ARYNews.tv | Urdu – Har Lamha Bakhabar

Tag: SIM biometric verification

  • موبائل سموں کی بائیو میٹرک تصدیق کی آخری ڈیڈلائن بھی ختم

    موبائل سموں کی بائیو میٹرک تصدیق کی آخری ڈیڈلائن بھی ختم

    اسلام آباد: موبائل سموں کی بائیو میٹرک تصدیق کیلئے وزارتِ داخلہ کی جانب سے دی گئی آخری ڈیڈلائن بھی ختم ہوگئی ہے۔

    نیشل ایکشن پلان کے تحت نوے روز کی ڈیڈلائن ختم ہوگئی، آخری مرحلے میں ایک شناختی کارڈ پر جاری ہونیوالی ایک سم اور کارپوریٹ سیکٹر ملازمین کے زیرِ استعمال سموں کی تصدیق ہونا باقی تھی۔

    وزارتِ داخلہ نے موبائل کمپنیوں اور پی ٹی اے کی درخواست پر ان سموں کی تصدیق کیلئے پندہ مئی رات بارہ بجے کی حتمی ڈیڈلائن دی تھی۔

    ٹیلی کام ذرائع کے مطابق اختتامی مرحلے میں ایک کروڑ بیس لاکھ سموں کی تصدیق کا عمل مکمل کیا گیا اور تصدیق نہ ہونے والی سموں کو بند کر دیا گیا ہے۔

    پی ٹی اے کے اعدادو شمار کے مطابق بائیو میٹرک تصدیق شدہ سموں کی تعداد بارہ اپریل تک دس کروڑ اسی لاکھ تھی جبکہ دو کروڑ بیس لاکھ سمیں تصدیق نہ ہونے پر بلاک کر دی گئی تھیں۔

  • سمز کی تصدیق کیلئے تاریخ میں توسیع نہیں کی جائے، چیئرمین پی ٹی اے

    سمز کی تصدیق کیلئے تاریخ میں توسیع نہیں کی جائے، چیئرمین پی ٹی اے

    اسلام آباد:  چیئر مین پی ٹی اے اسماعیل شاہ کا کہنا ہے کہ سمزکی بائیو میٹرک تصدیق کے لئے تاریخ میں توسیع نہیں کی جائے ۔

    چیئر مین پی ٹی اے کا کہنا ہے کہ بارہ اپریل کے بعدغیر تصدیق شدہ سم بند کردی جائیں گی، اب تک غیرتصدیق شدہ ڈیڑھ کروڑسم بلاک کردی گئی ہیں ،12اپریل سمزکی بائیو میٹرک تصدیق کی آخری اور حتمی تاریخ ہے۔

    اسماعیل شاہ کا کہنا تھا کہ افغان سمز کے سگنل روکنے کے لئے ٹیکنالوجی موجود نہیں، پی ٹی اے نے یہ معاملہ حکومت پاکستان، پاک فوج اورافغان حکومت کے سامنے اٹھایا ہے۔

    انکا کہنا تھا کہ  پاکستان میں دوہزار چودہ کے اختتام تک موبائل فون کنکشنز کی تعداد تیرہ کروڑ ستاون لاکھ ساٹھ ہزار کی سطح پر آگئی۔ حالیہ مہم کے بعد ملک بھر میں زیرِ استعمال کنکشنز کی تعداد تیرہ کروڑ ہوگئی ہے۔

  • بائیومیٹرک تصدیق کیلئے ڈیڈلائن میں توسیع نہیں دی جائے گی، پی ٹی اے

    بائیومیٹرک تصدیق کیلئے ڈیڈلائن میں توسیع نہیں دی جائے گی، پی ٹی اے

    اسلام آباد: پی ٹی اے کا کہنا ہے کہ بارہ اپریل سمز کی تصدیق کا آخری دن ہے، بائیو میٹرک تصدیق کیلئے ڈیڈلائن میں توسیع نہیں دی جائے گی ۔

    پی ٹی اے کی جانب سے جاری ہونے والے بیان میں کہا گیا ہے کہ غیر تصدیق شدہ سمیں بارہ اپریل کی رات بند کر دی جائیں گی۔

    سات کروڑاکیاون لاکھ اٹھائیس ہزار چھ سو ستاسی سمز کی بائیو میٹرک تصدیق ہوچکی ہے ۔

    ایک کروڑ تیرہ لاکھ پینتالیس ہزار دس سمیں بلاک کی گئی ہیں، پی ٹی اے کے مطابق موبائل کمپنیوں کوایک سو تین ملین سموں کی تصدیق کیلئے نوے روز کی ڈیڈلائن دی گئی تھی۔

  • سمز کی بائیو میٹرک تصدیق کیلئے صرف17دن باقی

    سمز کی بائیو میٹرک تصدیق کیلئے صرف17دن باقی

    اسلام آباد: سمز کی بائیو میٹرک تصدیق کیلئے صرف سترہ دن باقی رہ گئے ہیں۔

    پاکستان ٹیلی کمیونیکیشن اتھارٹی کی جانب سےچھبیس فروری سے سموں کی بائیومیٹرک تصدیق کا دوسرامرحلہ شروع ہوا، چھبیس فروری تک یومیہ تیرہ سے چودہ لاکھ سمز کی تصدیق کرائی جارہی تھی۔

    پی ٹی اے کے مطابق اب تک پانچ کروڑ چھہتر لاکھ بیاسی ہزار سمز شناختی کارڈ پر تصدیق ہوچکی ہیں جبکہ اب بھی ایک کروڑ اسی لاکھ سموں کی بائیو میٹرک تصدیق ہونا باقی ہے۔

    غیر تصدیق شدہ ایک کروڑ پچاس لاکھ موبائل سمز بند ہوچکی ہیں۔

    پی ٹی اے کے مطابق بارہ اپریل کے بعد تمام غیر تصدیق شدہ سمز بند کردی جائیں گی۔

    دوسری جانب پی ٹی اے کو موبائل کمپنیوں سےتصدیق شدہ سموں کےاعدادوشمارموصول ہوگئے۔

    ذرائع کے مطابق موبائل کمپنیوں نے تئیس مارچ تک تصدیق کی گئی سموں کے اعدادو شمار جمع کروائے۔ مجموئی طور پر سات کروڑچالیس لاکھ نو ہزار دوسو پینسٹھ سموں کی تصدیق ہوئی۔

    موبی لنک کی دو کروڑ سترہ لاکھ انیس ہزار سات سو ستتر سمیں تصدیق ہوئیں۔ ٹیلی نار کی ایک کروڑ چورانوے لاکھ نو ہزارپانچ سو تیس سمیں تصدیق ہوئیں۔

    یوفون کی ایک کروڑ سترہ لاکھ اٹھانوے ہزارچھ سو ترپن سمیں تصدیق ہوئیں، چائنہ موبائل کمپنی کی ایک کروڑبتیس لاکھ انسٹھ ہزار ایک سو ستائیس سمیں تصدیق ہوئیں  جبکہ وارد کی اٹھہتر لاکھ بائیس ہزار دوسواٹھارہ سمیں تصدیق ہوئیں۔

  • غیر ملکیوں کیلئے موبائل سمز کی تعداد محدود کرنے کا فیصلہ

    غیر ملکیوں کیلئے موبائل سمز کی تعداد محدود کرنے کا فیصلہ

    اسلام آباد: پی ٹی اے نے غیر ملکیوں کیلئے موبائل سمز کی تعداد بھی محدود کرنے کا فیصلہ کیا ہے، غیر ملکی ایک موبائل کمپنی سے دو سے زیادہ سمز نہیں خرید سکیں گے۔

    گلی کوچوں ،فٹ پاتھوں پرریوڑیوں کی طرح بکتی سمزنے بے پناہ مسائل پیدا کردیے تو حکومت کو،پاکستان شہریوں کی سمز تصدیق کرنے کا خیال آیا اور اب خبر آئی ہے کہ غیر ملکی بھی ضابطے کی کارروائی کے بغیر سمز حاصل نہیں کرسکیں گے ۔

     پی ٹی اے ذرائع کے مطابق، تصدیق کا مرکزی نظام نہ ہونے پر موبائل کمپنیوں کو پابند کیا گیا ہےکہ غیر ملکیوں کو دوسے زائد سمز جاری نہ کی جائیں۔اس طرح غیر ملکیوں کو دس سمز رکھنے کی اجازت ہوگی ۔

     اس سے پہلے غیر ملکیوں کیلئے سمز کی تعداد کے حوالے سے کوئی پابندی نہیں تھی ۔

    پی ٹی اے کے مطابق غیر ملکیوں کے زیر استعمال سموں کی تصدیق کی آخری تاریخ چودہ اپریل ہے، غیر ملکی کار آمد ویزہ کی نقل موبائل کمپنیوں کو فراہم کر کے سموں کی تصدیق کروا سکتے ہیں۔

  • سمزکی بائیو میٹرک تصدیق، دوسرا مرحلہ آج سے شروع

    سمزکی بائیو میٹرک تصدیق، دوسرا مرحلہ آج سے شروع

    اسلام آباد: سمز کی بائیو میٹرک تصدیق کا پہلا مرحلہ ختم ہوگیا، دوسرا مرحلہ آج شروع ہوگا، جو تین ہفتے تک جاری رہے گا۔

    سمز کی بائیو میٹرک تصدیق کا پہلا مرحلہ ختم ہوگیا ہے، چیئرمین پی ٹی اے اسماعیل شاہ  کا کہنا ہے کہ ایک کروڑ سے زائد غیر تصدیق شدہ سمز بلاک کردی گئیں، چھ کروڑ سے زائد سمز کی تصدیق ہوچکی ہے۔

    انکا کہنا ہے کہ دوسرا مرحلہ دو سے تین ہفتے کے لئے ہوگا اور صارفین کو رجسٹریشن کیلئےایس ایم ایس کے ذریعے آگاہ کیا جائے گا، موبائل صارف دو سے تین دن میں سم کی تصدیق کرے گا، بصورت دیگر سم بلاک کردی جائے گی۔

    ان کا یہ بھی کہنا تھا کہ چار کروڑ سے زائد سموں کی تصدیق ہونا باقی ہے، جن سموں کی تصدیق نہیں کرائی جائے گی انہیں مرحلہ وار بند کردیا جائے گا۔

    یاد رہے کہ پی ٹی اے ذرائع کے مطابق ملک میں موجود دس کروڑ تیس لاکھ سموں کی بائیومیٹرک تصدیق کے لیے چوالیس روز کا وقت دیا گیا تھا، جس کا پہلا مرحلہ گزشتہ روز رات بارہ بجے ختم ہوگیا اور تین سے زائد سمیں رکھنے والے صارفین کی غیر تصدیق شدہ سمیں بلاک کردی جائیں گی۔

    ہزاروں موبائل صارفین کی سمیں نادرا سے آن لائن تصدیق نہ ہونے کی وجہ سے بائیو میٹرک نظام میں رجسٹر نہیں ہو سکی ہیں،  دو ہزار پانچ سے پہلے کے جاری کیے گے شناختی کارڈ والے صارفین کو بائیو میٹرک تصدیق میں مشکلات کا سامنا ہے۔

  • سمز کی بائیو میٹرک تصدیق، پہلے مرحلے کا آج آخری روز

    سمز کی بائیو میٹرک تصدیق، پہلے مرحلے کا آج آخری روز

    کراچی : سموں کی بائیو میٹرک تصدیق کا پہلا مرحلہ آج رات بارہ بجے ختم ہو جائے گا، جس کے بعد تین سے زائد سموں والے صارفین کی تصدیق نہ ہونیوالی سمیں بلاک کردی جائیں گی۔

    پی ٹی اے ذرائع کے مطابق ملک میں موجود دس کروڑ تیس لاکھ سموں کی بائیومیٹرک تصدیق کے لیے چوالیس روز کا وقت دیا گیا تھا، جس کا پہلا مرحلہ جمعرات کو رات بارہ بجے ختم ہوجائے گا اور تین سے زائد سمیں رکھنے والے صارفین کی غیر تصدیق شدہ سمیں بلاک کردی جایئں گی۔

    بائیومیڑک نظام کے ذریعے ملک بھر میں اب تک پانچ کروڑ پنتیس لاکھ سمز کی تصدیق ہوچکی ہے اور چار کروڑ پچپن لاکھ سموں کی تصدیق ہونا اب بھی باقی ہے۔

    تصدیق کے عمل کے دوران اب تک اکسٹھ لاکھ سمز بند کی گئیں ہیں۔

    ہزاروں موبائل صارفین کی سمیں نادرا سے آن لائن تصدیق نہ ہونے کی وجہ سے بائیو میٹرک نظام میں رجسٹر نہیں ہو سکی ہیں،  دو ہزار پانچ سے پہلے کے جاری کیے گے شناختی کارڈ والے صارفین کو بائیو میٹرک تصدیق میں مشکلات کا سامنا ہے۔

  • سموں کی بائیو میٹرک تصدیق کے پہلے مرحلے کا آغاز

    سموں کی بائیو میٹرک تصدیق کے پہلے مرحلے کا آغاز

    اسلام آباد: سموں کی بائیو میٹرک تصدیق کے پہلے مرحلے کا آغاز آج سے کر دیا گیا ہے، 44 ملین سموں کی تصدیق پہلے مرحلے میں ہو گی۔

    ٹیلی کام ذرائع کے مطابق پہلے مرحلے میں کراچی ، پشاور، ڈی آئی خان، بلوچستان ، فاٹا کی 21 ملین سمیں جبکہ باقی پاکستان کی 23 ملین ایسی سمیں جو ایک شناختی کارڈ پر تین یا اس سے زائد سمیں جاری ہوئی ہیں، ان کی تصدیق ہوگی۔

    پہلے مرحلے میں 12 جنوری سے 26 فروری تک تین یا اس سے زائد سمیں رکھنے والوں کی تصدیق ہوگی، دوسرے مرحلے میں27 فروری سے 13 اپریل تک دو یا اس سے کم سمز رکھنے والوں کی سمز کی تصدیق کی جائے گی، 14 اپریل کے بعد تصدیق نہ ہو پانے والی تمام سمز بند کر دی جائیں گی۔

    موبائل کمپنیاں سمز کی بائیو میٹرک تصدیق کیلئے میڈیا پر تشہیری مہم بھی شروع کریں گی جبکہ کالز اور ایس ایم ایس کے زریعے بھی صارفین کو بائیو میٹرک تصدیق کا کہا جائے گا۔

    موبائل فون سموں کی بائیومیٹرک تصدیق کیلئے ملک بھر میں استعمال ہونے والی 10کروڑ 30 لاکھ سموں کو دو حصوں میں تقسیم کیا گیا ہے۔ ایک حصہ میں وہ صارفین شامل ہیں، جو ایک شناختی کارڈ پر ایک یا دو سمیں استعمال کر رہے ہیں۔

    دوسرا حصے میں حساس شہروں بلوچستان اور فاٹا میں زیرِ استعمال سمیں شامل ہیں اور وہ صارفین جنکو ایک شناختی کارڈ پر 2 یا اس سے زائد سمیں جاری کی گئی ہیں۔

    واضح رہے وزارتِ داخلہ نے موبائل کمپنیوں کو سموں کی بائیو میٹرک تصدیق کیلئے 90 دن کی حتمی ڈیڈلائن دی تھی۔

    سموں کی بائیو میٹرک تصدیق کے حوالے سے وزارتِ داخلہ حکام اور موبائل آپریٹرز کا اجلاس ہوا تھا، ذرائع کے مطابق موبائل کمپنیاں نوے دن میں 103 ملین سموں کی تصدیق کریں گی جبکہ دو مراحل میں سموں کی تصدیق کا عمل مکمل کیا جائے گا۔