سیالکوٹ : معاون خصوصی فردوس عاشق اعوان نے کہا ہے کہ مسیحی برادری ملک کی ترقی اور خوشحالی میں بھرپور کردار ادا کر رہی ہے، کرسمس پر حکومت کی طرف سے مسیحی برادری کو مبارکباد پیش کرتی ہوں۔
ان خیالات کا اظہار انہوں نے سیالکوٹ میں تقریب سے خطاب کرتے ہوئے کیا، انہوں نے کہا کہ حکومت اقلیتوں کو ہر شعبہ میں یکساں مواقع فراہم کررہی ہے۔
نئے پاکستان کی تعمیر میں مسیحی برادری بھرپور کردارادا کرے گی، اسلام امن، محبت اور درگزر کرنے کی تعلیم دیتا ہے، مذہبی ہم آہنگی مسلمانوں کے عقیدے کا حصہ ہے۔
ڈاکٹر فردوس عاشق اعوان نے کہا کہ قائد اعظم نے تمام شہریوں کو بلاتفریق آزادی اور تحفظ کی ضمانت دی تھی، حکومت اقلیتوں کے حقوق کی فراہمی میں کوئی کسر اٹھا نہ رکھے گی۔
وطن عزیز کے پرچم میں سفید رنگ اقلیتوں کی ترجمانی کرتا ہے، پاکستان میں اقلیتوں کو تحفظ حاصل ہے، مسیحی بھائیوں کی ترقی کیساتھ ملکی دفاع میں بھی قابلِ قدر خدمات ہیں۔
مسیحی برادری کی خدمات کو کبھی بھی فراموش نہیں کیاجاسکتا، نئے پاکستان میں تمام اقلیتی نمائندوں کوساتھ لیکر چل رہےہیں۔
