت سدھو نے آرمی چیف جنرل قمرباجوہ سے کرتارپوربورڈرکھولنے کی درخواست کی تھی۔

    جس پر انٹرویو میں وزیراطلاعات فواد چوہدری کا کہنا تھا پاکستان جلد سکھ یاتریوں کے لیے کرتار پور بارڈر کھول دے گا، جس کے بعد یاتری ویزے کے بغیر گردوارہ دربار صاحب کے درشن کر سکیں گے۔

  • امریکا میں مقیم سکھ برادری کی وزیرخارجہ سے مذہبی رسومات کیلئے ایک لاکھ ویزے جاری کرنے کی درخواست

    امریکا میں مقیم سکھ برادری کی وزیرخارجہ سے مذہبی رسومات کیلئے ایک لاکھ ویزے جاری کرنے کی درخواست

    نیویارک : امریکا میں مقیم سکھ برادری نے وزیرخارجہ شاہ محمود قریشی سے کرتار پور بارڈر کھولنے کے پاکستانی اقدام کا خیر مقدم کیا اور مذہبی رسومات کیلئے ایک لاکھ ویزے جاری کرنےکی درخواست کردی۔

    تفصیلا ت کے مطابق امریکا میں مقیم سکھ برادری نے وزیرخارجہ شاہ محمود قریشی کو خط لکھا ، خط میں کرتارپور بارڈر کھولنے کے پاکستانی اقدام کا خیر مقدم کیا گیا۔

    خط میں مذہبی رسومات کیلئے ایک لاکھ ویزے جاری کرنے کی درخواست بھی کردی۔

    سکھ فار جسٹس کے گُرپَتوَنت سنگھ پنوں نے اے آروائی نیوز سے گفتگو کرتے ہوئے کہا کہ پاکستان میں سکھ کمیونٹی آزادی سے مذہبی رسومات اداکرتی ہے۔

    انہوں نے مزید بتایا کہ بھارتی مظالم کیخلاف ہفتے کو اقوام متحدہ کے سامنے سکھ برادری احتجاج کرے گی۔

    مزید پڑھیں :  پاکستان کے کرتارپور بارڈر کھولنے کے بیان پر سکھ برادری خوشی سےنہال

    واضح رہے کہ کرتار پور کا بارڈر کھولنے کے اعلان کے بعد سکھ برادری میں خوشی کی لہر دوڑ گئی تھی، نارووال کی تحصیل شکرگڑھ میں موجود دربار کرتارپور کے گیانی گوبند سنگھ کا کہناتھا  وزیراطلاعات کے بیان سے پوری دنیا کے سکھ خوش ہوئے ہیں، دنیا میں پاکستان کا نام روشن ہوا ہے۔

    خیال رہے دربار کرتارپور ضلع نارووال میں ہے جبکہ اس کے دوسری جانب سرحد پار بھارتی تحصیل بٹالہ میں ڈیرہ بابا گرونانک ہے، پاکستان نہ پہنچنے والے سکھ یاتری دوربین سے دربار کرتا سنگھ کا نظارہ کرتے ہیں۔

    دوسری جانب نیویارک میں وزیر خارجہ شاہ محمود قریشی کی عالمی رہنماؤں سے ملاقاتیں جاری ہیں، وزیر خارجہ سےامریکی نمائندہ خصوصی برائے افغانستان زلمے خلیل زاد، نائب وزیر خارجہ ایلس ویلز، بحرینی ہم منصب اور بل گیٹس فاونڈیش کے صدر نے ملاقات کی۔

    بحرینی ہم منصب شیخ خالدبن احمد الخلیفہ سے ملاقات میں دوطرفہ تجارت اورسرمایہ کاری بڑھانےپراتفاق کیا گیا، شاہ محمود قریشی نےبحرین میں مقیم پاکستانی کمیونٹی کےمسائل سےمتعلق آگاہ کیا۔

    وزیر خارجہ سے بل اور میلنڈا گیٹس فاونڈیشن کے صدر ڈاکٹر کرس ایلس نے بھی ملاقات کی، شاہ محمود قریشی نے فاونڈیشن کی پاکستان میں انسداد پولیو کی کاوشوں کو سراہا۔