Tag: Sindh Assembly

کراچی :رینجرز کے قیام اور خصوصی اختیارات کے معاملے پر سندھ اسمبلی میں قرارداد آج پیش کی جائے گی، رات گئے وزیرِاعلی سندھ نے رینجرز اختیارات پر مشاورت جاری رکھی۔

سندھ اسمبلی کا اجلاس آج ہوگا، اجلاس میں کراچی میں رینجرز کے خصوصی اختیارات میں توسیع کے معاملے پر قرارداد پیش کی جائے گی، سندھ میں سیاسی گرما گرمی اور ہلچل کے پس منظر میں توقع ہے کہ رینجرز کے اختیارات کی توسیع کے معاملے پر ایوان میں گرما گرم بحث کی جائے گی۔

آرٹیکل ایک سوسینتالیس کے تحت قرارداد کی منظوری اسمبلی کے ایجنڈے میں بارہویں نمبر پر ہے۔

اس سے قبل رات گئے کراچی آپریشن کے کپتان قائم علی شاہ کی زیرصدارت رینجرز اختیارات پر مشاورتی اجلاس ہوا، جس میں سندھ اسمبلی میں قرار داد کے متن کو آخری شکل دی گئی، اجلاس میں پیپلزپارٹی کے سینئر رہنماوں نثارکھوڑو، مرادعلی شاہ ،سکندر میندھر وسمیت دیگر وزراء نے شرکت کی۔

دوسری جانب گذشتہ روز وزیراعلٰی سندھ قائم علی شاہ نے کہا ہے کہ رینجرز کے اختیارات میں توسیع میں دوچاردن تاخیرسےآسمان نہیں گرپڑے گا، قائم علی شاہ کارینجرز اختیارات کے معاملے پر ہونے والے مباحثوں پر ناراضگی کا اظہار کرتے ہوئے کہنا تھا کہ رینجرز اختیارات کے معاملے پرسیاست چمکانی مناسب نہیں۔

قائم علی شاہ کا کہنا تھا کہ وفاق کے دوسرے اداروں سے مسئلہ ہے، نیب اورایف آئی اے سندھ میں من مانیاں کررہے ہیں، وزیراعلیٰ سندھ کا کہنا تھا کہ وفاقی اداروں کی صوبے میں من مانیوں کامعاملہ بھی آج سندھ اسمبلی میں اٹھائیں گے۔

رینجرزکو پھرسے بااختیار کرنے کی قرارداد آج سندھ اسمبلی میں پیش ہونے کا امکان ہے، مولابخش چانڈیو کا کہنا ہے کہ ہوسکتا ہے، ایک دو روز میں سمری پر دستخط ہو جائیں گے.

کراچی میں رینجرز اختیارات کی مدت ختم ہوئے پانچ روز گُزر چُکے اور اب یہ معاملہ طول پکڑتا جارہا ہے، آج سندھ اسمبلی میں رینجرز اختیارات کی مدت میں توسیع کی قرارداد پیش ہونے کا امکان ہے.

ذرائع کے مطابق قرارداد پر گرما گرم بحث بھی ہوسکتی ہے اُس کے بعد ہی کچھ واضح ہوگا.

آج ہونے والا سندھ اسمبلی کے اجلاس کو غیر معمولی حیثیت دی جارہی ہے ۔ پی ٹی آئی پہلے ہی رینجرز کے حق میں قرارداد جمع کراچکی تھی اور آج فنکشنل لیگ نے بھی جمع کرادی.

گزشتہ روز ہونیوالے اجلاس سے قبل ایم کیو ایم نے بھی اپنا موقف دے دیا کہ انہیں کراچی آپریشن پر کوئی تحفظات نہیں کارکنان کے لاپتہ ہونے پر ہیں، خواجہ اظہار الحسن نے اس تاثر کو غلط قرار دیا کہ اختیارات کے معاملے پر ایم کیو ایم اور پیپلز پارٹی ایک ہیں.