Tag: Sindh Assembly

کراچی: سندھ اسمبلی کی 80 سے زائد گاڑیوں کے غیر قانونی استعمال کا انکشاف ہوا ہے، سندھ اسمبلی کے ملازم آفتاب مہر نے اس سلسلے میں چیف الیکشن کمشنر کو ایک خط لکھا ہے اور حکام کو لیگل نوٹس بھجوا دیا ہے۔

تفصیلات کے مطابق سندھ اسمبلی کے ملازم آفتاب مہر کی جانب سے حکام کو ایک لیگل نوٹس بھیجا گیا ہے جس میں کہا گیا ہے کہ سندھ اسمبلی کی 80 سے زائد گاڑیاں غیر قانونی طور پر استعمال ہو رہی ہیں۔

لیگل نوٹس کے مطابق سندھ اسمبلی کے پاس 120 گاڑیاں ہیں، 42 گاڑیاں مختلف ملازمین استعمال کر رہے ہیں، اکثر ملازمین کو سندھ اسمبلی کی گاڑیاں الاٹ نہیں ہو سکتیں، اسپیشل سیکریٹری سندھ اسمبلی نے سابق ایم پیز اور دیگر کو گاڑیاں واپس کرنے کا کہا تھا۔

لیگل نوٹس میں کہا گیا ہے کہ سندھ اسمبلی کی 22 گاڑیاں اسپیکر آغا سراج درانی کے زیر استعمال ہیں، جب کہ ڈپٹی اسپیکر سندھ اسمبلی کے پاس 3 گاڑیاں ہیں، اسٹیڈنگ کمیٹی کے چیئرمین کے پاس بھی 9 گاڑیاں ہیں جو واپس نہیں کی گئیں، اس کے علاوہ سابق اسپیکر اور سابق ایم پی ایز کے پاس 11 گاڑیاں ہیں جو 10 سال سے پیٹرول کے ساتھ استعمال کی جا رہی ہیں۔

نواز شریف، آصف زرداری اور گیلانی کیخلاف توشہ خانہ سے گاڑیاں لینے کا کیس کھل گیا

یہ انکشاف بھی کیا گیا ہے کہ سندھ اسمبلی کی 5 گاڑیاں چھین لی گئی ہیں جو تاحال واپس نہیں مل سکیں، اور 24 گاڑیاں تاحال گم ہیں، جس کی ایف آئی آر تک نہیں ہوئی۔

کراچی: سندھ اسمبلی کے اجلاس میں آج 8 بل منظور کر لیے گئے، جب کہ اپوزیشن نے اس عمل کے خلاف واک آؤٹ کیا۔

تفصیلات کے مطابق اجلاس میں سندھ اسمبلی نے پانچ سرکاری بل منظور کیے تو اپوزیشن نے اس کے خلاف سندھ اسمبلی سے واک آؤٹ کر لیا، تاہم اپوزیشن کے واک آؤٹ کے باوجود 3 مزید بل منظور کر لیے گئے۔

واک آؤٹ سے قبل منظور ہونے والے بلوں میں حیدرآباد واٹر بورڈ اینڈ سیوریج بل 2023، میرپورخاص واٹر بورڈ اینڈ سیوریج بل 2023، شہید بے نظیرآباد واٹر بورڈ اینڈ سیوریج بل 2023، لاڑکانہ واٹر بورڈ اینڈ سیوریج بل 2023، اور سکھر واٹر بورڈ اینڈ سیوریج بل 2023 شامل تھے۔

بل کے متن کے مطابق کارپوریشن کا چیئرمین میئر ہوگا، اور بورڈ 15 ارکان پر مشتمل ہوگا، بورڈ کے ارکان میں 9 سرکاری اور 5 غیر سرکاری ہوں گے، بورڈ میں کم سے کم 2 خواتین ہوں گی۔

واک آؤٹ کے بعد منظور ہونے والے بلوں میں سندھ بلدیاتی ترمیمی بل 2023، کراچی میٹروپولیٹن یونیورسٹی بل 2022، اور ہینڈز انسٹیٹیوٹ آف ڈیولپمنٹ اسٹیڈیز بل 2023 شامل ہیں۔

اپوزیشن لیڈر رعنا انصار نے اس عمل پر تنقید کرتے ہوئے کہا کہ سندھ اسمبلی میں روزانہ کے بنیاد پر بل پاس ہو رہے ہیں، یہ اہم بل ہیں لیکن اپوزیشن کو اعتماد میں نہیں لیا گیا، ممبرز کو نہیں بتایا گیا کہ اہم قانون سازی ہونے جا رہی ہے۔

ایم پی اے محمد حسین نے کہا اندھی قانون سازی کی جا رہی ہے، گورنر سندھ سے اپیل ہے کہ ان کے پاس جب یہ بل آئیں تو ان کی توثیق نہ کریں، آج 6 کارپوریشن کے بلز عجلت میں پاس کیے گئے، ہم نے ٹوکن احتجاج کیا لیکن حکومت نے نہیں سنا، جس پر ہم اجلاس کے بائیکاٹ پر مجبور ہوئے۔