Tag: sindh apex committee meeting

کراچی : سندھ ایپکس کمیٹی کا اہم اجلاس آج وزیراعلیٰ ہاؤس میں ہورہا ہے، اجلاس میں وزیراعلیٰ، کورکمانڈر اور ڈی جی رینجرز سندھ شریک ہوں گے۔

تفصیلات کے مطابق کراچی آپریشن کو منطقی انجام تک کیسے پہنچایا جائے؟ ایپکس کمیٹی کا اہم اجلاس آج ہوگا، وزیراعلیٰ ہاؤس میں ہونے والی بیٹھک میں وزیراعلیٰ سندھ سید مراد علی شاہ ، کور کمانڈر کراچی ،ڈی جی رینجرز شریک ہوں گے جبکہ آئی جی پولیس ، ہوم سیکریٹری ،چیف سیکریٹری اور متعلقہ اداروں کے سربراہ بھی شرکت کریں گے۔

اجلاس میں ٹارگٹ آپریشن کی شروع دن سے لیکراب تک کی کارکردگی کاجائزہ لیا جائے گا اوراس بات بھی گفتگو ہوگی کہ آنے والے دنوں میں آپریشن کو کس طرح بھر پور انداز میں جاری رکھا جائے ۔

اجلاس میں پہلی مرتبہ گورنر سندھ بیمار ہونے کی وجہ سے شرکت نہیں کریں گے۔

مزید پڑھیں : کراچی کو دنیا کا پُرامن ترین شہر بنایا جائے گا،وزیراعلیٰ سندھ

یاد رہے کہ گزشتہ ایپکس کمیٹی نے نیشنل ایکشن پلان کے تحت کراچی میں پائیدار امن کیلئے تمام ترضروری اقدامات کا فیصلہ کیا گیا تھا، جس کے تحت اسٹریٹ کرائم میں ملوث مجرموں اور منشیات فروشوں کے خلاف کریک ڈاوٴن شروع کرنے کا بھی فیصلہ کیا گیا تھا۔

اجلاس سے گفتگو کرتے ہوئے وزیراعلیٰ سندھ نے کہا تھا کہ دہشت گردوں ،ٹارگٹ کلر،بھتہ خوروں اور اغوا برائے تاوان میں ملوث مجرموں کے خلاف آپریشن کے حوصلہ افزاء نتائج سامنے آئے ہیں، جاری آپریشن میں مجرموں ،مافیا اور کالعدم دہشتگرد تنظیموں کی ریڑھ کی ھڈی توڑ دی گئی ہے،مگر اس کا یہ بھی مطلب نہیں ہے کہ ہدف حاصل کرلیا گیا ہے۔

خیال رہے کہ سندھ کے نئے گورنر ریٹائرڈ جسٹس سعید الزماں صدیقی تاحال مقامی اسپتال میں زیر علاج ہیں۔

سرکاری ذرائع اور معالجین کا کہنا ہے کہ کہ گورنر کی طبیعیت اب بہتر ہے، انہیں سینے میں انفیکشن کے باعث سانس لینے میں دقت کا سامنا تھا جس کے باعث 79 سالہ گورنر سندھ کو اسپتال میں داخل کیا گیا تھا جہان طبیعت کی بحالی کے بعد وی آئی پی روم میں منتقل کردیا گیا تھا۔